Luqa 20 - Ṯarifiṯ 2020

Ssulṭa n Siḏiṯneɣ Ƹisa

¹ Ijjen n nhar ḏeg wussan nni, Ƹisa aqaṯ ḏi ṯemziḏa ṯameqqrant iseȓmaḏ iwḏan itbeccar-iṯen, usin-d ɣares arruyas n ȓfuqaha ḏ imseȓmaḏen n ccariƹa ḏ imeqqranen n Ayṯ-Israʼil.

² Kkaren nnan-as: "Ini-yaneɣ cek, manis ḏac d ṯekka ssulṭa nni iy zi teggeḏ ṯimesȓayin-a? Wi ḏac yucin ssulṭa nni?"

^3-4 Inna-asen Ƹisa: "Uȓa ḏ nec akenniw sseqsiɣ x yijjen n ṯmesȓayṯ. Inim-ayi: Yaḥya, man ssulṭa iy zi iṭehhar s waman, ma zi Arebbi ma zeg yiwḏan?"

⁵ Mcawaren jarasen nnan: "Ssulṭa nni, meȓa nenna-as qa ṯekka-d zi Arebbi, ataf aḏaneɣ yini Ƹisa mayemmi war zzayes ṯuminem ca?

⁶ Walakin meȓa nenna-as ssulṭa nni qa ṯekka-d zeg yiwḏan, ataf marra iwḏan aḏaneɣ rejmen minzi umnen belli Yaḥya ḏ nnabi."

⁷ Uca nnan-as i Ƹisa: "Neccin war nessin ca manis d ṯekka ssulṭa nni nnes."

⁸ Indeq-d Ƹisa inna-asen: "Iwa uȓa ḏ nec war ḏawem qqareɣ ca manis ḏayi d ṯekka ssulṭa-ya iy zi teggeɣ ṯimesȓayin-a."

Ȓmaƹna n ixemmasen iy ḏi iǧa ccarr

⁹ Ibḏa Ƹisa issawaȓ ak ccaƹb s ȓmaƹna-ya ṯanita inna-asen: "Ijjen n ssiyyed iẓẓu aḍiȓ ḏeg yijjen n umarjeƹ nnes, ijja ḏayes ixemmasen ṣafi iruḥ isafar aṭṭas n ȓweqṯ.

¹⁰ Wami d yuweḍ ȓweqṯ n uȓqeḍ n uḍiȓ, ikkar issekk ijjen n uxeddam nnes ɣar ixemmasen nni bac aḏas d ucen ȓḥaqq nnes n umarjeƹ n uḍiȓ. Walakin min ggin ixemmasen nni? Uwṯin-ṯ, ssekken-ṯ-id ixwa.

¹¹ Iruḥ issekk-asen ijjen n uxeddam nneɣni, walakin uȓa ḏ wenni uwṯin-ṯ ƹedden xas ssekken-ṯ-id ixwa.

¹² Issekk-asen ḥetta ḏ ij uxeddam wis ṯȓaṯa, uȓa ḏ wenni jarḥen-ṯ uzzȓen xas.

¹³ Ssenni bab n umarjeƹ n uḍiȓ inna, min ɣa ggeɣ? Ṣafi, nec aḏasen ssekkeɣ memmi iƹizzen imken aṯ ggwḏen.

¹⁴ Ixemmasen nni min ggin? Wami ufin mmis yusa-d, kkaren nnan i wayawya: Aqa wenni iy ɣa iwarṯen! Aṯ nneɣ bac aḏas nawi amarjeƹ-a n uḍiȓ!

¹⁵ Nḍaren-ṯ-iḏ ɣar barra i umarjeƹ uḍiȓ nɣin-ṯ. Iwa, min ḏasen ɣa igg bab n umarjeƹ nni uḍiȓ i ixemmasen nni?

¹⁶ Aḏ d yas netta s yixef nnes aḏ ineɣ ixemmasen nni marra, aḏ ijj amarjeƹ nni uḍiȓ i inneɣni." Wami sȓin i manaya nnan: "Arebbi istar!"

¹⁷ Ixzar ɣarsen inna: "Min ixes aḏ yini wawaȓ-a iy yurin ḏi Lkitab?

¹⁸ Wenni ɣa iwḍan x uzru-ya aḏ irez. Wenni xef ɣa iwḍa uzru-ya aḏ ineȓbeẓ."

¹⁹ Ȓexddenni imseȓmaḏen n ccariƹa ḏ arruyas n ȓfuqaha rezzun aḏ ṭṭfen Ƹisa, fehmen belli issawaȓ xasen s ȓmaƹna-ya walakin ggwḏen zi ccaƹb.

Ḍḍariba n lmalik Qayṣar

²⁰ Bḏan imseȓmaḏen nni n ccariƹa ḏ arruyas n ȓfuqaha ḥeṭṭan Ƹisa, rezzun aṯ ṭṭfen x can wawaȓen nnes ḥima aṯ sellmen i lḥakem ḏ ssulṭa nnes. Ruḥen ssekken-as i Ƹisa can yiwḏan sneƹmiȓen aqaṯen nican walakin niṯni ḏ ibergagen.

²¹ Sseqsan-ṯ nnan-as: "A Lmuƹallim, nessen belli cek ṯeqqareḏ ȓḥaqq ṯseȓmaḏeḏ s ȓḥaqq. War teggeḏ bu uḏemawen, ṯseȓmaḏeḏ s ȓḥaqq mammec ixes Arebbi a nƹic.

