Luqa 9 - Ṯarifiṯ 2020

Siḏiṯneɣ Ƹisa issekk arrusul aḏ beccaren

¹ Iȓaɣa-d Ƹisa x ṯenƹac n arrusul yuca-asen ṯizemmar ḏ ssulṭa aḏ ḥekmen x marra jnun u ƹaweḏ ḥima aḏ sgenfan ȓehȓacaṯ.

² Issekk-iṯen ḥima aḏ beccaren s ȓmulk n Arebbi aḏ sgenfan imehȓac.

³ Inna-asen: "War kiḏwem tiwim walu x ubriḏ. War kessim ni aƹekkaz, ni aqrab, ni aɣrum, ni nnuqarṯ, ni ṯnayen n ičammiren.

⁴ Xmi ɣa ṯaḏfem ɣar can ṯeddarṯ, qqimem ḏinni aȓ ɣa ṯuyurem ssenni.

⁵ Meȓa war kenniw qbiȓen ca ḏi can ṯendint, ffɣem ssenni mesḥeṯ ṯaƹejjact zeg iḍaren nwem am ca n chaḏeṯ xasen."

⁶ Ṣafi ruḥen arrusul ƹḏun ḏi ȓedcuraṯ, tbeccaren sgenfan iwḏan ḏi mkuȓ amcan.

⁷ Lwali Hirudus yarra-d ȓexbar x marra min itewqiƹen, iḏhec minzi can yiwḏan qqaren qa wanita ḏ Yaḥya nni, itwasekkar-d zi ȓmewṯ.

⁸ Ijjen iqqar lla, qa ḏ Ilyas iy d imeḍharen. Ijjen iqqar lla, qa ikkar-d ijjen zi lʼanbiya nni iqḏimen.

⁹ Hirudus inna: "Aqa nec qesseɣ azeǧif i Yaḥya nni, min iƹna wanita iy xef tesȓiɣ manaya?" Ixes aṯ iẓer.

Siḏiṯneɣ Ƹisa isecc xemsaȓaf n iryazen

¹⁰ Wami d ḏewȓen arrusul, ƹawḏen-as i Ƹisa x marra min ggin. Yuwi-ṯen ssenni ɣar jjiheṯ n yijjen n ubilaj umi qqaren Bayt Ṣayda.

¹¹ Wami ȓɣaci ssnen manaya ḏfaren-ṯ. Netta isteqbeȓ-iṯen ibḏa issawaȓ akiḏsen x ȓmulk n Arebbi isgenfa yinni ixsen aḏ genfan.

¹² Wami iƹḏu ȓḥaȓ usin-d ɣares ṯenƹac n imeḥḍaren nnes nnan-as: "Sekk iwḏan-a ssa ɣar ȓedcuraṯ ḏ ṯuḏrin yuḏsen ammu ḏ wammu, aḏ rzun min ɣa ccen ḏ mani ɣa sensen minzi amcan-a ḏ ȓexȓa waha."

¹³ Inna-asen Ƹisa: "Ucem-asen kenniw min ɣa ccen." Nnan-as: "Neccin ɣarneɣ ḏa ɣir xemsa n ṯxebbazin ḏ ṯnayen n iseȓman. Ma a nraḥ neccin a d nseɣ macca i marra iwḏan-a?"

¹⁴ (Minzi ḏinni can xemsaȓaf n iryazen.) Inna-asen Ƹisa i imeḥḍaren nnes: "Sɣimem-ṯen ḏ lfirqaṯ, xemsin xemsin."

¹⁵ Ggin manayenni, sɣimen-ṯen marra.

¹⁶ Ikkar iṭṭef xemsa nni n ṯxebbazin ḏ ṯnayen nni n iseȓman, iysi ṯiṭṭawin nnes ɣar ujenna uca icekkar Arebbi. Irza aɣrum nni yuca-asen-ṯ i imeḥḍaren nnes ḥima aṯ ferqen x yiwḏan nni marra.

