2 TƐSƐLONIKA YEBI 1 - UTAKADA TIJILO

¹ Go Poul, na Silvanos keeni Timoti, no ofwo tụ'ụlwa-tụ-ụhiɛŋshɛ-AGWANGWAMA tu na tu namɛ ni Tɛsɛlonika, tu na tɛ shɛ ma tu ta Agwatana na shɛ Bishi tu, keeni Agwangwama tu Jisus Krast.

² Go tulubo-ti-biye keeni amɛ-olom na banɛ no olugwo Agwatana na shɛ Bishi keeni Agwangwama tu Jisus Krast tu nama ne hiŋ.

Ụshɛrɛya Tụdụma na Aka Tugwure tu Krast

³ A-miaụŋ-mo-bino mi na amɛ Krast, tɛ shɛ tu na nda ugwoje na Agwatana aka elele iwɛ hiŋ, iwɛnɛ ti yee teni cɛŋ. Iwɛnɛ te rishe ri hiŋ tɛtɛtana ra kaana ugombo tebiye tebiye, keeni tulubo tu na ehi momo lubonu hwɛɛ, ta kaana du ugombo duwa duwa.

⁴ Iwɛbɛ po ata busa iwɛ hiŋ na tụ'ụlwatagwụ-tụ-ụhiɛŋshɛ-Agwangwama, iwɛ isɛbwɛ hiŋ ti'ima keeni rishe ri hiŋ tɛtɛtana keeni tɛshɛka tu na aa hiɛ shɛka, keeni ụbaụta na kaa ahia nda, ehi le kaa egiri.

⁵ Inɛ gɛ ibɛ shɛ useyida tugom maa ụshɛrɛya na Agwatana a duma namɛ shiriri, iwɛnɛ baa hiɛ rɛcɛ maa hi teni cɛŋ na Cɛnjɛ-ta-tugwama tu bwa, tu na ahia nda ụbaụta iwɛ tuba.

⁶ Gana na ti yaa shɛ iyi nɛ teni cɛŋ maa Agwatana zhɛ a shapa ụbaụta maa tụpana atwa na ma hi nda umungwuta,

⁷ maa tuba ma hi pana ụhinjanụ ahiɛba na hia nda ụbaụta no tu, na aka na ee kepishinji hwuŋ Agwangwama tu Jisus maa banɛ na azuba, na atumwa ubwa ukpahiŋ ụ'wụtụ,

⁸ na bụratụ bu ulwa, maa tụpana atwa na lacɛ Agwatana keeni atwa na hwụjɛ shɛ unu wa Anabarɛ Ebiye Agwangwama tu Jisus tụlụkpashɛ.

⁹ Ɛ zhɛ a pana aŋ ulwapɛ na shɛ ufwu unyizo-nom tɛnda, ɛ zhɛ a kapana aŋ uhwaŋna wa agba Agwangwama maa kede a nama nu ụjɛrụma ukpahiŋ ubwa o.

¹⁰ Inɛ gɛ zhɛ ya nda hwuŋ nụ ụjita ata bee ci maa atwa ubwa tijilo peni bu ụjɛrụma, ta atwa na kaa tɛtanɛ bu rishe hwɛɛ zhɛ a kwụba bụ, yɛɛ zhɛ ya dama aŋ. (Hi zhɛ du hia nama hwuŋ na aba, iwɛnɛ ahiɛ tɛtanɛ tiseyida tu na eti le rishe).

¹¹ Iwɛ inɛ gɛ ata hi ndana shidua ɛgbɛɛ, iwɛ maa ga Agwatana tu ihiɛ njɛ maa hi teni cɛŋ nu ụhiɛŋshɛ ata baa hi suyanɛ, maa ma hi ụrɛcɛngana kaa tukwulana ti hiŋ ti biye hwɛɛ, keeni ugondu hiŋ u rishe-tɛtɛtana tedure nu ukpahiŋ ubwa.

¹² Iwɛbɛ po ata nda adua iwɛ maa a mụnɛ izeci ya Agwangwama tu Jisus ụjɛrụma na amɛ hiŋ, maa hi leshiji du ụjɛrụma tedure nu bwa, nu gana na to tulubo-ti-biye ta Agwatana tu keeni ma tu ta Agwangwama Jisus Krast tu namɛ.