Mataio 4 - A Buk 1896 (Bible Portions)

4. NA PAKANA.

¹ Ma ra Niono i ben‐a‐toto Iesu u ra bil ba a tebaran in walam i.

² Ma ba i wawel wat‐na‐no‐bug na keke ma wat‐na‐no bug na marum, i molo marakam.

³ Ma ra tenawalwalam i wan korom i, ma i piri tana, Ba na Tun Nara ui, un nakakon a kum wat bi lena a mandrai ia.

⁴ Iesu i piri tana, Di a timutai lenkumi, A tara pa diat lalaun u ra mandrai ku, u ra pirapira rap ia i pari ko ra wan Nara.

⁵ A tebaran i benpa i ma ut u ra taman tabu, ma i wakita i u na te, u ra papara ruma na wetu,

⁶ ma i piri tana, Ba na Tun Nara ui, un irok pari: kuma di timutai lenkumi, In tula diat a nuna kum agelo un ui: ma diat a lo ui u ra limadiat, kaduk un tukapa a kakim un ta wat.

⁷ Iesu i piri tana, Di a timutai kai lenkumi, Koniku un walam Ieova a num Kalou.

⁸ A tebaran i benpa i balet u na te un ta tagai pi, ma i weai tana a kum matanitu rap u vuravura ma ra nudiat măramăra rap kai;

⁹ ma i piri tana lenkumi, A kum lig rap bi ag tari tam, ba un tutudug ma un lotu korom iau.

¹⁰ Iesu i piri tana, Un wan igen Satan, kuma di a timutai lenkumi, Un tutudug korom Ieova, ma un taram korom ia ku.

¹¹ Ma ra tebaran i wan talura i ma ut; ma boboi, a kum agelo diat wan korom i, ma diat balura i.

¹² Ma ba i walogoropai mun lena di taramarua Ioane, i wan talili u Kalilaia;

¹³ ma ba i wan taka Nasaret, i ki Kapanaumi, ba na ra tai, u ra pitpit u Saboulon ma Nafitalai:

¹⁴ ba in wewaot uni a pirapira Isaia a parofita i wapuamukatau uni lenkumi,

¹⁵ A wanua Saboulon ma ra wanua Nafitalai, na tai tala, u ra papara Ioradan urog yai, Kalilaia a nu ra matanitu igen.

¹⁶ A kum tara ba diat ki u ra boboto diat bobo a gala na kapakapa, a kapakapa bulug i irok pat korom diat kuma diat ki u ra bual na minat, ma ra bual na nio ra minat kai.

¹⁷ Tak u ra pupukai kuma Iesu i wawera kabin, ma i piri lena, Muat a nukpuku muat; kuma i marawai ma ku a matanitu ko ra maua.

¹⁸ Ma ba i wawal nokono, na ra tai Kalilaia, i bobo diara Simon, di patapai a iana bulug Petero, ma Andrea dina, ba diara nā bene; kuma ru tenatai diara.

¹⁹ I piri ta diara, Muru patap un iau, ma ag pataran muru lena, ru tenatai muru korom diat a tara.

²⁰ Ma diara paki‐akakaruai ma ut a nudiara bene, ma diara patap un i.

²¹ Ba i wan taka yai i bobo ruadi bulug, Iakobo na tun Sebedaio, ma Ioane dina, ditul baban u ra tampag ma Sebedaio a tamadiara; ma i ben akilapa diara.

²² Ma diara wan talurai ma ut a tampag ma ra tamadiara, ma diara patap un i.

²³ Ma Iesu i wan wetalut u ra bual rap Kalilaia, ma i wawera u ra nudiat kum ruma na lotu, ma i wawera u ra wewapua‐awakak i ra matanitu, ma i wakadelpa diat a tara ko ra tiba na ugan a malapag ma tiba na ugan na gunugut.

²⁴ Ma i winarag uni a iana u ra bual rap Siria: ma diat ben‐a‐rapa diat a tara diat malapag korom i; diat ba tiba na ugan a malapag i manog diat, ma ra gunugut kai, diat kai ba a tebaran i og diat, ma diat kuma diat loglog, ma ra kum paralutiko kai, ma i wakadelpa diat.

²⁵ Ma mogoro na tara diat patap un i taka Kalilaia, ma Dekapoli, ma Ierusalem, ma Iudaia, ma tak u ra papara Ioridan urog yai.