¹⁷ Ccin marra jjiwnen. Ssenni ysin ṯenƹac n ṯeqrabin ƹemmarent s iȓeqquzen nni iceṭṭen.

Buṭrus itcehhaḏ x Lmasiḥ

¹⁸ Ijjen n nhar Ƹisa itẓaǧa waḥḏes ṭṭarf nnes imeḥḍaren nnes. Ikkar isseqsa-ṯen inna-asen: "Min xafi qqaren yiwḏan?"

¹⁹ Arrin xas nnan-as: "Ijjen iqqar cek ḏ Yaḥya. Ijjen iqqar cek ḏ Ilyas. Ijjen iqqar cek zi lʼanbiya iqḏimen iy d ikkaren zi ȓmewṯ."

²⁰ Inna-asen Ƹisa: "Y kenniw, min ḏayi d tarram nec?" Indeq-d Buṭrus inna-as: "Cek ḏ Lmasiḥ n Arebbi."

²¹ Ƹisa iʼakked xasen yumar-iṯen bac war txebbaren ḥadd x manayenni.

²² Inna-asen i imeḥḍaren nnes: "Mmis n bnaḏem labud aḏ itwaƹeddeb x waṭṭas n ṯmesȓayin, aṯ ƹiffen imeqqranen n Ayṯ-Israʼil ḏ arruyas n ȓfuqaha ḏ imseȓmaḏen n ccariƹa. Aṯ nɣen, wis ṯeȓtiyyam aḏ d itwasekkar zi ȓmewṯ."

²³ Ṯumma inna-asen i marra iwḏan nni: "Wenni ixsen aḏayi iḏfar nec, labud aḏ ismeḥ ḏeg yixef nnes, labud kuȓ nhar aḏ ikessi ṣṣalib nnes minxef ɣa iƹeddeb aḏayi iḏfar.

²⁴ Ȓaḥeqqac wenni irezzun aḏ isenjem ṯuḏarṯ nnes ataf at ixsar. Wenni ɣa ixsaren ṯuḏarṯ nnes x ssabab inu ataf at isenjem.

²⁵ Minzi ɣa infeƹ bnaḏem meȓa irbeḥ ddunect-a qaƹ wa ixsar ixef nnes niɣ iḍeyyeƹ ixef nnes?

²⁶ Wenni xafi ɣa iƹeffaren nec niɣ aḏ iƹeffar x wawaȓ inu, ataf axas iƹeffar Mmis n bnaḏem xmi d ɣa yas s lƹaḍama nnes ḏ lƹaḍama n Babas ak lmalaʼikaṯ iqeddsen.

²⁷ Aqa tesȓam ȓḥaqq: Ȓebƹaḍ zeg yinni iǧan ḏa akiḏi war tmettin ca aȓ ɣa ẓren ȓmulk n Arebbi."

Siḏna Musa ḏ Siḏna Ilyas tmeḍharen-d ak Siḏiṯneɣ Ƹisa

²⁸ Menbaƹd i wawaȓ nni can ṯmenyam igaƹƹeḏ Ƹisa ɣar uḏrar ḥima aḏ iẓẓaǧ, yuwi akiḏes Buṭrus ḏ Yuḥanna ḏ Yaƹqub.

²⁹ Wami iẓẓuǧ, ibeddeȓ uɣembub nnes iḏweȓ ḏayes nnur, iḏweȓ warruḍ nnes ḏ acemȓaȓ itceƹciƹ.

³⁰ Meḍharen-d ṯnayen n iryazen ssawaȓen akiḏes ijjen ḏ nnabi Musa ijjen ḏ nnabi Ilyas.

³¹ Meḍharen-d ak Ƹisa s yijjen n lƹaḍama ḏ ṯameqqrant, bḏan ssawaȓen akiḏes x wufuɣ nnes iy zi ɣa iffeɣ ḏeɣya zi Lquds.

