Luqa 5 - Ṯarifiṯ 2020

Siḏiṯneɣ Ƹisa itȓaɣa-d i imeḥḍaren nnes imezwura

¹ Ijjen n nhar ibedd Ƹisa ɣar ȓebḥar n Ganisarat, mzaḥamen xas ȓɣaci bac aḏ sȓen i wawaȓ n Arebbi.

² Yufa ṯnayen n ṯɣarruba beddent x ṭṭarf n ȓebḥar. Tuɣa hwan-d zzaysent iḥeǧaqen n iseȓman bac aḏ ƹeḏȓen ṯiracciwin nsen.

³ Inya Ƹisa ḏeg yicten zi ṯɣarruba nni ṯenni iy iǧan n Simƹan, iṭaleb zzayes aḏ yuyur cwayt x ȓbarr u netta iqqim ḏayes ibḏa iseȓmaḏ ȓɣaci zi ṯɣarrabut nni.

⁴ Wami ikemmeȓ awaȓ nni inna-as i Simƹan: "Ndeh ṯaɣarrabut nnec ɣar mani uǧɣen waman ḍȓeq ṯiracciwin ḥima aḏ tḥeǧqeḏ iseȓman."

⁵ Inna-as Simƹan: "A Lmuƹallim, neccin ǧiȓeṯ ṯekmaȓ nxeddem war d nsiȓi uȓa ḏ ijjen n usȓem, walakin wami t ṯenniḏ cek aḏ ḍeȓqeɣ ṯiracciwin."

⁶ Wami ggin ammu siȓin-d aṭṭas n iseȓman, ṯiracciwin nsen ƹȓayen aḏ qqarṣent.

⁷ Ceyyaren imeddukaȓ nsen ḏi ṯɣarrabut nni nneɣni ḥima aḏ d asen aṯen ƹawnen. Usin-d ƹemmaren ṯnayen n ṯɣarruba nsen aȓ wami ƹȓayen aḏ ɣerqent.

⁸ Simƹan Buṭrus wami iẓra manaya yusa-d iwḍa ɣar iḍaren n Ƹisa inna-as: "A Siḏi, beƹƹeḏ xafi nec ḏ lƹaṣi."

⁹ Iḏhec netta ḏ yinni akiḏes marra ȓaḥeqqac ḥeǧqen-d aṭṭas n iseȓman.

¹⁰ Ƹaweḏ iḏhec uȓa ḏ Yaƹqub ḏ Yuḥanna ṯarwa n Zabadi niṯni ḏ imeddukaȓ n Simƹan. Inna-as Ƹisa i Simƹan: "War teggweḏ ca, cek ssa aȓ ṯsawent ataf aḏ tḥeǧqeḏ iwḏan."

¹¹ Wami d ḏewȓen s ṯɣarruba ɣar ȓbarr semḥen ḏi marra min ɣarsen ḏfaren Ƹisa.

Siḏiṯneɣ Ƹisa isgenfa ijjen ḏayes jḏam

¹² Wami Ƹisa aqaṯ ḏeg yijjen n ṯendint, yusa-d ijjen n uryaz ḏayes jḏam aṭṭas. Iẓra Ƹisa iwḍa-yas ɣar iḍaren ittar-as inna-as: "A Siḏi, cek meȓa ṯexseḏ ṯzemmareḏ aḏayi ṯessiṣfiḏ."

¹³ Iqarreb ɣares Ƹisa iḥaḏa-ṯ s ufus nnes inna-as: "Wah nec xseɣ, cek qa ṯgenfiḏ!" Ṣafi ḏeg umcan iruḥ-as jḏam nni.

¹⁴ Iweṣṣa-ṯ inna-as: "War txebbar ḥadd. Inna-as: "Ruḥ ɣar ȓefqi seḍhar-as ixef nnec. Egg ṣṣeḏqeṯ nni iy zi iweṣṣa Musa ḥima aɣarsen ṯiȓi chaḏeṯ x min iweqƹen."

¹⁵ Walakin ssenni ibḏa itentacar xas ȓexbar ktar ƹaḏ. Usin-d ɣares aṭṭas n ȓɣaci ḥima aḏas sȓen ḥima aḏ genfan zi ȓehȓacaṯ nsen.

¹⁶ Netta tuɣa itraḥ ɣar imucan ig ixȓan ḥima aḏ iẓẓaǧ ḏinni.

Siḏiṯneɣ Ƹisa isgenfa ijjen n unecruf

¹⁷ Ijjen n nhar tuɣa Ƹisa iseȓmaḏ iwḏan. Qqimen ḏinni jarasen ȓebƹaḍ zi ȓḥizeb n ifarrisiyen ḏ imseȓmaḏen n ccariƹa, usin-d zi marra ȓedcuraṯ n Ljalil ḏ Yahuḏiya ḏ Lquds. Jjheḏ n Siḏi Arebbi aqaṯ ak Ƹisa bac aḏ isgenfa imehȓac.

¹⁸ Usin-d can yiwḏan ysin ijjen n uryaz izzeȓ ḏi ṯassuṯ nnes mmuṯen-as iḍaren. Rezzun mammec ɣa ggen aṯ siḏfen aṯ sersen zzaṯes.