²² Ini-yaneɣ, ma ṯsemmeḥ ccariƹa nneɣ a nxeǧes ḍḍariba i uzeǧiḏ Qayṣar niɣ lla?"

²³ Issen Ƹisa ixarwiḍen nni iy ḏaysen, inna-asen:

²⁴ "Awim-ayi-d dinar nni n ḍḍariba ḥima aṯ ẓreɣ." Inna-asen: "Wi yiȓan teṣwirṯ-a ḏ yisem-a iy ḏayes?" Nnan-as: "N Qayṣar."

²⁵ Indeq-d Ƹisa inna-asen: "Min iǧan n Qayṣar ucem-as-ṯ i Qayṣar, min iǧan n Arebbi ucem-as-ṯ i Arebbi."

²⁶ Niṯni war zemmaren ca aḏ cemṯen Ƹisa zi can wawaȓ nnes zzaṯ i ccaƹb. Qqimen tƹejjben ḏeg ujawab nnes, war ufin ca min ɣa inin.

Siḏiṯneɣ Ƹisa itbeccar x ṯuḏarṯ n ȓebda

²⁷ Kkaren can yiwḏan zi ȓḥizeb n iṣadduqiyen qarrben-d ɣar Ƹisa. (Qqaren niṯni belli iwḏan war d tekkaren ca zi ȓmewṯ.) Sseqsan Ƹisa nnan-as:

²⁸ "A Lmuƹallim, qa yura-aneɣ Musa aryaz meȓa immuṯ ijja ṯamɣarṯ nnes war kiḏes d ijji bu ṯarwa, ṯajjaȓṯ nni labud at yawi uȓwes nnes bac akiḏes d ijj ṯarwa i wumas nni immuṯen.

²⁹ Neccin tuɣa akiḏneɣ sebƹa n wawmaṯen, imȓec umezwaru immuṯ war d ijji bu ṯarwa.

^30-31 Ṯamɣarṯ nni yuwi-t wis ṯnayen immuṯ war d ijji bu ṯarwa. Amenni ƹaweḏ wis ṯȓaṯa aȓ wis sebƹa.

³² Aȓ uneggaru uȓa ḏ ṯamɣarṯ nni ṯemmuṯ.

³³ Yum Lqiyama, umi ɣa ṯiȓi ṯemɣarṯ nni? Aqa uwin-t s sebƹa iḏsen."

³⁴ Yarra xasen Ƹisa inna-asen: "Wah, ṯarwa n ddunect-a meǧcen twasmeǧacen.

³⁵ Walakin inneɣni iḥesseb-iṯen Arebbi aɣarsen ṯiȓi ṯuḏarṯ n ȓebda, xmi d ɣa kkaren zi ȓmewṯ ataf niṯni war meǧcen ca war twasmeǧicen ca.

³⁶ War zemmaren ca aḏ mmṯen, aḏ iȓin amecnaw lmalaʼikaṯ. Niṯni ḏ ṯarwa n Arebbi, xeȓqen-d ḏi Yum Lqiyama.

³⁷ Walakin cuf, yinni immuṯen aḏ d kkaren zi ȓmewṯ. Uȓa ḏ Musa isbeyyan-d manaya ḏi ȓqiṣṣa n uxcab wami inna qa Siḏi Arebbi ḏ Arebbi n Brahim ḏ Arebbi n Isḥaq ḏ Arebbi n Yaƹqub.

³⁸ Netta ḏ Arebbi n yinni iddaren maci n yinni immuṯen, ȓaḥeqqac netta marra iwḏan aɣares iȓin ddaren."

³⁹ Nnan-as can imseȓmaḏen n ccariƹa: "A Siḏi, ṯenniḏ mliḥ!"

⁴⁰ U ssenni war izƹim ḥadd aṯ isseqsa ƹaḏ ktar.

Lmasiḥ netta ḏ Siḏes n Dawed

⁴¹ Indeq-d Ƹisa inna-asen: "Mayemmi qqaren qa Lmasiḥ ḏ mmis n Dawed?

⁴² Qa Dawed inna netta s yixef nnes ḏi Lkitab n Zzabur:

⁴³ aȓ d ɣa ggeɣ ȓƹaḏyan nnec swadday i iḍaren nnec.>

⁴⁴ Mammec ɣa yiȓi Lmasiḥ ḏ mmis n Dawed? Netta Dawed iqqar-as i Lmasiḥ A Siḏi."

Lmunafiqin

⁴⁵ Inna-asen Ƹisa i imeḥḍaren nnes u marra ccaƹb itesȓa-yas:

⁴⁶ "Ḥḍam ixef nwem zeg imseȓmaḏen n ccariƹa. Niṯni texsen aḏ uyuren s iseȓhamen nni nsen, texsen axasen seǧmen ḏi ȓeswaq, texsen aḏ qqimen ḏeg imucan imezwura ḏi ṯemziḏawin ḏ ȓefruḥ.

⁴⁷ Tetten ṯajjaȓin, smeḍharen-d ixef nsen tẓaǧan aṭṭas ḥima aḏ beyynen i yiwḏan belli niṯni ṣebḥen aṭṭas zaƹma. Yina, lḥisab nsen aḏ yiȓi iqṣeḥ aṭṭas!"