³² Walakin Buṭrus ḏ yinni akiḏes teṭṭṣen tnuddumen s yiḏes, wami faqen mliḥ ṯumma ufin lƹaḍama n Ƹisa, akiḏes ṯnayen n iryazen bedden.

³³ Wami ƹaḏ gguren zzayes iryazen nni, indeq-d Buṭrus inna-as i Ƹisa: "A Siḏi, ḏ aṣebḥan akiḏec neqqim ḏanita. Neccin a negg ṯȓaṯa n iqiḍan, ijjen i cek, ijjen i Musa, ijjen i Ilyas." Buṭrus tuɣa ifaja, war yufi ca min ɣa yini.

³⁴ Wami netta tuɣaṯ ƹaḏ issawaȓ ihwa-d xasen ij useynu iɣeṭṭa-ṯen ggwḏen.

³⁵ Ṯendeq-d zzayes ijjen n ṯmijja zeg useynu nni ṯenna-asen: "Qa ḏ wanita ḏ Mmi iy ixḍareɣ, ṣennṭeṯ ɣares."

³⁶ Wami ṣafi ṯmijja nni ṯessiweȓ ufin Ƹisa waḥḏes. Imeḥḍaren nni snuffaren manayenni ḏeg wuȓ nsen war xebbaren ḥadd ḏi lʼayamaṯ nni x min ẓrin.

Siḏiṯneɣ Ƹisa isgenfa ijjen n uḥenjir ḏayes jjenn

³⁷ Ṯiwecca nnes hwan-d zeg uḏrar, reḥḥben zzaysen ȓɣaci aṭṭas.

³⁸ Iȓaɣa ijjen n uryaz zi ȓɣaci nni inna: "A Lmuƹallim, tettareɣ zzayec aḏ texzareḏ mmi aqa ḏ wa waha iy ɣari.

³⁹ Memmi ixeṭṭef-iṯ ijjen n jjenn, ḏeɣya isnekkar ṯɣuyyeṯ. Jjen nni iserjiji-ṯ aȓ d ɣa isufeɣ netta kuffu zeg uqemmum nnes, war ḏas irexxu ḥetta aȓ ṯ ɣa isala.

⁴⁰ Ttareɣ zeg imeḥḍaren nnec azzayes sufɣen jjenn-a walakin niṯni war ḏas zemmaren ca."

⁴¹ Yarra xasen Ƹisa inna-asen: "A iwḏan n ȓweqṯ-a iy ḏi war iǧi bu lʼiman, a yinni iffɣen abriḏ! Mecḥaȓ iy kiḏwem ɣa qqimeɣ u mecḥaȓ ḏawem ɣa ṣbareɣ? Awi-yayi-d mmic ḏanita."

⁴² Wami d iqarreb uḥenjir nni ɣar Ƹisa, iserjiji-ṯ jjenn nni iɣḍeȓ-iṯ ɣar ṯmurṯ. Isbedd Ƹisa jjenn nni aƹeffan, isgenfa aḥenjir nni yarri-ṯ i babas.

⁴³ Qqimen yiwḏan nni marra tƹejjben ḏi jjheḏ n Arebbi. Wami tƹejjben marra ḏi qaƹ min igga Ƹisa, ikkar netta inna-asen i imeḥḍaren nnes:

⁴⁴ "Ṣennṭeṯ mliḥ i wawaȓ-a iy ḏawem ɣa iniɣ: Mmis n bnaḏem ƹȓayen aḏ itwasellem ɣar ifassen n yiwḏan."

⁴⁵ Walakin niṯni war fhimen ca i wawaȓ nni, iqseḥ xasen ḥima aḏ fehmen, ggwḏen aṯ sseqsan x min ḏasen inna.

Manwen ig iǧan ḏ ameqqran qaƹ?

⁴⁶ Tmenɣan imeḥḍaren ak wayawya ug iǧan ḏ ameqqran zzaysen.

