MARK 1 - KENSHÜN LESÜ Naga (S) CL Bible (BSI)

Johan Baptist Gü Senkethyü

¹ Sunggigü Nyugü Jisu Khrista Jolokegwa le hihontse.

² Nduka sidyükeshagü lesü nyu, thu kenjü le hihontse: “Hire, ‘Nmhun kehyu mhundyü Ale A lilonyu nishü ti; a-le ntson nda shüti.’

³ Tehen nyu nra sen-o, ‘Npugü tson ndolo; tson kehükhwen tsüle a-le le!’ ”

⁴ Tsühontse Johan me baptaiz thyü kehügü le tehen nyu ryüo kemu jülo nrün nyunkelukelo baptism pe me senthyü.

⁵ Tsükatsü temi kechon le Judia kazünyu lo Jerusalem nyu aphu a-ki ryüo a-npvü a-kemu dan zoshwishüo Jordan züri nyu a-ben ka baptaiz thyü külo.

⁶ Lo Johan tsü le Ut hü no kedo phi ben, thyügi senkephin lope a-sen phin pvü, lo tsekhvü lo khuzü tyü hü.

⁷ Tsükatsü a-le me senthyüo, “Anyeki kegon nme le a siki ryü zhü; ale nkhüntsü gü a-phaje kephin-e shwü kümvu.

⁸ A we zünyu hagun baptaiz thyü hünyo, ai A-we Kenshün Kapu nyu hagun Baptaiz thyü ti.”

Jisu Le Baptaiz Thyükelo, Lo A-semen Kethyü

⁹ Lo tsükatsü Jisu le Galil kazü Nazaret rünyi nyu chwio Jordan ri nyu Johan benka baptaiz thyülo.

¹⁰ Tson-o a-le zünyu chwiryü ntsin, tsangge Kapu le nsu hontse a-ge tsükeryü hyulo.

¹¹ Lo tsükatsü tsangge thakhwen nme le, “Nle A nyu A kesogü, Nle Akenyü tsingü.” tsonkethyü zo ryü.

¹² Lo tsonshü ntsin Kapu le a-nipe tehen nyu shüla.

¹³ Tson-o Satan no tehen nyu jon henzi a-semen; lo tsügwünkho ka a-le tehenthyü ju zen bin hü; lo tsangge lokethyünyu dan le a-lothyü bin hü.

Jisu Le Galil Kazünyu Me Senthyü Keso

¹⁴ Lo mele Johan tenlo kela sika Jisu le Galil nyu ryüo Sunggigü Jolokegwa zope me senthyü.

¹⁵ “A-gwünkho le ryü laso!” a-le zo-o, “lo Sunggigü keda le a-kho nni laso! Hagun nyun kelulo-o jolokegwa gü tenyenlo chi,” tsonhü.

Jisu Le Tsehü Ketennyu Mizi Kokelo

¹⁶ Tson-o Galil züda sekipon keryü ka Simon lo a-sikezengü Andria au le joh pe züda nyu shweshü güzhüo hyulo; au le tsehü ketennyu genyu.

¹⁷ Tsontsin Jisu le au ka, “Hai asithen lota, lo ale hai no temi keten nyu thyü tin lati,” tsonshü.

¹⁸ Lo tsonshü ntsin au le au joh khe whü tselao a-sithen tinla.

¹⁹ Lo tsükatsü a-le ketu din npha ntsin Zebedi nyugü Jakob lo a-sikezengü Johan au ko run nyu au joh nkhvü bin-o hyulo.

²⁰ Tsontsin a-le au ko so, lo au le au pvü lo me jonshe zen kehü au gonyu ju no run nyu bin, ai au we Jisu sithen tinla.

Nshünkemvu Kapu Le Zenkehü Nme Rüla

²¹ Tsüsika anyugun le Kapernaum nyu gunlo; tsontsin a-le Sabbath jon nyü sinagog ka nyu yüo me senthyü.

²² Lo tsükatsü a-le lesü keshatsin nyu hontse anyugun senthyü keshü genyu anyugun le a-senkethyü jo genyu anyugun dunthyü sala.

