Mataio 26 - A Buk 1896 (Bible Portions)

20. PAKANA MA 6.

¹ Ba Iesu i pira rapta a kum pirapira kumi, I wapua diat a nuna tara‐na‐wawera lenkumi,

² Muat nunurai lena dat a witamai na wan‐likai u logra, ma di taram‐aruai na Tu‐ra‐muana ba diat an akwati u ra kabai.

³ Ma diat a kum tadaru na pinapet ma ra kum takana a nu ra tara, diat tolug ugai u ra ruma a nu ra tadaru na pinapet, a yana Kaiafa;

⁴ ma diat pigit a maden an Iesu lena diat a pam i u ra walwalam ma diat a umpa i.

⁵ Ma diat piri lena, Koniku mun u ra witamai kaduk diat a kum tara diat a rekereke uni.

⁶ Ba Iesu i ki kubai Betania, u ra ruma a nun Simon a lepa,

⁷ rā tebuan i wan tutuga i, ba i kip ta la na alabasita, a awakak na dagi ma i gala akit a matana i tana uni, ma i laboi u ra in a lorina ba i ki na winagan.

⁸ A kum tara‐na‐wawera ba diat boboi diat pet na kămkămiak uni, ma diat lena, Di labo‐bia‐ruai ku urawa a lig bi?

⁹ Kuma ba di wiurai a dagi bi, din rakani uni ta mogoro na utna, din tari korom diat a kum tara diat kanau.

¹⁰ Ba Iesu i nunurai i piri ma ut ta diat, Lelawai kuma muat bilara a tebuan? kuma awakak a nuna pinapam i pami un iau.

¹¹ Kuma a kum kanau diat tana takum namuat; ma iau kai, pa ag tana takum namuat.

¹² Kuma i labo a polo bi u ra panig ba in pam tokono iau mai ba din punăg iau.

¹³ Iau piri ligtatuna ta muat, U ra rakrakan wanua rap ba di wawera uni u ra wewapua awakak kumi, a lig kumi kai a tebuan bi i a petai kura din wapua uni, a naruina.

¹⁴ Ma rā ko diat a winunu ma ruadi, a yana Iuda Isakariot, i wan korom diat a kum tadaru na pinapet,

¹⁵ ma i tiri diat lena, Awa kuma muat ligna tari tag ba ag taramarua i korom muat? Ma diat pupulupai tana ma tul a no pakan a măni.

¹⁶ Ma i tak u ra pupukai kuma i nunuk kup ta bug na kapkapana ba in taramarua i uni korom diat.

¹⁷ U ra mukana bug u ra witamai na mandrai pa ta leven, a kum disaipel diat wan korom Iesu, ma diat tiri lena, U nemi awai miat pam tokonoi kup ui, ba un anpai iai a utna na wan‐likai?

¹⁸ Ma i piri ta diat lena, Muat wan korom Tolig u ra taman, muat piri tana lenkumi, A Tenawawera i piri lena, i matiti ku a nug pupukai; miat ma ra nug tara‐na‐wawera miat a tolug ugai u ra wan‐likai u ra num ruma.

¹⁹ A kum disaipel diat pet lenkuma Iesu i tula diat uni, ma diat pam tokono a utna na wan‐likai.

²⁰ Ba malurap ma i ki na winagan ma diat a winunu ma ruadi a tara‐na‐wawera; ma ba diat wagan kubai i wapua diat lenkumi.

²¹ Iau piri ligtatuna ta muat, rā pa muat in ogopa iau.

²² Ma diat tapunuk akit uni; ma diat rap diat tiri kabin i ma ut lena, Tadaru, iau duk, o oi duk?

²³ I wapua diat uni lena, Ia ba mira wadorog ugai a ru limamira u ra kupep, ia kuma in ogopa iau.

²⁴ Na Tu‐ra‐muana i wan lenkuma di timu‐a‐mukatai: ma akaina lig korom ia ba i ogopa na Tu‐ra‐muana! I ka akit korom a muana kuma ba pa di buta i.

²⁵ Ma Iuda, ia ba i ogopa i, i tiri lena, Tenawawera, iau duk, o oi duk? I uruniauot tana U ā piri.

²⁶ Ba diat wagan kubai, Iesu i rakanpa a mandrai, ma i pirawadanpai, ma i bikweran‐apai; ma i tari ta diat a kum disaipel, ma i piri lenkumi, Muat pami, muat an ani; a panig kumi.

