TƐRƐCƐ 1 - UTAKADA TIJILO

Tɛrɛcɛ tu na Aa Rɛcɛ Atwa Isrɛl Hiiŋ

¹ Nazhɛ AGWANGWAMA jɛmɛ n-ndumwa no Moses na amɛ udulo tu'ulwatagwụ nụ ụshɛka Sainai, nụ ụjita uhiiŋ nu upiana uyebi nu uywa uyebi na ta atwa Isrɛl banɛ na cɛnjɛ ti Ijipti, bɛɛ hiɛŋ,

² Rɛta ma atwa amwamwa keeni alamụ atwa Isrɛl hwɛɛ, ahiɛba na Aron. 'Nyata ma nzeci me etwenyi elele ohiuhiu ohiuhiu aba,

³ te kwuni na atwa na tizhɛla ta shiywa sha aba shi tuwo woshi i zhɛ geri-be-eshe, anaa na eri a nda ujasa hwɛɛ orubwo orubwo.

⁴ Ga atwa na shɛ ehiu nhwaŋ a bananjɛ atwa oko oko nụ ụlamụ we elele maa e hi medenji maa e hi mbiyeni.

⁵ Nzeci ma atwa na shɛ ehiu na alamụ ata a na kaa ee teri maa e hi mbiyeni ugondu ata na: Bụtụ na ee teri nụ ụlamụ Rubɛn i shɛ gɛ Ɛlizu yɛu-ye-eyi Shɛdɛu.

⁶ Bụtụ na ee teri nụ ụlamụ Simion, i shɛ gɛ Shɛlumiɛl yɛu Zurishadai.

⁷ Bụtụ na ee teri nụ ụlamụ Juda, i shɛ ga Nashon yɛu Aminadab.

⁸ Bụtụ na ee teri nụ ụlamụ Isaka, i shɛ ge Netanɛl yɛu Zuar.

⁹ Bụtụ na ee teri nụ ụlamụ Zɛbulon, i shɛ gɛ Ɛliab yɛu Hilon.

¹⁰ Bụtụ na ee teri nụ ụlamụ Ifrem na shɛ yɛu Josɛf, i shɛ gɛ Ɛlishama yɛu Amihud. Bụtụ na ee teri nụ ụlamụ Manasɛ, i shɛ ga Gamaliɛl yɛu Pidazu.

¹¹ Bụtụ na ee teri nụ ụlamụ Bɛnjamin, i shɛ ga Abidan yɛu Gidioni.

¹² Bụtụ na ee teri nụ ụlamụ Dan, i shɛ ge Ehieze yɛu Amishadai.

¹³ Bụtụ na ee teri nụ ụlamụ Ashɛ, i shɛ ge Pegiɛl yɛu Okran.

¹⁴ Bụtụ na ee teri nụ ụlamụ Gad, i shɛ ge Iliasaf yɛu Dɛuyɛl.

¹⁵ Bụtụ na ee teri nụ ụlamụ Naftali, i shɛ ga Ahira yɛu Inan

¹⁶ Atwa ga aba shɛ ehwurembe na amwamwa alamụ eshi aba a na kaa ee teri na tu'ulwatagwụ ta atwa Isrɛl.

Ufwugwo wa Atwa na Banɛ na Alamụ Ga na

¹⁷ Atwa ga umpwa-na-ba-eyebi, aba mbiyeni Moses keeni Aron,

¹⁸ maa a suyanɛ tu'ulwatagwụ ta ata kpaaŋ urubwo uko nụ ụjita uhiiŋ nu upiana uyebi. E 'nyeci nzeci ma aba na alamụ aba keeni amwamwa aba. A rɛcɛ atwa na tizhɛla ta shiywa sha aba shi tuwo woshi i zhɛ geri-be-eshe, ee nyeci nzeci ma aba nu utakada,

¹⁹ nu gana na ta AGWANGWAMA peni Moses unu. Nụ ụshɛka Sainai, baa rɛcɛ atwa ata.

²⁰ Etwenyi na aa rɛcɛ nzeci ma aba na awaŋnɛ alamụ Rubɛn, yɛu-ye-eyi Jekob ihiiŋ a na shiywa sha aba shi tuwo woshi i zhɛ geri-be-eshe, a na kaa waŋnɛ ujasa tɛnda, anaa na ee 'nyeci nzeci ma aba ohiuhiu ohiuhiu nu gana na te edenji amwamwa nhwaŋ me eshi aba namɛ na:

²¹ Ufwugwo wa atwa ụlamụ Rubɛn namɛ igbɛɛ-woshi-ni-bɛ-tɛtu-na-akpakwụ-eyebi-ni-dipi-yebi (46,500).