²³ Lo tsügwünkho ka tsü nshünkemvu kapu no nchünndyü zen kehü nme le anyugun sinagog ka nyu bin,

²⁴ lo tsügü le nra sen-o, “Nazaret nyu Jisu, n gun kengüo nyu tsethyü mon? Nle a gun boshvula titseo ryü ole? Nle segü yo tsekethyü ale nsha! Nle Sunggigü Kenshün gü le,” tsonso.

²⁵ Ai Jisu le a-kesüo, “Nle matse bin chi; tson-o temi gü ge tinchwila chi,” tsonshü.

²⁶ Tsontsin nshünkemvu kapu le a-nthyü nnyü sashüo nra sen-o a-ge chwila.

²⁷ Tson-o anyugun no anyugun dunthyüla, tson-o khinyunyu ketso-o, “Dihontse lala? Senkethyü keshün nme hile! Temi higü kekvu le nshün kemvu kapu ge-e tha zoshülo tsüdan le a-jo zen kehü hile!” tson.

²⁸ Tson-o Galil kazü liki hiki aphu a-zan kechwi zope sü gunla.

Jisu le Temi kechon Thyüngwa Keshü

²⁹ Tsüsika anyugun le sinagog ka tsünyu chwiryülo ntsin anyugun le Jakob lo Johan tse zen-o Simon lo Andria au ka nyu yüla.

³⁰ Tsükatsü Simon nu a-jvü le rüka bin, lo mele tsügi rüla pe Jisu ka zoshü.

³¹ Tsontsin a-le ryüo a-ben sülo njüo a-penso shü ntsin a-le rüka mvula; tson-o a-le sogü anyugun lothyü tinla.

³² Lo yhüko chela ntsin mele kehokenyü nyu lo tero gwakemvu no nchünndyü kehünyu aphu zen-o Jisu ki ryü.

³³ Tson-o rünyi tsünyu temi aphu ryüo kakhin ka kequenlo.

³⁴ Lo kethyükenyü le a-gwün kehünyu aphu thyü kesherhün shü, lo tero gwakemvu kechon hüla.

Jisu Le Me Senthyü Chwikela

³⁵ Lo lonyü tsangben metse kemvuka a-le so-o me kendi bin ki gü hi tinla.

³⁶ Lo tsüsika Simon lo a-zen kehü ju le a-sithen gunla.

³⁷ Tson-o anyugun le a-hyulo njüo a-ka, “Temi aphu nfü hünyo.”

³⁸ Tsontsin a-le anyugun ka, “N gun ketu sen-o rünyi hidan nyeka güla je. A no gü tsüdan kako senthyü shü nrün genyu; kechamvule ale tsügenyu hika keryü genyu.”

³⁹ Tson-o a-le Galil kazü aphu nyu anyugun sinagog ka nyu gungü me senthyü lo tero gwakemvu gü-e hüla.

Nyu Le Ketyünyu Nme Thyüngwa Keshü

⁴⁰ Tsüntimvule nyu le ketyü nyu nme le a-ka ryüo a-mhundyü nyu khosenlo njüo a-ka, “Nle nkendo yatselo, nle athyü kesherhün shü logwa.”

⁴¹ Tsontsin a-le a-nyun kenjünthyülo njüo a-ben shwen pe tsügü kesüo a-ka, “Nkethyü no gwalo chi,” tsonshü.

⁴² Lo tsontsin a-ge nyu le ketyü tsüle ndila, tson-o a-thyü ngwa shü.

⁴³ Lo a-le a-kesinni shüo a-nio a-ka,

⁴⁴ “Nle temi nme kae thame zomvu titse kethyü rüchün tonlo chi; tsüntimvule nle peshükedagü ka gun-o nmin lope a-hishü chi; tson-o anyugun no shalo nrün genyu nthyü nshünlo kela phoukerho nduka Mosa le zokenjü jvü gü thyüla chi,” tsonshü.

⁴⁵ Ai a-le gü tsü rüla zosa shüla, lo liki hiki temi no shasa gunla, tson-o Jisu no ndo-o rünyi nme nyue yülo shvu lao gungü temi kendi bin ki hü gwünzin tinla. Lo mele likipon hikipon a-ki ryü.