Salmos 1 - CHUYA QELLQA La Biblia en Quechua de Ayacucho 2012

PUNTA KAQ LIBRO (1-41) Cheqap kusikuymanta

¹ Mayna kusisqam mana allin runakunapa umachakuyninta mana chaskiq runaqa, payqa manam huchasapa runakunapa kawsasqanpipas purinchu, nitaqmi Diosmanta burlakuqkunawanpas hukllawakunchu.

² Chayna runaqa, Tayta Diospa kamachikuyninpim kusikun, Tayta Diospa kamachikuyninpim tuta punchaw yuyaymanan.

³ Chayna runaqa, yarqapa patanpi plantasqa sacha hinam, tiempollanpi ruruq sacha hinam, llaqenkunapas manam chakinchu, tukuy ima ruwasqanpas allinmi lloqsin.

⁴ Mana allin runakunam ichaqa, wayrapa apasqan qopa hina kanqaku.

⁵ Chayna runakunaqa, juicio punchawpipas manam hatarimunqakuchu; manataqmi chuya runakunapa huñunakuyninmanpas yaykunqakuchu.

⁶ Tayta Diosmi reqsin chuya runakunapa imaynam kawsasqantaqa, mana allin ruwaqkunam ichaqa puchukanqaku.