Ayṯ-Ruma 1 - Ṯarifiṯ 2020

Bulus issekk-asen sȓam i ȓmuminin n Ruma

¹ Nec ḏ Bulus axeddam n Ƹisa Lmasiḥ, igg-ayi-d Arebbi aḏ iȓiɣ ḏ arrasul. Twaxḍareɣ ḥima aḏ xbareɣ s Lʼinjil n Arebbi,

² Lʼinjil-a iy zi iwƹeḏ Arebbi ḏi zman s yiȓes n lʼanbiya nnes ḏi Lkitab lmuqeddes.

^3-4 U manaya x Mmis Siḏiṯneɣ Ƹisa Lmasiḥ. Ƹlaḥsab ddat nnes ḏ bnaḏem netta zi ddurriṯ n Siḏna Dawed. Walakin ƹlaḥsab Arruḥ nnes iṣfan imeḍhar-d ḏ Mmis n Arebbi s yijjen n jjheḏ imɣar wami iy d ikkar zi ȓmewṯ.

⁵ Aqa zi Ƹisa u x ssabab n yisem nnes igga ḏayi Arebbi lbaraka ḥima aḏ iȓiɣ ḏ arrasul, aḏ beccareɣ iwḏan zi marra ȓegnus azzayes amnen aḏas ṭaƹen.

⁶ Uȓa ḏ kenniw zeg yinni itwaxḍaren aḏ teḏfarem Ƹisa Lmasiḥ.

⁷ Tariɣ i marra imƹizzen n Arebbi iy iǧan ḏi ṯendint n Ruma ixḍar-ikenniw aḏ tiȓim ḏ ȓmuminin ṣṣaliḥin. Akiḏwem yiȓi arḍa ḏ ȓehna zi Arebbi Babaṯneɣ ḏ Ƹisa Lmasiḥ Siḏiṯneɣ.

Bulus irezzu aḏ iẓer ȓmuminin ḏi Ruma

⁸ Ḏ amezwaru, tcekkareɣ Arebbi xawem marra iḏwem s yisem n Ƹisa Lmasiḥ ȓaḥeqqac lʼiman nwem arrin-as-d ȓexbar ḏi ddunect-a ṯekmaȓ.

^9-10 Liʼanna Arebbi iy ƹebbḏeɣ s marra uȓ inu tbeccareɣ s Lʼinjil n Mmis, netta qa issen tfekkareɣ ḏaywem ȓebda ḏi ṯẓaǧiṯ inu. Tettareɣ meȓa ixes Arebbi aȓ uneggaru aḏ afeɣ abriḏ aɣarwem d aseɣ.

¹¹ Nec rezzuɣ s waṭṭas akenniw ẓreɣ ḥima aḏawem uceɣ ijjen n lqudra ruḥiya iy ḏawem ɣa yucen jjheḏ.

¹² Iƹni a ncejjeƹ ayawya s lʼiman iy ḏayneɣ icarrcen.

¹³ Ay ayṯma, xseɣ aḏ tessnem belli aṭṭas n ṯwaȓaṯin teggeɣ aɣarwem d aseɣ, walakin ȓexxu ƹaḏ war ɣarwem d uwiḍeɣ. Nec xseɣ ȓxeḏmeṯ inu aḏ tenjeḥ ḏaywem mammec ṯenjeḥ jar ȓegnus nneɣni.

¹⁴ Liʼanna u labud aḏ ggeɣ lwajib ak iyunaniyen ḏ yinni war iǧin ca ḏ iyunaniyen, ak yinni iɣrin ḏ yinni war iɣrin ca.

¹⁵ S manaya nec rezzuɣ aṭṭas akenniw beccareɣ s Lʼinjil uȓa ḏ kenniw iy iǧan ḏi ṯendint n Ruma.

Jjheḏ n Lʼinjil

¹⁶ Aqa nec war tseḏḥiɣ ca zi Lʼinjil liʼanna Lʼinjil ḏ jjheḏ nni ig isxeddam Arebbi bac aḏ isenjem marra wi ɣa yamnen: Ayṯ-Israʼil ḏ imezwura ṯumma yinni war iǧin ca zi Ayṯ-Israʼil.

