OBADIAH 1 - KENSHÜN LESÜ Naga (S) CL Bible (BSI)

¹ Higü hile Obadiah sidyüjo: tsüle Aphuso kekvu Npugü le Edom senye genyu kezo. Npugü le a-lilogü nipe senyedan ka shü, lo ngun le a-jo nyü loso: “Gwen ndalo! Ngun gü Edom zen-o teri thyüti!”

Npugü Le Shaja Pe Edom Tsüti

² Npugü le Edom ka zo, “Ale nno kvumvu lati; temi aphu nsümvu lati.

³ N ketekho le nsa laso. Nyida chwida le tsonye ketsü no hunpfü bin; nka le kazüthun ketetso dan ki, tsügen nle n npvü nka zo-o, ‘Segü le asüshelo gwa tila?’

⁴ Nle nka lope ketetso ki logi seü hontse njü, tson-o tsüno shyenyü dan nyu kebin hontse, ai ale nsüshe lati.

⁵ “Kheje ki kerühu nyu le ryülo, anyugun le lonyü kebin gü nti khilohü. Temidan le vainsha lülo kerho nti khelahü. Ai nshwikerüchün nyu le n nke shü laso.

⁶ Esau tsipwen dan, hagun kenya le mele khilo laso.

⁷ Hagun pvünyu ju le hagun sa laso; anyugun le hagun kazü nyu hagun hü laso. Hagun zen-o gwatho kehüdan le hagun so kvulo laso. Hagun zen-o tyütsü kehü hagun pvünyu dan le hagun nsenbin; anyugun le hagun ka zo, ‘A-le kelikelu kehü tsü le dikipon la?’

⁸ “Ale shaja pe Edom ketsü jon nyü, ale anyugun dan nyu kelikelu kehü aphu nkela lo anyugun kensü aphu khi lati.

⁹ Teman nyu teri thyükehü nyu le kershvu lati, lo Edom nyu shüpahü aphu boshvu lati.

Shaja Pe Edom Ketsü Kon

¹⁰ “Nle nsikezen nyu Jakob tsipwen dan hon rühu lo boshvu kethyü genyu, n-nkelao kethonthen rühvumvu lati.

¹¹ Shwikerüchün nyu le anyugun khinrun bola ketseka tsüjon nyü hagun le bin. Hagun le gwamvu pe Jerusalem kenya pvütin-o pe anyugun dan nyu kenjün lo kela tesin tsüdan hontse le.

¹² Hagun le Juda kazü ki hagun tsasizen nyu hengwa kemvu keteno tsü hagun kenyüo nrizü mvu. Anyugun kenke jon nyü hagun kenyüla zümvu. Anyugun le shekese keteno ka a nyugun shwinyü zümvu.

¹³ Hagun le atemi nyida nyu yüo anyugun kenjünkethyü nripe hagun kenyü, lo anyugun kenke jon nyü anyugun hon khinti tse zümvu.

¹⁴ Hagun le tsoncho ka bin-o tinkejü ten zümvu. Hagun le anyugun shekese jon nyü anyugun lope shwikerüchün nyu benyu shüla zü mvu le.

Sunggigü le Senyedan Jünkerati

¹⁵ “Npugü ahigü le senye aphu jünkera nrün jon le ryüjü. Edom, nle thyükeladan tsüpe ngen thyü shüti. Nle pe ketsü gü tsü hyuni loti.

¹⁶ A temi dan le arincho kenshün gen shaja honpen gü tsü nzeü laso. Ai tsükehun senyedan aphu shaja honpen tsü nyeki kekhü tsüti; anyugun le tsülo-o ndi lati.

Israel Kvukelo

¹⁷ “Ai Zion kazüthun gen peha le tin loti, lo tsü le bin kenshün thyüti. Jakob temidan le kenjü nyu anyugun kazü thyülo kezü gütsü lolo ti.

¹⁸ Jakob lo Josef temi le mah hontse ti; mah le npenkon rola kehü hontse anyugun le Esau temi nke lati. Esau tsipwen nme-e rhün loho. Npugü ahigü le zo laso.

¹⁹ “Juda tesin kipon temi le Edom nkhenlo lati; nkhün kipon rinchopha ki kebin nyu le Filistian lolo lati; Israel nyu le Efraim lo Samaria lo lati; Benjamin temi le Gilead khilo lati.

²⁰ Israel tesoki nyu rihü, me kazü ki tin kela nyu le niryü lo Phoenicia kagü Zarephathe tesozin keti kvulo lati. Jerusalem temi Sardis nyu kebin nyu le Juda tesinzin rünyi dan nkhenlo lati.

²¹ Jerusalem nyu kvusa kethyü dan le Edom when-o tsü so gonti. Lo Npugü le Raja gü thyüti.”