JOHAN 1 - KENSHÜN LESÜ Naga (S) CL Bible (BSI)

Jo Gü Le Thyümi Ngwala

¹ Sokerikanyu jo le hü, lo jo le Sunggigü zen hü. lo jo le Sunggigü.

² A-le sokerikanyu Sunggigü zen hü.

³ Yhun kebin aphu a-no thyü kü, lo thyükelo tsü aphu a-no thyü kemvu nme-e ndi.

⁴ Kerhünronzin le a-ge bin, lo kerhünronzin tsü le temi keben gü.

⁵ Lo keben le kezün nyu gwünben hü, ai kezün gü le a-nyeki kvulo mvula.

⁶ Sunggigü le nikeshü Johan tsekethyü nme le gunryü,

⁷ tsügü genyu temi aphu no tenyenlo nrün genyu keben gü zan zoshwishü titseo zo gunryü.

⁸ A-le keben gü mvu, ai keben gü zan zoshwishü titseo yhun gunkeryü.

⁹ Temi aphu gwün nben titse keben ketsin gü le kazü nyu gunryü.

¹⁰ A-le kazü nyu yhun, lo a-le kazü thyü shüe kazü nyu keyhun nyu le a-shalo mvula.

¹¹ A-le a-npvü a-temi ka gunryü ai a-temi dan le a-zenlo mvula.

¹² Ai a-zenkelonyu aphu a-kon le, a-zan ka tenyen kelo ju, a-le tsüdan no Sunggigü nyenyu thyülo titse kethyü kekvu pe tsü laso.

¹³ Tsüle tezi nmvue nthyü nmin kendo nyu, nmvue temi kendo nyu mvu, ai Sunggigü kendo ka nnyu kelo.

¹⁴ Lo jo tsüle thyümin ngwa gunryüo shwikenjün lo ketsin no a-süpvüo agun dan nyu yhun; tson-o Pvügü Nyuche gü le Sunggigü ka a-kegwa hyukelo, a-kegwa tsü nri gunryü.

¹⁵ Johan ko Jisu rüla zo-o nra sen-o, “Ale kerika asiki gunryü kezhü gü, a-le anye gon, kechamvule a-le a mhundyü hü kethyü genyu, tson-o a-rüla zo kehü tsüle higü mare,” tsonshü.

¹⁶ Kechamvule ngun aphu a-kegwa nyu tsü shwikenjün kegwa so ge shwikenjün hyu kelo genyu.

¹⁷ Tejvü gü we Mosa ben nyu kenye shü, ai keso lo ketsin gü we Jisu Khrista ge chwikeryü genyu.

¹⁸ Temi le thame kae Sunggigü hyu mvu; A-pvü nyun ge kebin Nyuchegü le a-npvü temi tesha keshü gwünzin.

Sunggigü Tanyünyu Gü

¹⁹ Lo Judanyu dan le Jerusalem nyu Levinyu lo peshü dan nipe Johan ki shüo a-ka, “Nle segü la?” tse ketso keshü ka Johan le zokeshü le hi.

²⁰ Tsükatsü Johan le zoshwishü, lo zoshü kemvu thyüla mvu; “Ale Khrista gü tsü kemvu,” tsonshü.

²¹ Tsontsin anyugun le, “Tsonlo nle segü la? Nle Elia mon?” Tsontsin Johan le, “Ale tsügü kemvu.” “Nle sidyükesha gü le?” anyugun le tson shün. Lo a-le, “Tsüe kemvu,” tsonla.

²² Anyugun le zo, “Tsonlo nle segü yo agun ka zo shüta. Agun le sen gü agun nikeshü nyu ka zoshü nrün genyu. Nle n npvü nle segü le tse hü nla?”

²³ Johan le nduka Isaya sidyükeshagü le kezo tsü pe kenishü: “Hagun Npugü tson thyü kenzhü lo chi! tson-o chün nyu temi nme le nra sen kehü khwen gü tsü le a hile.”

²⁴ Lo tsüdan tsü le Farisinyu danka nikeshü.

²⁵ Tson-o anyugun le a-ketso-o a-ka, “Nle Khrista gü kemvu, lo Elia kemvu, lo sidyükeshagüe mvu yatselo nyu Baptaiz thyü hü nla?”

²⁶ Johan le anyugun ka zo, “A we zü nyu hagun baptaiz thyü kehü gwünzin; hagun dan nyu hagun le a-sha kemvu nme le bin.

²⁷ A-le asiki ryü zhü, ale a-phaje kephinron-e shwülo kümvu.”

²⁸ Tha hidan hi aphu Johan le me Baptaiz kethyü Jordan züri kho Bethani ki thyü hü laso.

