HOSEA 1 - KENSHÜN LESÜ Naga (S) CL Bible (BSI)

¹ Jo hile Npugü le khipe Beri nyügü Hosea tsükeshü, Uzziah, Ahaz lo Hezekiah dan le Juda raja thyü lo Jehoash nyu Jeroboam le Israel raja thyü kebin gwünkho ka.

Hosea Nu Lo A-nyenyu

² Npugü le Hosea gen bin-o Israel nyu nthon kerigü, a-le Hosea ka zo, “Gü tenu lolo; nnu le petsü kemvunyu ti, lo n nyenyue a-hontse ti. Tsühontse a temi le a khela lo akipon ketsin thyü mvula sele.”

³ Tsügenyu Hosea le Dablaim nyugi a-zan le Gomer tsekethyü lolo. Au nyurigü pechenyu zenkelo ka,

⁴ Npugü le Hosea ka zo, “A-zan pe ‘Jezreel’ tholo, kechamvule Israel bon Jehu, rajagü le Jezreel nyu temi bokeshvu genyu shaja pe tsü nrün le gwünkho thon kemvui. Ale Jehu raja kethyü no keni thyüla tiso.

⁵ Lo ale tsü gwünkho ka Jezreel ketejon nyu Israel shüpahü kekvu nke lati.”

⁶ Gomer nyu shahvu gü le tenunyu. Npugü le Hosea ka zo, “A-zan lope ‘Somvule’ tholo, kechamvule ale Israel shwinjün nmvue a-nyugun kemu jüni lohoso.

⁷ Ai Juda temi genyu we, ale keso pe hishü ti. Ale Npugü, anyugun Sunggigü, anyugun keniloti, ai tsü le zhethon, tholevü lo thotsi, nmvue keru lo keru kezennyu le teri kethyü nyu ale tsü thyü loho.”

⁸ Gomer le a-nyugi lüyi nkhin kelo siki, a-le nbenmvulo-o pechenyu zenlo.

⁹ Npugü le Hosea ka zo, “A-zan lope ‘Atemikemvu’ tse kolo, kechamvule Israel temi le atemi kemvu lo ale anyugun Sunggigü mvu laso.”

Israel Zennilo Nrün

¹⁰ Israel temi le Zida nyu hachon hontsela-o, swülo ndalo ho lati. Ntsoka Sunggigü le anyugun ka hihontse zo, “Hagun le atemi kemvu,” ai Sunggigü le anyugun ka hihontse zo nrün jon le ryüjü, “Hagun le Rhünkehü Sunggigü nyenyu!”

¹¹ Juda temi lo Israel temi le kerhünni lati. Anyugun le anyugun genyu sharhi nme nti kejü lati, tson-o anyugun kazü nyu yhun lo chvukenye niloti. Ele, Jezreel jon gü tsüle jon keda nme thyüti!