Luqa 23 - Ṯarifiṯ 2020

Tawin Siḏiṯneɣ Ƹisa ɣar lḥakem Bilaṭus

¹ Kkaren marra iḏsen uwin Ƹisa aṯ sellmen i lḥakem Bilaṭus.

² Bḏan ttahmen-ṯ nnan: "Nufi-ṯ itegg lbelbala ḏi ccaƹb. Iqqar-asen war ticceṯ bu ḍḍariba i uzeǧiḏ Qayṣar. Netta iḥesseb ixef nnes ḏ Lmasiḥ iƹni ḏ ijjen n uzeǧiḏ."

³ Isseqsa-ṯ Bilaṭus inna-as: "Ma ḏ cek ḏ azeǧiḏ n Ayṯ-Israʼil?" Inna-as Ƹisa: "Aqa ṯenniḏ-t cek."

⁴ Inna-asen Bilaṭus i arruyas n ȓfuqaha ḏ ȓɣaci nni: "War xas tifeɣ bu can ttuhmeṯ x uṯarras-a."

⁵ Walakin niṯni zeyyaren xas aṭṭas nnan-as: "Itegg ȓfitna ḏi marra ṯamurṯ n Yahuḏiya s useȓmeḏ nnes. Ibḏa ḏi ṯmurṯ n Ljalil, ȓexxu aqaṯ ḏa."

⁶ Wami isȓa Bilaṭus belli nnan Ljalil, inna-asen: "Ma aryaz-a zi ṯmurṯ n Ljalil?"

⁷ Wami issen belli Ƹisa zi ṯmurṯ nni mani iteḥkam Hirudus, ikkar issekk-iṯ ɣar Hirudus iǧan netta s yixef nnes ḏi ṯendint n Lquds ḏi ȓweqṯ nni.

Tawin Siḏiṯneɣ Ƹisa ɣar uzeǧiḏ Hirudus

⁸ Wami iẓra Hirudus Ƹisa ifareḥ aṭṭas. Tuɣa ixes aṯ iẓer aṭṭas zeg wami. Wami xas isȓa itmenna aḏ igg Ƹisa can lmuƹjiza zzaṯes.

⁹ Isseqsa-ṯ aṭṭas walakin Ƹisa war xas d yarri ca qaƹ.

¹⁰ Arruyas n ȓfuqaha ḏ imseȓmaḏen n ccariƹa bedden ḏinni tahamen-ṯ aṭṭas.

¹¹ Iḥeggar-iṯ Hirudus ḏ ȓƹaskar nnes ḍeḥḥcen xas. Igga xas aseȓham ḏ aṣebḥan, yarr-iṯ ɣar Bilaṭus.

¹² Qbeȓ, Bilaṭus ḏ Hirudus tuɣa ḏin lƹadawa jarasen walakin ȓexxu ḏewȓen ḏ imeddukaȓ ḏi nhar nni.

Lḥakem Bilaṭus irezzu aḏas d iḍȓeq i Siḏiṯneɣ Ƹisa

¹³ Iȓaɣa-d Bilaṭus x arruyas n ȓfuqaha ḏ lḥukkam n Ayṯ-Israʼil ḏ marra ccaƹb.

¹⁴ Inna-asen: "Kenniw ṯuwim-ayi-d bnaḏem-a ṯennim-ayi qa itegg ȓfitna jar yiwḏan. Nec xemmmeɣ ḏi ṯmesȓayṯ-a zzaṯwem. War ḏayes ufiɣ ḏeg uṯarras-a bu can ttuhmeṯ ƹlaḥsab min ṯeqqarem kenniw.

¹⁵ Uȓa ḏ Hirudus war ḏayes yufi walu minzi yarra-aneɣ-ṯ-id. Xzareṯ, Ƹisa-ya war iggi min xef isḏaheǧ ȓmewṯ.

^16-17 Aḏas uceɣ aƹmuḏ aḏas d ḍeȓqeɣ."

¹⁸ Isnekkar ṯɣuyyeṯ marra ccaƹb nnan-as: "Ysi xaneɣ wanita, ḍȓeq-aneɣ-d i Barabas."

¹⁹ Barabas-a tuɣa ggin-ṯ ḏi ȓeḥbes ƹlaḥsab ijjen n ȓfawḍa ṯewqeƹ ḏi ṯendint, ƹaweḏ ƹlaḥsab ijjen n ljarima n ȓmewṯ.