Sunggigü Tanyü Nyugü

²⁹ Tsüsigü nyü Johan le Jisu le a-ki ryü kezhü hyuo zo, “Hire, kazü kemu sen tinla titse kethyü Sunggigü Tanyü Nyugü!

³⁰ Ngüka a-le, ‘Temi nme le asiki ryü zhü nyo, a-le anye gon, kechamvule a-le a mhundyü hü kethyü genyu, tson-o a-rüla zokehü gü tsüle higü hi mare.’

³¹ Lo ako a-shalo mvula; ai a-no a-khipe Israel nyu tesha titse kethyü genyu, tsügenyu zü nyu me baptaiz thyü gunkeryü gwünzin,” tsonshü.

³² Lo tsüntimvule Johan le Jisu rüla zo-o, “Kapu gü le nsu hontse tsangge tsüryüo a-ge binlo kela ale hyu.

³³ Lo a we le a-shalo mvula; ai zünyu me baptaiz thyülo tseo anikeshü gü le a-npvü aka, ‘Nle Kapu gü le a-ge tsükeryü hyukelo, tsüle Kenshün Kapu nyu me Baptaiz thyüshü nrün gü tsü le.’

³⁴ Lo ako tsü hyulo njüo, ‘Higü hile Sunggigü Nyugü tsekethyü a-zan zoshwishü laso.’ ”

Senthyükelo Keri dan

³⁵ Lo tsüsinyü Johan le a-sikethennyu mihvu zen hü.

³⁶ Lo a-le Jisu le nda kehü hyushüo, “Hire, lile Sunggigü Tanyü Nyugü so!”

³⁷ Johan le senthyükelo hvu le jo tsü shalo njüo Jisu sithen tinla.

³⁸ Jisu le rani gü au le a-sithen kehü hyulo njüo au ka, “Hai le nyuthyü hü nla?” Tsüselo au le a-ka, “Rabi, (a-kon le senkethyü gü,) nle dikipon bin nla?”

³⁹ Jisu le au ka, “Ryüta, lo hai npvü hyulo ti.” Tsügenyu au le gungü a-kebin bin hyulo; tson-o au le tsünyü a-zen bin, lo tsüle tegi pezi kevü khoka so.

⁴⁰ Johan jo shashüo Jisu sithen kelo hvu nme le Simon Pitor sikezen gü Andria.

⁴¹ A-le gungü a-tsagü Simon fülo njüo a-ka, “Agun le Mesia (a-kon le Khrista gü) tsü hyulo laso.”

⁴² Tson-o a-le a-zen-o Jisu ki ryülo. Jisu le a-nrio zo, “Nle Jona nyugü Simon, nno Kafa.” (A-kon le Pitor thyüla tiso.)

Filip Lo Nathanael Hvu Kokelo

⁴³ Tsüsinyü Jisu le Galil nyu gü bin; lo a-le Filip hyu shüo a-ka, “Nle a sithen lo re,” tson.

⁴⁴ Lo Filip tsüko Andria lo Pitor au rünyi Betsaida nyu.

⁴⁵ Lo Filip le Nathanael hyu shü njüo a-ka, “Agun le nduka Mosa le tejvü nyu thu kenjü lo sidyükeshanyue thu pe bin kenjü gü tsü hyulo laso. A-le Josef nyugü Nazaret Jisu tsü le.”

⁴⁶ Nathanael le a-ka, “Nazaret nyu thakegwa le chwiryülo gwa ole?” Filip le a-ka, “Gunryüo nrishü re.”

⁴⁷ Jisu le Nathanael le a-ki gunryü kezhü hyulo njüo a-rüla zo-o, “Likili, thame kae nku hü kemvu Israel nyu ketsin nme!”

⁴⁸ Nathanael le a-ka, “Nle nyu tsethyüo a shalo la?” Jisu le a-zo keni-o, “Filip le nkeko mhundyü, nle kherobin hensin ki kebin ka, ale n hyu laso.”

⁴⁹ Nathanael le a-ka, “Rabi, nle Sunggigü Nyugü; nle Israel nyu raja gü.”

⁵⁰ Jisu le a-ka, “Ale kherobin hensin nhyu, tsonzo keshü genyu nle tenyenlo ole? Nle hinyeki-e tha gonkvu kethyü dan me hyuti.”

⁵¹ Tsüntimvule Jisu le a-ka, “Ale hagun ka zo tsentsü shüti, hagun le tsang khinsheshüo Temi Nyugü soge Sunggigü lilonyu le kükezhü lo tsenryü kezhü hyu ti.”