Luqa 8 - Ṯarifiṯ 2020

Ȓmaƹna n wenni izerrƹen

¹ Menbaƹd i manaya iggur Ƹisa zi dcar ɣar dcar zeg ubilaj ɣar ubilaj itḥeddaṯ itbeccar s ȓmulk n Arebbi. Akiḏes ṯenƹac n imeḥḍaren nnes

² ḏ can ṯemɣarin isgenfa-ṯent zi jnun ḏ ȓehȓacaṯ. Niṯenti ḏ Maryam umi qqaren ṯamagdaliṯ iy zi ffɣen sebƹa n jnun,

³ ḏ Ayunna ṯamɣarṯ n Xuzi lwakil n Hirudus, ḏ Suzana, ḏ ṯinneḍni aṭṭas iy tƹawanent s wagȓa nsent.

⁴ Wami xas d munen ƹaweḏ aṭṭas n ȓɣaci ḏ yinni ɣares d yusin zi mkuȓ abilaj, ibḏa issawaȓ akiḏsen s yijjen n ȓmaƹna inna:

⁵ "Iffeɣ ufeǧaḥ aḏ izreƹ. Wami izerreƹ, ṯewḍa-yas can zzarriƹeṯ x ṭṭarf n ubriḏ. Ƹeffsen xas yiwḏan ccin-teṯ ijḍaḍ n ujenna.

⁶ Can zzarriƹeṯ ṯewḍa-yas jar yizra. Ṯeɣmi-d, ȓexddenni ṯnezȓef ṯisraw ȓaḥeqqac war ṯeswi bu waman.

⁷ Can zzarriƹeṯ ṯewḍa jar isennanen. Ɣmin-d akiḏes isennanen nni jeyyfen-teṯ.

⁸ Can zzarriƹeṯ ṯewḍa x ṯmurṯ ṯaṣebḥant. Ṯuȓi-d ṯemɣar ṯegga ṯiyḏerin, kuȓ icten ṯurew miyya." Wami ikemmeȓ wawaȓ-a inna s jjheḏ: "Ṣenneṭ mliḥ a wenni itsȓan."

Asefhem n ȓmaƹna n wenni izerrƹen

⁹ Sseqsan-ṯ imeḥḍaren nnes nnan-as: "Min ixes aḏ yini ȓmaƹna-ya?"

¹⁰ Inna-asen: "Itwasmeḥ i kenniw aḏ tessnem min inuffaren ḏi ȓmulk n Arebbi, walakin i yiwḏan nneɣni lla. Ssawaȓeɣ akiḏsen s ȓemƹani ḥima aḏ xzaren walakin war twiȓin ca, ḥima aḏ sȓen walakin war fehhmen i ca.

¹¹ Ȓmaƹna-ya ixes aḏ yini: Zzarriƹeṯ nni nettaṯ ḏ awaȓ n Arebbi.

¹² Zzarriƹeṯ nni ig iwḍan x ubriḏ nettaṯ am yiwḏan iy tesȓan i wawaȓ n Arebbi. Itraḥ Ibȓis itekkes-asen-ṯ zeg wuȓ ḥima war timnen ca, war nejjmen ca.

¹³ Zzarriƹeṯ nni ig iwḍan jar yizra nettaṯ am yiwḏan iy tesȓan i wawaȓ n Arebbi, qebȓen-ṯ s ȓefraḥeṯ. Wami war uwṯin bu iẓewran mliḥ ḏeɣya tneqȓaƹen. Tamnen zzayes ɣir ḏeg yijjen n ȓweqṯ waha, ḏi ȓweqṯ n ȓemḥayen ḏeɣya teffɣen abriḏ.

¹⁴ Zzarriƹeṯ nni ig iwḍan jar isennanen nettaṯ am yiwḏan iy tesȓan i wawaȓ n Arebbi, walakin ḏeɣya temjeyyafen s umnus ḏ wagȓa ḏ ccehawaṯ n ddunect-a war neffƹen ca.

¹⁵ Walakin zzarriƹeṯ nni ig iwḍan ḏi ṯmurṯ ṯaṣebḥant nettaṯ am yiwḏan iy tesȓan i wawaȓ n Arebbi qebȓen-ṯ s wuȓ nsen aṣebḥan ḏ acemȓaȓ, ṣebbaren ḥima aḏ arwen.

Ȓmaƹna n ȓqendiȓ

¹⁶ Uȓa ḏ ijjen war itcaƹƹiȓ ȓqendiȓ ḥima axas iqȓeb aqnuc niɣ aṯ igg swadday i qama. Lla, itegg-iṯ x ȓmarfaƹ ḥima aḏasen yuc ṯfawṯ i yinni iy d ɣa yaḏfen.

¹⁷ Marra min inuffaren aḏ d imeḍhar. Marra min itwasnuffaren aḏ inefḍeḥ aḏ itwassen.

