2 SAMUƐL UYEBI 1 - UTAKADA TIJILO

Ge Devid Hwụjɛ Unabarɛ Tu'wo tu Soul

¹ Na aba na tu go Soul 'wi, ge Devid gwure ti bɛɛ kwunɛ atwa Amɛlɛk, baa jɛjɛ ni Ziklag ijitɛ iyebi.

² Nụ ụjita ụtatụ, baa kwụbɛ bụtụ bu ko na banɛ nu ugba we ejeshi Soul. Tugwuno tu bwa tu dwatwagwụ, ahwayɛ zwegeni bu nu uhiuhiu. Aka na ti bee ci Devid, bee ubi ụpɛshɛka ubwa na cɛnjɛ baa 'walụ bụ a'walụ tugwama.

³ Ge Devid heŋteni bu, bɛɛ hiɛŋ, Cee abụ banɛɛ? Bɛɛ jishijɛ bụ, bɛɛ hiɛŋ, M banɛ nu ugba we ejeshi atwa Isrɛl, tubananganɛ Ngaa bananganɛ bana.

⁴ Ge Devid hiɛŋ bụ, M mbishi de gana na ujasa ata shɛ. Bɛɛ jishijɛ, bɛɛ hiɛŋ, Ejeshi tu gezhigeni ujasa ata, aa kwụnɛ du kaa atwa tu gembi ufwugwo. A kwụnɛ du Soul ti yɛu ibwɛ go Jonatan.

⁵ Ge Devid heŋteni bu, bɛɛ hiɛŋ, Gana naa kwuŋ ebi mepi maa a kwụnɛ Soul ti yɛu ibwɛ go Jonatann?

⁶ Usemberi ata jishijɛ bụ, bɛɛ hiɛŋ, N njɛ ikpɛsu tu Ngaa namɛ ni Ishɛmɛ Gilboa, Ngaa kwụbɛ tu go Soul ba layɛtana isɛnu ibwɛ. Ngaa kwụbɛ kaa asụcɛ ihɛŋtu ujasa, ta asụcɛ idɛkwɛ ya atwa i'ime tu, to o gwumwongonu nu bwa.

⁷ Tu baa mbiyanɛ baa n kwụbɛ, baa n suyanɛ. Ngee leni bu, Ngɛɛ hiɛŋ bụ, Oo, Iyɛri Gamba na.

⁸ Bee n heŋteni, bɛɛ hiɛŋ, Gabụ gaaba na kwuuŋ? Ngɛɛ jishijɛ bụ, Ngɛɛ hiɛŋ, N shɛ bụtụ ba Amalɛk.

⁹ Bɛɛ n hiɛŋ, Kaanɛ izhɛ maa n kwụnɛ! Iwɛnɛ ta a n gwụcɛnjɛ tebiye, ihwungwɛ mi kaa ta dwa sụ o.

¹⁰ Ngee keeni ga izhɛ pu bwa Ngaa kwụnɛ bụ, iwɛnɛ ti Ngee mepi maa bi zha shɛ kwukwuŋ bo bino ya gana na tu boo loyo. Nazhɛ Ngee peshinji udara ata bee ge peteni nu uhiuhiu ubwa keeni ikereweŋ ɛtɛ baa ga shanɛ nu u'ala ubwa, ibɛ gɛnɛnɛ Ngee suje epe no ofwo bu gabụ iyɛri mi.

¹¹ Ge Devid dwetweji tugwuno tu bwa, ta atwa elele na namɛ nu bwa du dwetweji tugwuno ta aba hwɛɛ iwɛ amɛ-tụhaŋtụ.

¹² Oo to-ụkwụla, aa cwɛ-u'wo, aa njɛ ezumi tutu ụrụmɛ iwɛ Soul, ti iwɛ Jonatan yɛu ibwɛ, ti iwɛ atwa AGWANGWAMA, keeni iwɛ ihwɛ Isrɛl, iwɛnɛ ta a kwụnɛ aŋ no otokwobi.

¹³ Ge Devid heŋteni usemberi ata na 'waŋnanɛ bụ unabarɛ ata, bɛɛ hiɛŋ bụ, Cee kwuŋ abụ banɛɛ? Bɛɛ jishijɛ bụ, bɛɛ hiɛŋ, N shɛ yɛu bụtụ ba Amalɛk bu ko na ba nda ulashɛ.