²⁷ Ma i rakanpa a la kai ma ba i karikpa mun i tari ta diat ma i piri lena, Muat rap muat inimi:

²⁸ kuma a kapig kumi u ra wepak, i talabo kup ta mogoro ba din unuai mai a petakakai.

²⁹ Iau piri ta muat, pa ag inimi balet a uai‐na‐vaine kumi, un ta bug na wanua kuma dat inim a matakinai ma muat u ra matanitu a nun Tamag.

³⁰ Ma ba diat kelekelepa mun diat pari u na taman, ma diat wan u ra tagai na kum Olive.

³¹ Ma Iesu i wapua diat uni lena, U ra marum kumi muat a tutukā rap un iau: kuma di a timutai lena, Ag rapu a tenawarua, ma diat rap a kăba sipi kura diat a wan weran.

³² Ma ba ag lalaun balet ăg muka ta muat u Kalilaia.

³³ Ma Petero i piri tana, Ba diat tutukā rap un ui, iau pa ăg tutukā.

³⁴ Iesu i piri tana, Iau piri ligtatuna tam, U ra marum ku kumi, ba a kereke pai kurakurekatu utbai, Un weworo kon iau tul a pakan.

³⁵ Petero i piri tana, Ba dara irua ugai ma ui, pa ăg weworo kon ui. Ma diat rap a tara‐na‐wawera diat piri lenkuma.

³⁶ Ma Iesu diat, diat wan karai tau u ra bual a yana Ketsemane, ma i piri ta diat a nuna tara‐na‐wawera lena, Muat ki kumin, iau ăg wan urog iai ba ăg arig.

³⁷ Ma i ben ditul Petero ma diara ru na tunalik Sebedaio, ma i tapunuk kabin, ma i lăklăkon tau a balana.

³⁸ Ma i piriāta ditul, A niog i tapunuk akit, i pot na minat ma: mutul ki kumin, dat a ki lauma.

³⁹ Ma i wan karai tau kinalik na muka, ma i puka wowop ma ra matana, ma i arig lenkumi, Oi, Tamag ba di rakan larapai a la kumi, awakak ba in wan igen kon iau: ma koniku di pet a lig ku ba iau nemi, a lig ku kag ba u nemi.

⁴⁰ Ma i wan talili korom ditul a disaipel, ma i bobo ditul lena ditul inep dumăn; ma i piri tan Petero, Le, pa mutul ki lauma liranpa iau u rā pakan a marum ku?

⁴¹ Mutul ki lauma ma arig kaduk mutul wan tau u ra wălwălam: pa i patut a niodi, i lumlum ku a panidi.

⁴² I wan balet ru pakan ma i arig lenkumi, Tamag, ba a lig kumi i kana wan igen ba pa ag inimi, ui ma ku un nakokon.

⁴³ Ma i wan talili, ma i bobo ditul lena ditul inep dumăn, kuma i tutuai a mataditul.

⁴⁴ Ma i wan talura ditul balet ma i wan igen, ma i arig tul a pakan, ma i piri balet welara na muka.

⁴⁵ Ma i wan talili korom ditul a disaipel, ma i piri ta ditul lena, Mutul a inep ku kumari, mutul a go: boboi, i marawai ma ku a pakan a bug, ma di ogopa na Tu‐ra‐muana u ra limadiat a kum tena‐petakakai.

⁴⁶ Mutul turu, dat a wan ma: boboi, ia ba i ogopa iau i matiti ku.

⁴⁷ Ma ba i piri kubai, boboi, Iuda rā pa diat a winunu ma ruadi, i wan pat ma diat a tara‐na‐kaiya diat weuru ma i ko diat a kum tadaru na pinapet ma ra kum takana a nu ra tara, ma diat lo a kum pakat ma ra kum măden.

⁴⁸ Ma ia ba i ogopa i i tari mun a wakinilag ta diat, ma i piri lena, Ia ba ăg dum i, kuma ia, muat pampa i.

⁴⁹ Ma i wan tutuga Iesu ma ut, ma i lena, Tenawawera, un toka kaia ku: ma i dum i.

⁵⁰ Ma Iesu i piri tana, Tepag, un peti ku a lig kuma u wan urin uni. Ma diat wan urin, ma diat pampa Iesu ma diat ben igenpa i.

⁵¹ Ma rā pa diat diat weuru ma Iesu, i alumpa a nuna in pakat ma i umi mai a wetula a nu ra tadaru na pinapet, ma i pakat‐kutuai in teligana.

