Lwaḥi 16 - Ṯarifiṯ 2020

Sebƹa n ṯmejmarin n uɣḍab n Arebbi

¹ Sȓiɣ i yijjen n ṯmijja ṯendeq-d zi ṯemziḏa ṯameqqrant ṯeqqar-asent i sebƹa nni n lmalaʼikaṯ s jjheḏ: "Ruḥent zeǧƹent sebƹa n ṯmejmarin n uɣḍab n Arebbi x ṯmurṯ."

² Ṯekkar ṯeffeɣ-d lmalaʼika ṯamezwarut ṯzeǧeƹ ṯimejmarṯ nnes x ṯmurṯ ffɣent-id ṯḥebba ḏ ṯiƹeffanin ṯinni iy teggent ȓeḥriq ȓeqfent iwḏan nni iy ḏi iǧa ṭṭabaƹ n ȓwaḥc tsejjaḏen i lʼaṣnam nnes.

³ Ṯekkar lmalaʼika wis ṯnayen ṯzeǧeƹ ṯimejmarṯ nnes ḏi ȓebḥar, ȓebḥar iḏweȓ ḏ iḏammen am iḏammen n wenni immuṯen, min iddaren ḏi ȓebḥar qaƹ immuṯ.

⁴ Ṯekkar lmalaʼika wis tȓaṯa ṯzeǧeƹ ṯimejmarṯ nnes x iɣezran ḏ ȓaƹnaṣer n waman ḏewȓen ḏ iḏammen.

⁵ Sȓiɣ i lmalaʼika n waman ṯeqqar: "Cek aqac nican ḏi ȓeḥkamaṯ nnec ḏ cek ḏ Lƹaḍim. Ḏ cek ḏ wenni ig iǧan, tuɣa ṯeǧiḏ.

⁶ Aqa wami sizzȓen iḏammen n ȓmuminin ṣṣaliḥin ḏ lʼanbiya, ṯuciḏ-asen aḏ swen iḏammen uȓa ḏ niṯni ȓaḥeqqac sḏaheǧen manayenni."

⁷ Sȓiɣ i yijjen n ṣṣut iqqar-d zi ȓmeḏbaḥ: "Wah a Siḏi Arebbi nneɣ ig izemmaren i kuȓci, ȓeḥkamaṯ nnec ḏ ȓḥaqq, aqaṯent nican."

⁸ Ṯekkar lmalaʼika wis arbeƹa ṯzeǧeƹ ṯimejmarṯ nnes x ṯfuct itwasmeḥ-as i ṯfuct aḏ tsecmeḍ iwḏan s ṯmessi.

⁹ Cemḍen yiwḏan s lḥarara ijehḏen. Waxxa amenni qqaren awaȓen war iḥȓin ḏeg yisem n Arebbi wenni ɣar ṯeǧa ssulṭa x lmuṣibaṯ-a. War tuben ca, war ṯ semɣaren ca.

¹⁰ Ṯekkar lmalaʼika wis xemsa ṯzeǧeƹ ṯimejmarṯ nnes x lƹarc n ȓwaḥc ṯehwa-d ṯaǧesṯ x lmemlaka nnes. Iwḏan tɣeẓẓaẓen iȓesawen nsen s ȓeḥriq.

¹¹ Ƹlaḥsab ȓeḥriq ḏ ṯḥebba iy ḏaysen niṯni qqaren awaȓen war iḥȓin x Arebbi iǧan ḏeg ujenna, war tuben ca zi ȓefƹayeȓ nsen.

¹² Ṯekkar lmalaʼika wis setta ṯzeǧeƹ ṯimejmarṯ nnes x yiɣzar n Lfurat ameqqran uzɣen waman iy ḏayes, ḥima aḏ itwassewjeḏ ubriḏ i izeǧiḏen n ccarq.

¹³ Ẓriɣ ṯȓaṯa n jnun iƹeffanen ggin am ijerwan: ijjen iteffeɣ-d zeg uqemmum n wenni am ddaynaṣur; ijjen iteffeɣ-d zeg uqemmum n ȓwaḥc; ijjen iteffeɣ-d zeg uqemmum n wenni itarran ixef nnes ḏ nnabi.

¹⁴ Yina ḏ arruḥaṯ n ccayaṭin teggen lmuƹjizaṯ zaƹma. Traḥen ɣar izeǧiḏen n ṯmurṯ marra ḥima aṯen smunen i ȓḥarb ḏi Nhar nni ameqqran n Arebbi ig izemmaren i kuȓci.

¹⁵ ("Ṣennṭeṯ, qa nec aḏ d aseɣ am d yusa ij uceffar. Ssaƹḏ n wenni iy ɣa yiȓin ƹlabal aḏ iḥḍa arruḍ nnes ḥima war iggur ca ḏ aƹeryan aḏ ẓren yiwḏan ṯuƹaryant nnes.")

¹⁶ Smunen-ṯen ɣar yijjen n umcan s lƹibriya qqaren-as

¹⁷ Ṯekkar lmalaʼika wis sebƹa ṯzeǧeƹ ṯimejmarṯ nnes ḏi lhawa sȓiɣ i yijjen n ṯmijja zi ṯemziḏa ṯameqqrant iy d ikkin zi lƹarc ṯeqqar s jjheḏ: "Ṣafi, itwakemmeȓ!"

¹⁸ Iwqeƹ wassam ḏ iɣuyan ḏ wajjaj ḏ zzinzal ijheḏ. Ƹemmarṣ war iwqiƹ am zzinzal-a ijehḏen zeg wami iǧa bnaḏem x ṯmurṯ.

¹⁹ Ṯceqq ṯendint ṯameqqrant x tȓaṯa, nheḏment ṯneddam n ȓegnus. War ittu ca Arebbi ṯandint n Babil ṯameqqrant, fa innama yuca-as aḏ tsew zi ȓkas n waman uḍiȓ iƹni lƹiqab nnes ameqqran.

²⁰ Kuȓ ṯayzirṯ ṯenhezz, fsin iḏurar.

²¹ Iwḍa-d icarra ḏ ameqqran zeg ujenna x yiwḏan, kuȓ abquq iwezzen azyen uqendar. Iwḏan qqaren awaȓen war iḥȓin x Arebbi x ssabab n lmuṣiba-ya n icarra ȓaḥeqqac lmuṣiba-ya ḏ ṯameqqrant aṭṭas.