¹⁴ Ge Devid hiɛŋ bụ, Iwembe po inyɛsɛ bɛ shɛ shɛ maa kwụnɛ bụtụ na AGWANGWAMA dudugeni manɛbɛ mu tugwamaa?

¹⁵ Ge Devid suyanɛ bụtụ bwa bu ko, bɛɛ hiɛŋ bụ, Zhaga kwụna bụ. Ibɛ bụtụ ata po bu ga iyi baa kwụnɛ bụ.

¹⁶ Ge Devid hiɛŋ bụtụ ata, Tijama to tu'wo tụ bụ tu namɛ nu uhiuhiu bu. Iwɛnɛ po gabụ bɛ jɛmɛ nu unu bu maa gabụ bụ kwụnɛ bụtụ na AGWANGWAMA dudugeni manɛbɛ mu tugwama.

U'wo na Ge Devid Cwɛ iwɛ Soul Keeni iwɛ Jonatan

¹⁷ Ge Devid twanɛ Soul keeni yɛu ibwɛ go Jonatan u'wo ga ụzhɛla.

¹⁸ Bɛɛ hiɛŋ, Ge mbisegeni du atwa Juda azunga u'wo ata. E 'nyeci aŋ du nu utakada Jasha, ɛɛ hiɛŋ,

¹⁹ Oo Isrɛl, kwụba gana na ta a kwụnɛ atwa bụ ụjɛrụma ne tikpekwu tụ bụ, kwụba gana na ta atwa ukpahiŋ 'waŋtatangwụ!

²⁰ Ta duma ma iwɛ ibɛ kwukwuŋ nu Gat, ta ananga iŋ ma kwukwuŋ ni ihwɛŋnɛ ya amɛ ụshɛpwụ Ashkɛlon, iwɛ aka na miaụŋ-mo-o ma Afilistia mi zhɛ ma nda unyasa, iwɛ aka na miaụŋ ma atwa ata na jeji shi teleyi mi zhɛ mu na busa.

²¹ Kede eshilo ngbeni ya nshama mi Gilboa, okwo cime kede tu 'weleni mu ya kwukwuŋ. Ga cɛnjɛ tu ntuma ta muba tɛ shɛ undolo! Iwɛnɛ ti yaa shɛ apata aa njɛ shabula shɛ ujasa sha atwa ukpahiŋ ụpụrụsa. A shananjɛ shɛ ya kaa abula ujasa Soul manɛbɛ o.

²² Uta Jonatan peni shi mehieŋ ma atwa na aa kwụnɛ keeni manɛbɛ ma atwa na 'yajɛ ikɛnyi ya aba o, utokwobi Soul kaa gwuri shi bohondo.

²³ Go Soul no Jonatan a mama kwulanganụ, oo momo lubonu okwo nu uraiŋ tiya kwo kaa no tu'wo, o bogwu su o. E vwengenji ee hwuri egbeji, aa 'yajɛ kaa ikɛnyi ee hwuri izeci.

²⁴ Ahiɛba miaụŋ-mo-o ma atwa Isrɛl, twana ma Soul u'wo, ubwa ihi urigeni i'wɛŋnɛ ishenje ya azhɛgba, ubwa kaa njɛ i'wɛŋnɛ hiŋ i tu'urugono tisemberi na azhɛnarɛya, keeni odworo.

²⁵ Kwụba ma gana na ta a kwụnɛ atwa ikɛnyi na ashashɛ ujasa, a kwụnɛ Jonatan, bee shiri ni ishɛmɛ.

²⁶ Ɛ-yɛu-bino mi go Jonatan, amɛ mi hashɛganụ iwɛ bụ tebiye, iwɛ bụ kaa n kwụlanɛ tebiye. Tulubo tu na ebu n lubi tu hwuleji, tu hwuri du tulubo tu na bụtụ bo lubo biyikwo.

²⁷ Kwụba ma gana na ta atwa ikɛnyi 'wegeni, ibɛ i'wɛŋnɛ ya aba ujasa njɛ ufwu.