Mataio 6 - A Buk 1896 (Bible Portions)

6. NA PAKANA.

¹ Muat katom, ma koniku muat pet a puana a numuat petoduru na ra matadiat a tara ba diat a bobo muat uni: ba lenkuma pa numuat ta wedok ma ko ra Tamamuat i ki u ra maua.

² Ba u pet a num maramari, koniku ip a tauru na muka tam, lenkuma diat a kum tenawaruwaruka diat peti u ra kum ruma na lotu ma u ra kum akapi kai, ba a tara diat a pira walaua diat uni. Iau piri ligtatuna ta muat, Diat a rakanpa a nudiat wedok.

³ Ui kai, ba u pet a num maramari, koniku a maira na limam in nunura a lig ba a waot na limam i peti:

⁴ ba di pet‐inoi ku a num maramari: ma ra Tamam, ia ba i bobo a lig i tana ino, in balui tam.

⁵ Ba muat arig koniku muat pet len diat a kum tenawaruwaruka: kuma diat nem akiti lena diat turu ma diat arig u ra kum ruma na lotu ma u ra kum inuk na akapi, ba a tara din bobo diat. Iau piri ligtatuna ta muat, Diat a rakanpa a nudiat wedok.

⁶ Ui kai, ba u arig, ruk u ra num ruma, ma ba u bălbălat mun a num bonanaka, un arig korom a Tamam i tana ino; ma ra Tamam, ia ba i boboi a lig i tana ino, kura in balui tam.

⁷ Ba muat arig koniku mogoro na pirapira bia ku uni, len diat a Tara‐igen diat piri: kuma diat kanapi lena din walogoro diat ba mogoro a nudiat pirapira.

⁸ Koniku muat welara ma diat: kuma a Tamamuat i nunura a kum lig i ka korom muat, ba pa muat arig i utbai.

⁹ Kuma muat a arig lenkumi: Tamamiat u ra maua auakak din ururu u ra yam. In wan urin a num nakokon.

¹⁰ Awakak ba din taram korom ui u ra rakrakan wanua rap, lenkuma diat taram korom ui u ra maua.

¹¹ U ra bug kumi un tari ta miat a miat utna.

¹² Koniku mag miat u ra numiat petakakai, lenkuma pa miat mag diat diat petakakai korom miat.

¹³ Koniku ben miat u ra walwalam; un walaun miat ko ra akaina lig: kuma a num ku a Nakokon, ma ra Dekdek, ma ra Ururu, pa in rap.

¹⁴ Ba pa muat mag diat a tara u ra nudiat petakakai korom muat, a Tamamuat i ki u ra maua pa in mag muat kai.

¹⁵ Ba muat mag diat a tara u ra nudiat petakakai, a Tamamuat kai in mag muat u ra numuat petakakai.

¹⁶ Kumi kai, ba muat wawel, koniku in tumtumel a matamuat len diat a kum tenawaruwaruka; kuma diat wagilagila a matadiat ba in pua uni korom diat a tara lena diat wawel. Iau piri ligtatuna ta muat, Diat a rakanpa a nudiat wedok.

¹⁷ Ui kai, ba u wawel, un ku a lorim, un ki a matam;

¹⁸ ma koniku a num wawel in pua korom diat a tara, korom a Tamam ia i tana ino: ma ra Tamam, ia ba i bobo a lig i tana ino, kura in balui tam.

¹⁹ Koniku muat barata ugai korom muat a utna u vuravura; kuma a poropo ma ra karakara i anakaruai, ma ra tara tatok diat reguai ma diat ualogi:

²⁰ Muat a barata ugai a utna u ra maua ku; kuma a poropo ma ra karakara pa in anakaruai iai, a tara tatok kai pa diat a reguai iai ma ualogi:

²¹ kuma a balam in tana u ra bual kuma a num utna i tana uni.

²² A matadi a lamp i ra panidi: ba i wakak a matam in teg a panpanim rap ma ra kapakapa.

²³ Ba pikoina a matam in teg a panpanim rap ma ra boboto. Ba i boboto ku a kapakapa kuma i tana u ra balam, a galapi ma a boboto kuma!

²⁴ Pa ta muana in taram larapai korom ru tadaru; kuma in tebua ra pa diara, ma ra kai in mari; in taram korom ra ma ra kai in wabulbul i. Muat kana taram larapai korom Nara ma ra utna kai.

²⁵ Ia kuma iau piri ta muat uni lena, Koniku muat nunukdokodoko muat u ra numuat lalaun, lena, awa muat an ani, ba awa muat inimi, ma u ra panimuat kai ba awa muat a papai uni. Pa i gala duk a lalaun u ra utna na anian? I gala bulug a panidi u ra malu, ni?

²⁶ Muat a bobo diat a kum pika na lagit, kuma pa diat lămlămirai, pa diat rotkutu, ma pa diat walaig a utna u ra ruma‐na‐utna; ma ra Tamamuat i ki u ra maua, i tabara diat. Ma pa muat ka akit duk u diat?

²⁷ O oi na pa muat, ba i nunukdokopa i, in pam a wiyok larapai pulik a nuna lalaun?

²⁸ Ma lelawai muat garā kup a malu? Muat a nuk diat a kum pupu na diwai, diat taua lelawai; pa diat papam, ma pa diat piri malu:

²⁹ ma iau piri ta muat lena, Solomon u ra mărina rap, pa i kop ta win a malu i welara ta pa diat kumi.

³⁰ Ba Nara i wakopta a kum uali na bual lenkumi, ia ba i tana kumari, ma na buru kai din oguai u ra raran, pa in wakopta muat duk, a kum tenanuru kinalik ku muat?

³¹ Kăbi, koniku muat nunukdokodoko muat uni, lena, awa muat an ani? ba awa muat a papai un muat?

³² Kuma a kum Tara‐igen diat auarekup a kum lig lenkumi; ma ra Tamamuat i ki u ra maua i nunurai lena i ka korom muat a kum lig rap kumi.

³³ Muat an auare‐mukakup a nuna matanitu ma ra nuna petoduru; ma din tari waraut ta muat a kum lig rap kumi.

³⁴ Koniku muat nunukdokodoko muat u na buru: kuma na buru in nunukdokopai u ra nuna kum lig. I wewaot a bug a nuna akaina lig.