⁵² Ma Iesu i piri tana, Uu wakori balet a num in pakat u ra gaiana: kuma diat ba diat kip a pakat, kura diat a wirua u ra pakat.

⁵³ U kanapi duk lena iau kana arig larapai Tamag ma in tari tag kumari mogoro un ta noina ma ruadi a lekiono na agelo?

⁵⁴ Ba lenkuma din pet‐a‐we‐waot‐lelawaipa a buk lena, i ka ku ba din pet a lig kumi.

⁵⁵ U ra pakan a marum kuma Iesu i piri ta diat a tara‐na‐kaiya lena, Muat wan bakai urin lena muat pampa iau, ma muat lo a kum pakat ma ra kum măden lenkuma muat wan na maru ra tenaualog? U ra bugbug rap iau ki na wawera u ra ruma na wetu, ma pa muat pam iau.

⁵⁶ A kum lig kumi di peti ba din pet a wewaotpai uni a buk a nu ra kum parofita. Ma diat rap a kum disaipel diat kala talura i.

⁵⁷ Ma diat ba diat pampa Iesu, diat benpa i u ra ruma a nun Kaiafa, a tadaru na pinapet, kuma diat a kum tenatimtimu ma ra kum takana diat tolug ugai iai.

⁵⁸ Ma Petero i murumur i taka na welwelik, u ra ruma a nu ra tadaru na pinapet, ma i ruk iai, ma i ki ugai ma diat a kum wetula, ba in bobo a tintinipina.

⁵⁹ A kum tadaru na pinapet ma diat rap a kum tenanakokon diat auarekup ta magan lena diat a lok‐lukan Iesu, ba diat a umdokoua i uni:

⁶⁰ ma pa diat auarepai, ba mogoro na tenawelok diat wan pat.

⁶¹ Na muru ruadi diara turu, ma diara lena, A muana bi i piri lenkumi, Iau ku ăg reg‐larapai a ruma‐na‐wetu a nu ra Kalou, ma ăg pami balet ta tul a bug ku.

⁶² Ma ra tadaru na pinapet i turu, ma i tiri lena, Pa u pira ta lig? Awa kumi diara takuna ui uni? Ma Iesu i toka ki mut ku.

⁶³ Ma ra tadaru na pinapet i piri tana, Iau arig a mat ui nan Nara ia ba i lalaun, un wapua miat ba Karisito na Tun Nara ui, ba pate?

⁶⁴ Iesu i uruniauot tana, U ā piri: Kumi kai iau piri tam, Kura muat a bobo na Tu‐ramuana ba i ki tau u ra waot na liman ia ba i dekdek, ma in wan pat u ra bakut na lagit.

⁶⁵ A tadaru na pinapet i rabanuai ma ut a nuna kum malu, ma i lena, I pira ululi un Nara: diat ka balet urawa a kum tenawetakun? Boboi, kumari muat walogoropa a nuna pirapira na weuli un Nara: awa muat kanapi uni?

⁶⁶ Diat piri lena, i ka ku ba din umdokoua i.

⁶⁷ Ma diat kara matana, ma diat tibul i: rā magan kai diat pār i ma ra limadiat,

⁶⁸ ma diat tiri lena, Karisito, un wapua miat, O oi kuma i um ui?

⁶⁹ Ma Petero i ki na taman: ma rā taurara i wan korom i, ma i piri tana, Ui kai muru weuru ma Iesu a te Kalilaia.

⁷⁰ Ma i weworo na ra matadiat rap, lena, Pa iau nunura a lig kuma u piri.

⁷¹ Ma ba i wan nara bonanaka, rā taurara bulug, i bobo i, ma i piri ta diat diat tana iai, A muana kai bi dara weuru ma Iesu a te Nasaret.

⁷² Ma i weworo balet, ma i welimăn lena, Pa iau nunura a muana kuma.

⁷³ Kalikmaku bulug diat ba diat turu nana, diat wan korom i ma diat piri tan Petero, A ligtatuna, a te pa diat ui; kuma a num pirapira i pet a puanapa ui.

⁷⁴ Ma i welimăn kabin ma i weuli kai lena, Iau pa iau nunura a muana kuma. Ma ra kereke i kurakurekatu ma ut.

⁷⁵ Ma Petero i kodopo a pakan a pirapira kuma Iesu i piri tana, lena, Ba a kereke pa i kurakurekatu utbai, ui un weworo ko iau tul a pakan. Ma i pari u na taman, ma i tagidokopa i.