¹⁹ Wami ufin war zemmaren aṯ siḏfen minzi ḏinni aṭṭas n ȓɣaci, gaƹƹḏen zzayes ɣar ṯzeqqa qeȓƹen ijjen n umcan ḏi ssqef sehwan-ṯ-id x ṯassuṯ nnes ɣar ȓwesṭ zzaṯ i iḍaren n Ƹisa.

²⁰ Netta wami iẓra lʼiman nsen inna-as i unecruf nni: "Ay aryaz, twaɣfarent-ac ȓmuƹṣiyaṯ nnec."

²¹ Bḏan imseȓmaḏen n ccariƹa ḏ ȓḥizeb n ifarrisiyen tfekkaren nnan ḏeg wuȓawen nsen: "Min iƹna wanita itarra ixef nnes ḏ Arebbi? Ȓmuƹṣiyaṯ war ṯent iɣfar ca illa Arebbi waḥḏes!"

²² Ƹisa issen min nwan inna-asen: "Mayemmi tfekkarem ammu kenniw ḏi ȓaƹquȓaṯ nwem?

²³ Min isehȓen aṭṭas aḏas iniɣ i unecruf-a, ma aḏas iniɣ: Twaɣfarent-ac ȓmuƹṣiyaṯ nnec? Niɣ ma aḏas iniɣ: Kkar cek uyur?

²⁴ Nec xseɣ aḏ tessnem Mmis n bnaḏem ɣares ssulṭa x ṯmurṯ ḥima aḏ iɣfar ȓmuƹṣiyaṯ." Uca inna-as Ƹisa i unecruf nni: "Aḏac iniɣ, bedd x iḍaren nnec ysi ṯassuṯ nnec ruḥ aḏ trewwḥeḏ ɣar ṯeddarṯ nnec!"

²⁵ Ȓexddenni ikkar unecruf nni zzaṯsen iysi min tuɣa xef izzeȓ, irewweḥ iḥemmeḏ Arebbi.

²⁶ Marra ḏehcen ḏi manaya ḥemmḏen Arebbi, ggwḏen aṭṭas nnan: "Nhara neẓra ṯimesȓayin seḏhacent aṭṭas!"

Siḏiṯneɣ Ƹisa itȓaɣa-d i Lawi

²⁷ Menbaƹd iruḥ Ƹisa yufa ijjen ijemmeƹ ḍḍariba qqaren-as Lawi, iqqim ḏeg umcan mani jemmƹen ḍḍariba. Inna-as Ƹisa: "Ḏfar-ayi-d."

²⁸ Uca ikkar Lawi ismeḥ ḏi marra iḏfar-iṯ.

²⁹ Igga-as Lawi ijjen n zarrdeṯ ḏ ṯameqqrant ḏi ṯeddarṯ nnes. Ḥḍaren akiḏsen aṭṭas n iƹeccaren ḏ inneɣni iy qqimen akiḏsen aḏ ccen.

³⁰ Ceṯcan zzayes ȓḥizeb n ifarrisiyen ḏ imseȓmaḏen n ccariƹa nnan-asen i imeḥḍaren nnes: "Mayemmi tettem ṯsessem ak iƹeccaren ḏ yinni iƹeṣṣan?"

³¹ Yarra xasen Ƹisa inna-asen: "Iwḏan iṣeḥḥan war teḥḏijin bu uḍbib, aḍbib teḥḏajan-ṯ imehȓac."

³² Inna-asen: "Nec war d usiɣ ca aḏ ȓaɣiɣ i yinni iǧan nican ḥima aḏ tuben, usiɣ-d ɣar yinni iƹeṣṣan."

³³ Nnan-as: "Mayemmi imeḥḍaren n Yaḥya ḏ imeḥḍaren n ȓḥizeb n ifarrisiyen tẓumman tẓaǧan aṭṭas, imeḥḍaren nnec tetten sessen waha?"

³⁴ Inna-asen Ƹisa: "Kenniw ma tejjem imeddukaȓ n muȓay aḏ ẓummen ḏi ȓfarḥ nnes?"

³⁵ Inna-asen: "Lla, walakin ƹaḏ aḏ d asen wussan aḏ imeysi muȓay zi ȓwesṭ nsen, ȓexddenni aḏ ẓummen ḏeg wussan nni."

³⁶ Issiweȓ ƹaweḏ akiḏsen s ȓmaƹna-ya: "War iǧi ḥadd iteqssas-d ṯareqqiƹṯ zeg warruḍ n jḏiḏ ḥima s ṯreqqiƹṯ nni azzayes ireqqeƹ arruḍ ḏ ȓbaȓi. Mayemmi? Arruḍ ḏ jḏiḏ aḏ iqqim itcerrag waha, wenni n ȓbaȓi war xas d tis ṯreqqiƹṯ nni n jḏiḏ.

³⁷ Uȓa ḏ aman n uḍiȓ ḏ jḏiḏ war xeǧqen ca ḏeg yiȓemawen iqḏimen, ḥima war dduqquzen war tzeǧiƹen ca waman n uḍiȓ aḏ ḍeyyƹen yiȓemawen nni.

³⁸ Walakin aman n uḍiȓ ḏ jḏiḏ xeǧqen ḏeg yiȓemawen ḏ jḏiḏ.

³⁹ Meȓa iswa can ijjen aman uḍiȓ iqḏimen, ataf war itexs ca yinni ḏ jḏiḏ minzi iqqar qa yinni iqḏimen ḏ iṣebḥanen."