²² Atwa ụlamụ Simion, a na shɛ awaŋnɛ amwamwa nhwaŋ me eshi aba a na shɛ etwenyi elele na shiywa sha aba shi tuwo woshi i zhɛ geri-be-eshe anaa na waŋnɛ ujasa tɛnda:

²³ Ufwugwo wa atwa ụlamụ Simion hwɛɛ namɛ igbɛɛ-woshi-ni-bɛ-cinjishi-na-akpakwụ-ecihiŋ-ni-dipi-yebi (59,300).

²⁴ Atwa ụlamụ Gad, a na shɛ awaŋnɛ amwamwa nhwaŋ me eshi aba a na shɛ etwenyi elele na shiywa sha aba shi tuwo woshi i zhɛ geri-be-eshe anaa na waŋnɛ ujasa tɛnda:

²⁵ Ufwugwo ụlamụ Gad hwɛɛ namɛ igbɛɛ-woshi-ni-bɛ-yebi-na-akpakwụ-atụndatụ-nu-dupu (45,650).

²⁶ Atwa ụlamụ Juda, a na shɛ awaŋnɛ amwamwa nhwaŋ me eshi aba a na shɛ etwenyi elele na shiywa sha aba shi tuwo woshi i zhɛ geri-be-eshe anaa na waŋnɛ ujasa tɛnda:

²⁷ Ufwugwo ụlamụ Juda hwɛɛ namɛ igbɛɛ-talacɛ-ni-bɛ-cenje-na-akpakwụ-atụndatụ (74,600).

²⁸ Atwa ụlamụ Isaka, a na shɛ awaŋnɛ amwamwa nhwaŋ me eshi aba a na shɛ etwenyi elele na shiywa sha aba shi tuwo woshi i zhɛ geri-be-eshe anaa na waŋnɛ ujasa tɛnda:

²⁹ Ufwugwo ụlamụ Isaka hwɛɛ namɛ igbɛɛ-woshi-ni-bɛ-cenje-na-akpakwụ-eyebi (54,400).

³⁰ Atwa ụlamụ Zɛbulon, a na shɛ awaŋnɛ amwamwa nhwaŋ me eshi aba a na shɛ etwenyi elele na shiywa sha aba shi tuwo woshi i zhɛ geri-be-eshe anaa na waŋnɛ ujasa tɛnda:

³¹ Ufwugwo ụlamụ Zɛbulon hwɛɛ, namɛ igbɛɛ-woshi-ni-bɛ-tindɛtu-na-akpakwụ-ecenje (57,400).

³² Atwa ụlamụ Ifrem, a na shɛ awaŋnɛ amwamwa nhwaŋ me eshi aba a na shɛ etwenyi elele na shiywa sha aba shi tuwo woshi i zhɛ geri-be-eshe anaa na waŋnɛ ujasa tɛnda:

³³ Ufwugwo ụlamụ Ifrem hwɛɛ namɛ igbɛɛ-woshi-na-akpakwụ-eyebi-ni-dipi-yebi (40,500).

³⁴ Atwa ụlamụ Manasɛ, a na shɛ awaŋnɛ amwamwa nhwaŋ me eshi aba a na shɛ etwenyi elele na shiywa sha aba shi tuwo woshi i zhɛ geri-be-eshe anaa na waŋnɛ ujasa tɛnda:

³⁵ Ufwugwo ụlamụ Manasɛ hwɛɛ namɛ igbɛɛ-umpwa-ni-bɛ-cihiŋ-nu-kpakwụ-uko (32,200).

³⁶ Atwa ụlamụ Bɛnjamin, a na shɛ awaŋnɛ amwamwa nhwaŋ me eshi aba a na shɛ etwenyi elele na shiywa sha aba shi tuwo woshi i zhɛ geri-be-eshe anaa na waŋnɛ ujasa tɛnda:

³⁷ Ufwugwo ụlamụ Bɛnjamin hwɛɛ namɛ igbɛɛ-umpwa-ni-bɛ-cenje-na-akpakwụ-ecenje (35,400).