²⁰ Bilaṭus ixes aḏ d iḍȓeq i Ƹisa, issiweȓ ak ccaƹb ṯwaȓa nneɣni.

²¹ Niṯni snekkaren ṯɣuyyeṯ nnan-as: "Ṣelleb-iṯ! Ṣelleb-iṯ!"

²² Issiweȓ akiḏsen wis ṯeȓt-marraṯ inna-asen: "Mayemmi? Man ljarima ig igga wanita? Nec war ḏayes ufiɣ bu can ttuhmeṯ iy xef ɣa isḏaheǧ ȓmewṯ. Nec aḏas uceɣ aƹmuḏ aḏas d ḍeȓqeɣ."

²³ Niṯni snekkaren ṯɣuyyeṯ s jjheḏ ḥima aṯ iṣelleb, ṣafi ṯɣuyyeṯ nsen ṯeqȓeb-as array.

²⁴ Ikkar Bilaṭus iḥkem s min xsen niṯni.

²⁵ Iḍȓeq-d i wenni iǧan ḏi ȓeḥbes x ssabab n ȓfawḍa ḏ ljarima n ȓmewṯ, isellem-asen Ƹisa ḥima aḏas ggen min xsen.

Tawin Siḏiṯneɣ Ƹisa aṯ ṣellben

²⁶ Wami uwin Ƹisa aṯ ṣellben, ṭṭfen ijjen n uryaz zi ṯendint n Lqurina qqaren-as Simƹan, aryaz-a ikka-d zi ȓkampu iƹḏu-d ssenni. Sarbun-as ȓƹaskar ṣṣalib ḥima aṯ yarbu aḏ iḏfar Ƹisa.

²⁷ Ḏfaren-ṯ aṭṭas n ȓɣaci, ṯimɣarin ḥeznent trunt xas.

²⁸ Ineqȓeb-d ɣarsent Ƹisa inna-asent: "Ay yessis n Lquds war xafi trunt ca, runt x yixef nkent ḏ ṯarwa nkent.

²⁹ Aḏ d tas ijjen n ȓweqṯ aḏayes inin: Ssaƹḏ nsent n ṯinni war izemmaren ca aḏ arwent ḏ ṯinni ƹemmarṣ war uriwent ca ḏ ṯinni ƹemmarṣ war ssuṭḍent ca.

³⁰ Aḏ bḏan aḏ inin i iḏurar wḍam-d xaneɣ, aḏ inin i ṯeƹrurin qbarent-id xaneɣ.

³¹ Meȓa iwḏan-a yina ggin manaya i ṯcejjarṯ ḏ ṯazeyzawṯ, min ḏas ɣa iweqƹen xmi ɣa ṯazeɣ?"

³² Ƹaweḏ uwin-d ṯnayen nneɣni ḏ lmujrimin ḥima akiḏes twanɣen.

Irumaniyen tṣellaben Siḏiṯneɣ Ƹisa x ṣṣalib

³³ Wami uwḍen ɣar umcan nni umi qqaren Jumjuma, ṣellben-ṯ ḏinni ak ṯnayen nni n lmujrimin, ijjen x ufusi ijjen x uẓeȓmaḍ.

³⁴ Inna Ƹisa: "A Baba, ɣfar iwḏan-a qa war ssinen ca min teggen." Ȓƹaskar nni ggin lqurƹa x warruḍ nnes ḥima kuȓ ijjen min ɣa iysi.

³⁵ Iwḏan bedden ḏinni xezzaren ḏayes, arruyas tbuṣaren xas qqaren: "Meȓa ḏ ṣṣaḥ netta ḏ Lmasiḥ iy ixḍar Arebbi ataf aḏ isenjem ixef nnes minzi isenjem inneɣni."

³⁶ Ƹaweḏ uȓa ḏ ȓƹaskar ḍeḥḥcen xas, qarrben ɣares ucin-as aman uḍiȓ ḏ isemmamen.

³⁷ Nnan-as: "Meȓa cek ḏ azeǧiḏ n Ayṯ-Israʼil senjem ixef nnec."