⁴⁷ Ƹisa issen min ɣarsen ḏeg wuȓawen nsen. Isqarreb-d ɣares ij uḥenjir ḏ amezyan, isbedd-iṯ zzaṯes.

⁴⁸ Inna-asen: "Wenni ɣa iqebȓen can uḥenjir am wanita ƹlaḥsab isem inu, axmi ḏ nec ig iqbeȓ. Wenni ḏayi iqebbȓen, ataf iqbeȓ wenni ḏayi d issekken. Minzi wenni iǧan zzaywem ḏ amezyan qaƹ, ḏ netta ig iǧan ḏ ameqqran."

⁴⁹ Inna-as Yuḥanna: "A Lmuƹallim, qa neẓra ijjen isufuɣ jnun ƹlaḥsab isem nnec. Neccin nerzu aṯ nesbedd wami war iǧi ca ḏ ameḥḍar akiḏneɣ."

⁵⁰ Inna-as Ƹisa: "War ṯ sbeddam ca. Minzi yinni war iǧin ca ḍed nwem, aqaṯen akiḏwem."

Ijjen n dcar ḏi Samarya war iqebbeȓ ca Siḏiṯneɣ Ƹisa

⁵¹ Ƹisa wami d tuweḍ ȓweqṯ nnes iy ḏi ɣa itwarfeƹ ɣar ujenna, ikkar iwejjeh aɣembub nnes bac aḏ iraḥ ɣar ṯendint n Lquds.

⁵² Issekk arrusul qbeȓ ma aḏ iraḥ netta, ruḥen niṯni uḏfen ɣar yijjen n dcar ḏi ṯmurṯ n Ayṯ-Samarya ḥima aḏas swejḏen amcan.

⁵³ Walakin iwḏan n dcar nni war ṯ qbiȓen ca minzi ssnen itraḥ illa ɣar Lquds.

⁵⁴ Imeḥḍaren nnes Yaƹqub ḏ Yuḥanna wami ufin manayenni nnan-as i Ƹisa: "A Siḏi, ma ṯexseḏ a nȓaɣa i ṯmessi aḏ tehwa zeg ujenna ḥima aṯen ṯecc?"

⁵⁵ Indeq-d Ƹisa inha-ṯen inna-asen lla.

⁵⁶ Ṣafi kkaren ruḥen ɣar yijjen n dcar nneɣni.

Yinni ixsen aḏ ḏfaren Siḏiṯneɣ Ƹisa

⁵⁷ Wami gguren x ubriḏ, yusa-d ijjen inna-as i Ƹisa: "Nec ac ḏfareɣ mani ma ṯruḥeḏ."

⁵⁸ Inna-as Ƹisa: "Uccanen ɣarsen ifran nsen, ijḍaḍ ɣarsen ȓaƹwac nsen, walakin Mmis n bnaḏem war ɣares uȓa ḏ mani ɣa isummeṯ azeǧif nnes."

⁵⁹ Inna-as Ƹisa i yijjen nneɣni: "Ḏfar-ayi-d!" Inna-as wenni: "A Siḏi, sameḥ-ayi ḏ amezwaru aḏ raḥeɣ aḏ neḍȓeɣ baba."

⁶⁰ Inna-as Ƹisa: "Yinni immuṯen ejj-iṯen aḏ neḍȓen imettinen nsen. Cek arwaḥ aḏ tbeccareḏ s ȓmulk n Arebbi."

⁶¹ Yusa-d ijjen nneɣni inna-as i Ƹisa: "Acek ḏfareɣ a Siḏi, walakin ḏ amezwaru ejj-ayi aḏ msafaḍeɣ x familya inu."

⁶² Inna-as Ƹisa: "Wenni isersen fus nnes x usɣar ƹaḏ ixezzar ɣar ḏeffar ataf war iṣeǧeḥ ca aḏ ixḏem ḏi ȓmulk n Arebbi."