³⁸ Atwa ụlamụ Dan, a na shɛ awaŋnɛ amwamwa nhwaŋ me eshi aba a na shɛ etwenyi elele na shiywa sha aba shi tuwo woshi i zhɛ geri-be-eshe anaa na waŋnɛ ujasa tɛnda:

³⁹ Ufwugwo ụlamụ Dan hwɛɛ namɛ igbɛɛ-talacɛ-nu-boo-ko-na-akpakwụ-atatụ-ni-dipi-yebi (62,700).

⁴⁰ Atwa ụlamụ Ashɛ, a na shɛ awaŋnɛ amwamwa nhwaŋ me eshi aba a na shɛ etwenyi elele na shiywa sha aba shi tuwo woshi i zhɛ geri-be-eshe anaa na waŋnɛ ujasa tɛnda:

⁴¹ Ufwugwo ụlamụ Ashɛ hwɛɛ namɛ igbɛɛ-woshi-na-akpakwụ-ecenje-ni-dipi-yebi (41,500).

⁴² Atwa ụlamụ Naftali, a na shɛ awaŋnɛ amwamwa nhwaŋ me eshi aba a na shɛ etwenyi elele na shiywa sha aba shi tuwo woshi i zhɛ geri-be-eshe anaa na waŋnɛ ujasa tɛnda:

⁴³ Ufwugwo ụlamụ Naftali hwɛɛ namɛ igbɛɛ-woshi-ni-bɛ-cihiŋ-na-akpakwụ-ecenje (53,400).

⁴⁴ Atwa ga aba shɛ ehwurembe alamụ Isrɛl umpwa-na-ba-eyebi, a na go Moses, na Aron suji ee medenji atwa aba timbiyono na tɛrɛcɛ ta ata. Bụtụ bụtụ shɛ ụtarụtụ ihwɛ bishi bwa.

⁴⁵ Ufwugwo wa atwa Isrɛl te kwune na atwa elele na waŋnɛ ujasa tɛnda. Hwɛɛ gana na tu nhwaŋ me eshi aba mu namɛ,

⁴⁶ Ufwugwo wa aba hwɛɛ namɛ igbɛɛ-akpakwụ-atatụ-ni-bɛyebi-na-akpakwụ-ecenje-ni-dipi-tɛtu (603,550).

Iwɛ Alivai Na

⁴⁷ A rɛcɛ shɛ ụlamụ wa Alivai na ashashɛ alamụ vwɛ o.

⁴⁸ AGWANGWAMA hiɛŋ Moses,

⁴⁹ Ta rɛta ụlamụ wa Alivai, na aka na aba rɛta atwa na waŋnɛ ujasa tɛnda na alamụ atwa Isrɛl vwɛ o.

⁵⁰ Ama ga shɛ Alivai ebi teri iwɛ udulo tu'ulwatagwụ, ti iwɛ i'wɛŋni'wɛŋni ibwɛ hwɛɛ. Aba shɛ a na 'waŋna uŋ, ti i'wɛŋnɛ ibwɛ hwɛɛ. Aba shɛ o no tono nu bwa maa a na nda ugondu. Aba shɛ a gɛgaga to rungwutwonu uŋ.

⁵¹ Aka elele na ehi mwo tahaŋnụ, Alivai aba zhɛ o kwungwulo uŋ. Aka elele na ehi ci ofwo na maa hi zokwu, Alivai aba zhɛ e shikicingo uŋ. Binya bụtụ be elele na zhajɛ maa gwumwongonu nu bwa, ga kwụnɛ bụ.

⁵² Ga atwa Isrɛl vwɛ shikecenji shidulo sha aba bụtụ bụtụ nu ugba ubwa, bụtụ bụtụ ga nama na atwa ubwa no ofwo igɛrigɛ ibwɛ.

⁵³ Ama ga shɛ Alivai kiri jwe ugba wa aba to gwumwongonu udulo ata u tiseyida, maa a na ngbaraka uŋ maa kede bụtụ be elele gwumwongonu nu bwa o, iwɛ maa kede isɛbwɛ mi ubi tu'ulwatagwụ ta atwa Isrɛl hwɛɛ o.

⁵⁴ Atwa Isrɛl njɛ ga gana na ta AGWANGWAMA peni Moses unu hwɛɛ.