MALAKI 1 - KENSHÜN LESÜ Naga (S) CL Bible (BSI)

¹ Jolo higü hi Israel nyu temi ka zoshü lotse Npugü le pe Malaki tsüshü.

Npugü le Israel nyu Keso

² Npugü le a-temi ka zoshü, “Ale azintse hagun so hü nyo.” Ai anyugun le a-jokenio, “Nle agun so kehü dihontse tsin shüla?” Npugü le jokenishü, “Esau lo Jakob au le tsasikezen, ai ale Jakob lo a-tsipwen so shü,

³ tson-o Esau lo a-tsipwen we ale shwirüchün la. Ale Esau rincho no nrun lao khepe mesükerun dan bin thyüla le.”

⁴ Esau tsipwen, Edom nyu dan le, “Agun rünyi dan nke laso, ai agun le tsü thyüni loti.” tse zoya tselo, Npugü le anyugun jokenio, “Anyugun no thyü lota-- Ale sürho nila tile. Npugü le kethonthen a-ge nyunta kehü senye gü tsü pe kazü gwakemvu le tse me le koti.”

⁵ Israel nyu temi le a-npfü a-yhütyü pe hi hyuti, tson-o anyugun le, “Israel nyu kazü tegwen ki-e Npugü le kvule!” tse zoti.

Npugü le Püshükedanyu Rho Keshü

⁶ Kekvutsin Npugü le Püshükedanyu ka zohü, “A-nyu le a-pvü rühvu, lo go gü le a-npugü rühvu hü. Tsonlo ale hagun pvü lo hagun le nyuthyüo a rühvu hü mvula? Ale hagun npugü, nyuthyüo a rühvu mvula? ‘Hagun le a ntsü hü, tson-e hagun le dihontse agun le n ntsüla?’ tse ketso hü.

⁷ Hagun le nrhu kela ketyüketsü pe a kershvubin ge rüshvu hü. Tson-o hagun le, ‘Dihontse agun le nrühvu mvu la ola?’ tse ketso hü. A kershvubin nrhu kehü ale tsinhi pe hagun ka zo shüti.

⁸ Hagun le senru a-yhükepo, keho, nmvue phayhon senryü rora thyü pe atsüo tsüle thame a-zükemvu ndi letse rüchün bin nle? Senru tsühontse kethyü pe ahng gü tsüshü shwita! A-le nge a-kenyü nmvue nkenyükon peha thyüpe ntsü ti ole?”

⁹ Hagun püshükedanyu dan ntsoka Sunggigü no ngun genyu thakegwa thyüshü lotse hishwi. A-le hagun kehi kenishü loho, lo tsüle hagun kemu le.

¹⁰ Kekvutsin Npugü le zohü, “Hagun no a kershvubin ge kenrun kenryü mah thyü mvulo nrün genyu, hagun nme no Kershvuka khenpfü dan khin kela le akenyü. Ale hagun ge akenyü bin mvu; hagun le kerüshvu senryü aketsü ale lo loho.

¹¹ Kazü qün mezi gü kecha kipon keti temi le arühvu hü. Lika hika-e anyugun le rünkegwa ro lo lolo kekü rora dan thyü akishü hü. Anyugun aphu a rühvu hü!

¹² Ai hagun le a kershvubin lo kenrunkenryü letse zo lo tsüge nrhu kela ketyüketsü pe rüshvuo arühvu mvu laso.

¹³ Hagun le zo-o, hi aphu nyu n nyunphü laso tseo a kipon rani tinla. Hagun le senru rühu kelo nmvue phayho nmvue keho senryü arüshvu. Hagun kerüchün le ale hagun ben nyu tsülo loti tse ole?

¹⁴ A-senru dan nyu kegwa le bin-o pe atsü titse zoshwishü njü ai nkuo senru gwa kemvu senryü arüshvu kehü nyu no shochün pfülo! Ale raja keda nme, lo kazü nyu senye aphu a nshvu kehü genyu.”