RUTH 1 - KENSHÜN LESÜ Naga (S) CL Bible (BSI)

Elimelek Lo A-kami Le Ketuo Moab Ki Kegü

^1-2 Nduka, Israel nyu le a-raja bin kehü mhundyü, kazü günyu chenda nme le soryü. Tsügenyu Judia kazü Bethlehem nyu yhun kehü Efrath Pfüphun nyu Elimelek tse kethyü nme le a-nu Naomi lo au nyu Mahlon lo Chilion tse zen-o gwengwa me Moab kazü ki yhun hü. Anyugun le tsüki yhun kebin ka,

³ Elimelek le Naomi lo anyu hvu kheo sila,

⁴ a-nyu hvu le Moab nyu lü Orpah lo Ruth zen sunthyü. Chen tseryü kho siki,

⁵ Mahlon lo Chilion au ko sila, tson-o Naomi no a-nyepvü lo a-nyuhvu ndi lao a-npfü shüla.

Naomi Lo Ruth Au Le Bethlehem Ki Rani Keryü

⁶ Tsüsiki Naomi le Npugü le jochü pe a-temi tsüo chvülo sa kebin rüla shalo; tson-o a-le a-mo hvu zen Moab nken titse gwen ndalo.

⁷ Anyugun le judia ki rani gunla titse kengüo tsonchü shü, ai tson nyu

⁸ a-le au ka zoshü, “Hai le kaki rani gü hai jvünyu zen bin tin lalo. Hai le age lo sikela hvu ge thyükeshü hontse Npugü no hai ge kegwa gü thyüshü kelo gü thyü.

⁹ Lo Npugü no hai mihvu nren no kalu nio hai kakhwün no bin kelogü thyülo.” Tsüselo Naomi le au nboshü, Ai au le chü sola,

¹⁰ tson-o au le a-ka, “Nmvu! ayi le nzen-o ntemi dan ki güti.”

¹¹ Naomi le zoshü, “Anyugihvu hai le ranila mvu loshvu.” Nyu genyu hai le athen ryü nyü bin ola? Ale nyu nnyu nipe hai nyepvü thyüti ado tse rüchün bin ole?

¹² Kaki rani lalo, ale thenri lao kalu ni kethyüi mvuso. Lo ale a kenrin le binzun-o ntsoje kaluo peche nnyu shü zatse-e,

¹³ au le peshü sokeryü hai le khwe bin ti ole? Hai le kechanyu ka kalu mvuo tsü khwe bin ti ole? Nmvu, anyugi hvu, tsonlo nrün ndi hai le shabin nyo. Npugü le a ntsun laso, lo ale hai njün ho bin nle.”

¹⁴ Tson-o anyugun le chüni sola. Tsüselo Orpah le a-nyü nbo shüo a-kaki ranila, ai Ruth we a-hoshümvu.

¹⁵ Tsügenyu Naomi le a-ka zoshü, “Ruth nsikezen gi le ranio a-temi lo a-tero ki gü laso. A-zen kaki gun lalo.”

¹⁶ Ai Ruth le a-jokenishü, “Ano nkhela lotse aka hi nyata! Ano nzen güta. Nle dika güyo ale güti, nle dika yhun yo ale tsüka yhun ti. Ntemi pe atemi thyü lo n Sunggigü pe a Sunggigü thyüti.

¹⁷ Nle dika siyo, ale tsüka sio tsünyu asun lati. Kesi no nhi sükho kethyü mvuo kecha lihi-e no nhi sükho yatselo Npugü shaja kerü no age ryülo!”

¹⁸ Naomi le Ruth le a-then gü titse rhiton lo kela hyu lao, a-le tha zosin mvula.

¹⁹ Au le Bethlehem tilo kemvuthen tsonchü ryü. Au le ryü tilo ntsin rünyi nyu apentha a-sherhün la; lo tsünyu tenunyu dan le nrao, “Hile Naomi ketsin ole?”

²⁰ A-le anyugun ka, “Naomi tse ako nyalo,” “Marah tse ako lo, Kekvutsin Sunggigü le ano yhun kenjün thyü kela genyu.

²¹ Ale hinyu tin kejü ka kesükela thyü, ai a kenben thame ndi tse Npugü le azen rani ryü bin. Kekvutsin Npugü le a nmu lao kenjün kethyü nipe age shü bin lo nyuthyüo Naomi tse ako ti la?”

²² Hihontseo Naomi le Moab ki a-mogi Ruth zen rani ryü. Barley low gvü teri ka au le Bethlehem nyu ryülo.