¹⁷ Arebbi isbeyyen-aneɣ-d ḏi Lʼinjil mammec ɣa nemṣȓaḥ akiḏes, manaya s lʼiman waḥḏes. Mammec iqqar Lkitab:

Aɣḍab n Arebbi x ccarr n yiwḏan

¹⁸ Fa imeḍhar-d uɣḍab n Arebbi zeg ujenna x marra ccarr ḏ ȓbaṭeȓ iy teggen yiwḏan iƹni yinni itbeṭṭaȓen lḥaqiqa s ccarr nsen.

¹⁹ Aqa min zemmaren yiwḏan aṯ ssnen x Arebbi imeḍhar-asen-d, liʼanna Arebbi netta s yixef nnes iy ḏasen-t-id ismeḍharen.

²⁰ Zeg wami ṯeǧa ddunect-a, min war itwaẓerren n Arebbi iƹni jjheḏ nnes itduman ḏ ṭṭabiƹa nnes yuƹȓan, nfehhem-iṯent nẓerr-iṯent mliḥ ḏi ṯmesȓayin itwaxeȓqen. Ƹlaḥsab manaya iwḏan war ɣarsen bu lƹuder.

²¹ Waxxa niṯni tuɣa ssnen Arebbi, walakin war ṯ ḥemmiḏen ca war ṯ ṯcekkaren ca mammec itxeṣṣa aḏ ggen ak Arebbi. Lʼafkar nsen ḏewȓent xwant, uȓawen nsen ḏ ibuhaȓiyen ḏewȓen ḏ ṯaǧest.

²² Ḥessben x yixef nsen ḏ imiɣisen, niṯni ḏewȓen ḏ ibuhaȓiyen.

²³ Beddȓen lƹaḍama n Arebbi iddaren i ȓebda s lʼaṣnam itcabbahen ḏeg iwḏan iy ɣa ifnan, ḏ lʼaṣnam itcabbahen ḏeg yijḍaḍ ḏ lḥayawanaṯ ḏ min itenḥuruḏen.

²⁴ S manayenni isellem-iṯen Arebbi i min tcehhan wuȓawen nsen bac aḏ ggen lfasad bac aḏ sbehdȓen ayawya.

²⁵ Kkaren beddȓen lḥaqiqa n Arebbi s ixarriqen. Ƹebbḏen xeddmen i min d itwaxeȓqen maci i Arebbi Lxaliq, wenni iy ḏi ṯeǧa lbaraka i ȓebda n ȓebdaṯ. Amin.

²⁶ Ṯumma isellem-iṯen Arebbi i ccehawaṯ nsen iy ṯen ifeḍḥen. Kkarent ṯemɣarin beddȓent iryazen s ṯemɣarin.

²⁷ Uȓa ḏ iryazen kkaren semḥen ḏi ṯemɣarin, ṯekkar ḏaysen ṯmessi ijjen x unneɣni, aryaz ifesseḏ ak uryaz. S manaya jebḏen-d lƹiqab i yixef nsen iy sḏaheǧen x ȓmunkar iy teggen.

²⁸ Ssenni niṯni wami ugin aḏ ssnen Arebbi, isellem-iṯen i ȓaƹquȓaṯ nsen infeḍḥen aḏ ggen min war iḥȓin.

²⁹ Niṯni ccuren s kuȓ nnuƹ n ȓmuƹṣiyaṯ ḏ ccarr ḏ ṭṭmaƹ ḏ ȓeqbaḥeṯ ḏ ȓeḥseḏ. Neqqen iwḏan tmenɣan. Ccuren s uɣḏar ḏ min war iḥȓin, qqaren nnamima.

³⁰ Qqaren ȓbaṭeȓ, tƹiffan Arebbi, tukkaren iwḏan, semɣaren ixef nsen, ḏaysen ttakebbur. Teggen nniṯ ccarr ḏ jḏiḏ, ƹeṣṣan lwalidin.

³¹ War fehhmen ca, war teṭṭfen ca ḏeg wawaȓ nsen, war ḏaysen bu lḥanana uȓa ḏ arraḥmeṯ.

³² Waxxa ssnen Arebbi iḥekkem xasen s ȓmewṯ x yinni iteggen ṯimesȓayin-a, niṯni kkaren teggen-ṯent. Ktar zi manaya, reṭṭan x yinni iy ṯent iteggen.