¹⁸ Arrem-d ȓbaȓ nwem i mammec tesȓam. Wenni iǧan ɣares itmarni-yas. Walakin wenni war ɣar iǧi ca, itwaksi-yas uȓa ḏ min ḏas itɣir ɣares."

Siḏiṯneɣ Ƹisa ḏ yemmas ḏ ayṯmas

¹⁹ Ƹisa ṯusa-d ɣares yemmas ḏ ayṯmas, war zemmaren ca aɣares awḍen, ḏinni aṭṭas n ȓɣaci.

²⁰ Nedqen-d can yiwḏan nnan-as: "Aqa yemmac ḏ ayṯmac bedden ɣar barra rezzun acek ẓren."

²¹ Yarra xasen inna-asen: "Aqa yemma ḏ ayṯma niṯni ḏ iwḏan nni itsȓan i wawaȓ n Arebbi xeddmen zzayes."

Siḏiṯneɣ Ƹisa isbedda arriḥ ḏi ȓebḥar

²² Ijjen n nhar inya Ƹisa ḏi ṯɣarrabut ak imeḥḍaren nnes inna-asen: "Yallah a neẓwam ɣar ujemmaḍ-in n ȓebḥar." Ruḥen,

²³ wami uyuren ḏi ȓebḥar, Ƹisa ikka xas yiḍeṣ. Ƹlaɣafla ikkar-d ijjen n arriḥ ijheḏ aṭṭas ḏi ȓebḥar, ṯebḏa ṯɣarrabut tƹemmar s waman uwḍen-d ḏeg yijjen n lxaṭar.

²⁴ Qarrben ɣares imeḥḍaren sfaqen-ṯ nnan-as: "A Lmuƹallim a Lmuƹallim, aqa neccin netmetta!" Ikkar Ƹisa isbedd arriḥ ḏ ȓemwaj ihedden ȓḥaȓ irsa.

²⁵ Inna-asen: "Mani iǧa lʼiman nwem?" Ggwḏen tƹejjben nnan i wayawya: "Min iƹna wanitan? Uȓa ḏ arriḥ ḏ waman n ȓebḥar itʼamar-iṯen tṭaƹan-as."

Ijjen ḏayes jnun ḏi ṯmurṯ n ijariṯiyen

²⁶ Uwḍen ɣar ṯmurṯ n ijariṯiyen zzaṯ i ṯmurṯ n Ljalil.

²⁷ Wami yuweḍ Ƹisa ɣar ȓbarr iȓqa-ṯ-iḏ ijjen n bnaḏem zi ṯendint ḏayes jnun. Netta aṭṭas zeg wami war yarreḍ bu warruḍ war izeddeɣ ca ḏi ṯeddarṯ, izeddeɣ ḏeg imeḍȓan.

²⁸ Wami yufa Ƹisa ḏinni ibḏa isnekkar ṯɣuyyeṯ, iwḍa ɣar iḍaren n Ƹisa indeq-d s yijjen n ṯmijja ṯuƹȓa inna-as: "A Ƹisa a Mmis n Arebbi Yuƹȓan, min ṯexseḏ zzayi? Tettareɣ zzayek ḥima war ḏayi tƹeddibeḏ ca!"

²⁹ Inna manaya minzi Ƹisa tuɣa yumar jjenn nni aƹeffan ḥima aḏ iffeɣ zeg uryaz nni. Ƹaweḏ minzi jjenn nni iteṭṭef-iṯ aṭṭas n ṯwaȓaṯin. Waxxa teqqnen-as ifassen ḏ iḍaren nnes s snaseȓ ḥeṭṭan-ṯ, itrezza-ṯent indeh-iṯ jjenn nni ɣar ȓexȓa.

³⁰ Isseqsa-ṯ Ƹisa inna-as: "Mammec ḏac qqaren?" Inna-as: "Nec qqaren-ayi Aberru" minzi tuɣa uḏfen ḏayes aṭṭas n jnun.

³¹ Ḥeccmen-ṯ aṭṭas jnun nni ḥima war ṯen itsekki ca ɣar wanu bȓa ȓaḥedd.

³² Ḏinni ijjen n ṯḥimerṯ ḏ ṯameqqrant n yiȓfan ṯarwes x uḏrar. Ttaren zzayes ḥima aṯen ijj aḏayes aḏfen. Ssenni ijji-ṯen.

³³ Ffɣen jnun zi bnaḏem nni uḏfen ḏeg yiȓfan. Ṯehwa ṯḥimerṯ nni x uḏrar ɣar ȓebḥar ṯeɣreq ḏinni.

³⁴ Yinni yarewwsen, ẓrin min iweqƹen arewȓen sufɣen ȓexbar ḏi ṯendint ḏ ȓedcuraṯ.

³⁵ Ffɣen-d yiwḏan ḥima aḏ ẓren min iweqƹen. Usin-d ɣar Ƹisa ufin aryaz nni ffɣen zzayes jnun, iqqim ɣar iḍaren n Ƹisa yareḍ arruḍ nnes igenfa iḏweȓ s ȓaƹqeȓ nnes. Uca ggwḏen aṭṭas.

