LEVINYU 1 - KENSHÜN LESÜ Naga (S) CL Bible (BSI)

Rope Kerüshvu

¹ Npugü le Npugü kehü Phika günyu Mosa koshüo tejvu hidan pe a-tsüshü.

² Israel nyu no kerüshvu gwenkho ka then nrün genyu. Lihigü nyukhu pe rüshvu kethyü ka tsüle methu, tanyü nmvue tenyü thyü bin logwa.

³ A-le methu nme pe rope kerüshvu thyü yatselo, a-thutse ge tetsin nme kendi senryü mvu loshvu. Npugü no lo nrün genyu a-le tsü sen-o Npugü kehü phika gü khenpvü ka ryü mvulo shvu.

⁴ Temi güle a-ben pe tsü pe ge shüti, lo tsüle a-kemu dan sentinla nrün kerüshvu thyüo loloti.

⁵ A-le tsüka methutse gü dushvu loti, lo Aaron nyenyu püshükeda dan le tezi senryü Npugü mhundyü shüo shwe pe phika gü mhundyü nyu kebin kershvubin lizin hizin aphu ka shü lati.

⁶ tson-o a-le nyukhu gü gi yho lao jün loti,

⁷ lo püshükeda dan le tesen pe kershvubin ka keren shüo ro shüti.

⁸ Lo anyugun le nyukhu gü thyü a-pe lo a-keshvu sin-o, pe mah soge shüti.

⁹ Temi gü le züpe a-sen-ari lo a-pha dan süla mvuloshvu lo püshükeda güle kerüshvu tsü aphu pe kershvubin ge ro lati. Ketyüketsü kerüshvu hi rün Npugü le a-kenyü.

¹⁰ Temi nme le tanyü nmvue tenyü nme pe kerüshvu thyü bin yatselo, tsüle tetsin nme kendi a-tse nme mvulo shvu.

¹¹ A-le kershvubin tesozin tsü dushvu ti, lo püshükeda gü le tsü zi pe kershvubin te lizin hizin shwen shü lati.

¹² Temi gü le tsü jün thü kelo siki, püshükeda güle a-pe, a-keshvu lo kecha aphu khipe mah soge shü lati.

¹³ Temi gü le züpe a-sen-ari, lo a-pha dan süla mvuloshvu, lo püshükeda güle kerüshvu tsü pe Npugü mhundyü nyu shüo kershvubin ge tsü aphu ro lati. Ketyüketsü kerüshvu rün hi Npugü le a-kenyü.

¹⁴ Temi nme le tegü rope kerüshvu thyüti yatselo, tsüno nsu nmvue paro nme mvuloshvu.

¹⁵ Püshükeda gü le tsü sen kershvubin ka ryüo, a-pe rathü pe kershvubin ge ro lati. Lo a-zi jen pe kershvubin khoka shü lati.

¹⁶ A-le a-gunphon lo tsünyu kebin dan pe kershvubin nphozin jonbü shü kehü bin ka shwe lati.

¹⁷ A-le a-sekin süthü la mvuo a-min sükho lo tson-o aphu pe kershvubin ge ro lati. Ketyüketsü kerüshvu rün hi Npugü le a-kenyü.