³⁸ Ɣar uzeǧif nnes ggin-as ijjen n ṯeȓwiḥet ṯura ḏayes: Wanita ḏ azeǧiḏ n Ayṯ-Israʼil.

³⁹ Ijjen zi lmujrimin nni iy kiḏes ṣellben ibḏa itzawar-iṯ iqqar-as: "Cek ma ḏ Lmasiḥ ma lla? Yallah, nejja ixef nnec nejja-yaneɣ."

⁴⁰ Inha-ṯ wenni nneɣni inna-as: "Cek ma war teggwiḏeḏ ca Arebbi? Qa ḥekkmen xak amecnaw netta.

⁴¹ Neccin ḥekkmen xaneɣ nican, nesḏaheǧ lḥukem-a ƹlaḥsab min negga. Walakin aryaz-a war iggi ca minxef."

⁴² Ȓexddenni inna-as: "Ƹqeȓ xafi a Ƹisa xmi d ɣa ṯaseḏ ɣar ȓmulk nnec."

⁴³ Indeq-d Ƹisa inna-as: "Aqa tesȓiḏ ȓḥaqq: Nhara aḏ tiȓiḏ akiḏi ḏi jjenneṯ."

Siḏiṯneɣ Ƹisa immuṯ x ṣṣalib

⁴⁴ Ɣar ṯenƹac n uziȓ, ṯehwa-d ṯaǧest x ṯmurṯ amen-ṯekmaȓ aȓ wami ḏ ṯȓaṯa uƹecci.

⁴⁵ Ṯfuct ṯruḥ-as ṯfawṯ nnes, iqqarṣ arrwaq n ṯemziḏa ṯameqqrant x ṯnayen.

⁴⁶ Iȓaɣa Ƹisa s yijjen n ṯmijja ṯejheḏ inna: "A Baba, nec buḥbeȓ inu sellmeɣ-ac-ṯ ḏeg ifassen nnec." Wami inna manaya yarra nnefs ṣafi immuṯ.

⁴⁷ Aƹaskari nni ameqqran n arrumanus iy iǧan ḏinni wami iẓra min iweqƹen ibḏa isemɣar Arebbi inna: "Aṯarras-a ḏ ṣṣaḥ bariʼ iy iǧa."

⁴⁸ Marra iwḏan iy ḏinni imunen wami ẓrin min iweqƹen, trewwaḥen-d ccaṯen ḏeg wuȓawen nsen.

⁴⁹ Marra imƹacaren nnes ḏ ṯemɣarin iy ṯ iḏfaren zi Ljalil bedden ɣar ȓeggwaj ẓrin manayenni.

Neṭṭȓen Siḏiṯneɣ Ƹisa

⁵⁰ Ḏinni ijjen n uryaz qqaren-as Yusef zi Jmaƹṯ n lḥukkam n Ayṯ-Israʼil, netta ḏ ijjen n uryaz iṣbaḥ iǧan nican.

⁵¹ War iqbiȓ ca minxef ṯtafeq jmaƹṯ nni ḏ min ṯxeddem. Netta zeg ubilaj n Arimatya iy iǧan ḏi ṯmurṯ n Yahuḏiya. Itreḥḥab ƹaweḏ zi ȓmulk n Arebbi.

⁵² Iruḥ ɣar Bilaṭus ittar-as ddat n Ƹisa.

⁵³ Iruḥ Yusef isehwa-t-id, ikeffen-it s ȓecfen. Isers-it ḏeg yijjen n unḍeȓ iɣzin ḏeg uzru igga am yifri, ƹemmarṣ war ḏayes inḍiȓ ḥadd.

⁵⁴ Nhar nni tuɣa ḏ jjemƹa, israʼiliyen sewjaḏen i nhar n ssebṯ n lƹibada iy tuɣa ƹȓayen aḏ ibḏa.

⁵⁵ Ṯimɣarin nni iy d yusin ak Ƹisa zi Ljalil ḏfarent Yusef ɣar unḍeȓ ẓrint-ṯ ḏ mamc ḏayes inḍeȓ ddat nnes.

⁵⁶ Ḏewȓent ɣar ṯeddarṯ sewjaḏent lƹiṭar ḏ waman n lwarḍ. Ḏi nhar n lƹibada qqiment reyyḥent ƹlaḥsab ȓuṣiyeṯ nni n Musa.