³⁶ Xebbaren-ṯen ȓechuḏ mammec igga Ƹisa isgenfa aryaz nni iy ḏi tuɣa ǧan jnun.

³⁷ Uca ttaren zi Ƹisa marra ayṯbab n jjiheṯ n ijariṯiyen ḥima axasen ibeƹƹeḏ minzi ggwḏen aṭṭas. Inya ḏi ṯɣarrabut iƹqeb ssenni.

³⁸ Aryaz nni iy zi ffɣen jnun ittar zi Ƹisa ḥima akiḏes iraḥ. Walakin Ƹisa yugi issekk-iṯ inna-as:

³⁹ "Ƹqeb ɣar ṯeddarṯ nnec, sxebbar-iṯen s min ḏac igga Arebbi." Iruḥ uryaz nni ibḏa itxebbar ḏi ṯendint ṯekmaȓ zi min ḏas igga Ƹisa.

Siḏiṯneɣ Ƹisa isgenfa yeǧis n Yagrus

⁴⁰ Wami d iḏweȓ Ƹisa, reḥḥben zzayes ȓɣaci minzi marra iḏsen trajan-ṯ.

⁴¹ Yusa-d ɣares ijjen n uryaz qqaren-as Yagrus. Netta ḏ arrayes n ṯemziḏa iy iǧan ḏinni. Iwḍa ɣar iḍaren n Ƹisa ibḏa itḥeccam-iṯ aṭṭas ḥima akiḏes iraḥ ɣar ṯeddarṯ nnes

⁴² minzi ɣares ɣir ijjen n ṯḥenjirṯ waha ƹȓayen aḏ tegg ṯenƹac iseggwusa, tmetta. Ikkar Ƹisa iruḥ, temzaḥamen xas ȓɣaci.

⁴³ Ḏinni jar yiwḏan nni ijjen n ṯemɣarṯ ṯenƹac iseggwusa zeg wami iy ṯehȓec, tazzeȓ s iḏammen. Marra min ɣares ḏ agȓa ṯḍeyyeƹ-iṯ x iḍbiben, war izemmar ḥadd at isgenfa.

⁴⁴ Ṯeḏfar Ƹisa, ṯḥaḏa-yas ṭṭarf n useȓham nnes ȓexddenni ṯgenfa ḏeg umcan.

⁴⁵ Inna Ƹisa: "Wi ḏayi iḥaḏan?" Marra iḏsen nkaren. Inna-as Buṭrus: "A Lmuƹallim, qa marra yiwḏan-a temzaḥamen xac!"

⁴⁶ Inna Ƹisa: "Lla, sḥisseɣ can yijjen iḥaḏa-ayi minzi ssneɣ jjheḏ iffeɣ zzayi."

⁴⁷ Wami ṯufa ṯemɣarṯ nni ṯnefḍeḥ, ṯruḥ ɣar Ƹisa terjiji ṯewḍa-yas ɣar iḍaren nnes. Ṯƹaweḏ-as zzaṯ i marra iwḏan nni mayemmi iy ṯ ṯḥaḏa ḏ mammec ṯgenfa ḏeg umcan.

⁴⁸ Inna-as Ƹisa: "A yeǧi, cem lʼiman nnem isgenfa-cem. Ruḥ ḏi ȓehna."

⁴⁹ Wami ƹaḏ issawaȓ, yusa-d ijjen zi ṯeddarṯ n arrayes nni n ṯemziḏa inna-as: "Yeǧic cek ṯemmuṯ. War tƹeddab ca ȓexxu lmuƹallim."

⁵⁰ Isȓa-yas Ƹisa inna-as: "War teggweḏ ca! Amen waha, aqa yeǧic aḏ tgenfa."

⁵¹ Wami yuweḍ ɣar ṯeddarṯ n Yagrus, war ijji uȓa ḏ ijjen aḏ yaḏef illa Buṭrus ḏ Yuḥanna ḏ Yaƹqub ḏ babas d yemmas n ṯḥenjirṯ nni.

⁵² Marra trun xas tƹezzan. Inna-asen Ƹisa: "War xas trum ca. Aqa ṯaḥenjirṯ-a war ṯemmuṯ ca, ṯeṭṭeṣ waha!"

⁵³ Bḏan ḍeḥḥcen xas qa ssnen belli ṯemmuṯ.

⁵⁴ Iṭṭef-as ḏeg ufus i ṯḥenjirṯ nni inna-as: "A ṯaḥenjirṯ kkar."

⁵⁵ Ȓexddenni buḥbeȓ nnes iḏweȓ-as-d, ṯekkar ḏeg umcan. Iweṣṣa-ṯen aḏas ucen min ɣa ṯecc.

⁵⁶ Babas ḏ yemmas qqimen tƹejjben. Netta iweṣṣa-ṯen inna-asen war tƹawaḏem i ḥadd min iweqƹen.