AMOS 1 - KENSHÜN LESÜ Naga (S) CL Bible (BSI)

¹ Jo hidan hile Tekoa rünyi nyu Tanyü kekhwenyu nme, Amos jo. Uzziah le Juda raja lo Jeroboam le Israel raja thyü ketseka, kazü nni nrün chenhvu mhundyü Sunggigü le Israel nyu genyu hidan aphu pe Amos hishü.

² Amos le zo, “Npugü le Zion kazüthun kipon nra; a-khwen tsangkesen hontse Jerusalem kipon ryü. Tehen le rügula, lo Karmel kazüthun gen jonyü le nmhabun tsela.”

Israel Kazon Nyu dan Gen Sunggigü Le Kenjün Kethyü Khishü Siria

³ Npugü le zo, “Damaska temi dan le mu lo muni laso, tsügenyu ale tsügü genyu shaja pe anyugun tsü tsentsüti. Anyugun le Gilead temi gen anyugun jvu gwamvusa.

⁴ Tsügenyu ale mah nipe Raja Hazael le thyükeshü rajabin gü gen shü lo ale raja Benhadad, chwida ro lati.

⁵ Ale Damaska nyida khinrun dan vüla lo Aven kazü ketejon nyu keyhun nyu lo Betheden kekvu kesen gü hü lati. Siria temi dan zen-o Kir kazü ki dothyü tinla ti.”

Filistia

⁶ Npugü le zo, “Gaza temi le mu lo munini laso, lo tsügenyu ale shaja pe anyugun tsü tsentsüti. Anyugun le senye apentha zen-o jwe pe Edom temi go thyüla.

⁷ Tsügenyu ale mah nipe Gaza nyida chwida gen shüo a-chwida kekhwendan ro lati.

⁸ Ale Ashdod lo Ashkelon nyida sokeda hvu hü lati. Ale shaja pe Ekron nyida tsü lo Filistianyu khekela nyu aphu no si lati.”

Tur

⁹ Npugü le zo, “Tur temi le mu lo muni laso, lo tsügenyu ale shaja pe anyugun tsütsentsüti. Anyugun le senye apentha zen-o Edom kazü ki do thyüla, lo anyugun le kepvüshen gwaketho kethyü tsü thenmvu.

¹⁰ Tsügenyu ale mah nipe Tur nyida chwida gen shüo a-chwida kekhwen roshe lati.”

Edom

¹¹ Npugü le zo, “Edom temi le mu lo muni laso, tsügenyu ale shaja pe anyugun tsü tsentsüti. Anyugun le anyugun tsasizen Israel nyu hü lo shwikenjün pe anyugun himvushü la. Anyugun nyunkenta le a-keni ndi, tson-o tsüno ndi lamvu.

¹² Tsügenyu ale mah nipe Teman nyida gen shüo Bozrah chwida kekhwen roshe lati.”

Ammon

¹³ Npugü le zo, “Ammon temi le mu lo muni laso, lo tsügenyu ale shaja pe anyugun tsü tsentsüti. Anyugun le kazü lokethün nrün genyu terikethyü ka Gilead nyu tenunyu nyuphukepvü nyue sü.

¹⁴ Tsügenyu ale mah nipe Rabbah nyida chwida gen shüo a-chwida kekhwen dan roshe lati. Tsüsiki teri jon nyü nra nhu kethyü le binti, lo kega kethyü le tsangkenbu terhi hontse ti.

¹⁵ Anyugun rajagü lo a-kedadan le do thyü gü lati.”