Mataio 17 - A Buk 1896 (Bible Portions)

10. PAKANA MA 7.

¹ Ba i rap nom na bug, Iesu i ben ditul Petero, ma Iakob, ma Ioane dina, diat weuru toto ma i u ra tagai i naunau:

² ma i warawaria a panina na ra mataditul: a matana i milamila le ra make, ma ra nuna kum malu i kabag akit le ra kapakapa.

³ Ma boboi, Moses ma Ilaita diara pua korom diat, ma ditul pirapira ugai ma i.

⁴ Ma Petero i piri tan Iesu lena, Tadaru, i wakak a nudat kinkini kumin: ba u nemi, ag pam ta tul a pălpălip; rā a num, rā a nun Moses, ma rā a nun Ilaita.

⁵ Ba i piri kubai, boboi, rā bakut ba i maramarek i pulubat diat: ma ra win igana i uga pari ko ra bakut, ma i piri lenkumi, Ia bi na Tuglik iau mari akit i, ma iau kaia liklik un i: muat a walogoro i.

⁶ Ba ditul a disaipel ditul walogoro i, ditul puka wowop ma ra mataditul, kuma ditul burut akit.

⁷ Ma Iesu i wan korom ditul ma i pam ditul, ma i piri lena, Mutul turu, koniku mutul burut.

⁸ Ma ba ditul tatada pa ditul bobo te, Iesu ma ku.

⁹ Ba diat wan tatadalua pari kubai tak u ra tagai, Iesu i akanaubat ditul lena, Ba na Tura‐muana pa i turu utbai ko ra mat koniku mutul wapua te u ra lig kuma i pua korom mutul.

¹⁰ Ma ditul a nuna disaipel ditul tiri lena, Diat a kum tenatimtimu, lelawai diat piri lena, I takado ut ba Ilaita in wan muka pat?

¹¹ I piri ta ditul, A ligtatuna, Ilaita in wan muka pat, ma in kamara kianai balet a lig rap:

¹² ma iau piri ta mutul, Ilaita i a wan pat ut, ma pa diat nunura i, ma diat a petai korom i a kum lig rap diat nemi. Len kai kuma, na Tura‐muana in gugut ko diat.

¹³ Ma ditul a disaipel ditul nunurai marakam lena, i wapua diat un Ioane a tenabapitaiso.

¹⁴ Ba diat wan pat korom diat a tara‐na‐kaiya, rā muana i wan korom i ma i tutudug nana, ma i arig i lena,

¹⁵ Tadaru un mari na tuglik a muana: kuma i loglog ma i pet a gala na gunugut: kuma mogoro na pakan i puka tau u ra ugan, ma mogoro na pakan kai i puka tau u ru polo.

¹⁶ Ma iau a benta i korom diat a num disaipel, ma diat kana wakadelpa i.

¹⁷ Ma Iesu i piri lena, A tauntara pa i nunuru ma i maliu kai, tea bug na wanua ag ki namuat? tea bug na wanua ag komonopa muat uni? Benpa i korom iau.

¹⁸ Ma Iesu i wadu i: ma ra tebaran i pari kon i: ma ra nat i lalaun tak u ra pakan a bug kuma.

¹⁹ A kum disaipel diat wan korom Iesu, ba i ki igen, ma diat tiri lena, Lelawai kuma miat kana lu‐apariua i?

²⁰ I piri ta diat, Kabi i kinalik ku a numuat nuru: kuma iau piri ligtatuna ta muat, Ba i welara a numuat nuru ma ra patik na musita, kura muat a piri ta ra tagai bi,

²¹ Un wan karai tau u ra bual urog iai; ma in wan ku; ma pa ta lig in galgalai korom muat.

²² Ma ba diat ki kubai Kalilaia, Iesu i wapua diat lena, Kura diat a taramaruai na Tura‐muana u ra limadiat a tara;

²³ ma kura diat a umdoko i, ma tul a bug in lalaun balet. Ma i tapunuk akit uni a baladiat.

²⁴ Ba diat wan u Kapanaumi, diat ba diat kon ugai a drawe in ka u ra ruma na wetu, diat wan korom Petero ma diat tiri lena, A numuat tenawawera i tari a drawe, ni?

²⁵ I uruniauot ta diat, Iu. Ma ba i ruk u ra ruma, Iesu i piri mun tana lena, Awa u kanapi Simon? A kum tui u ra kum wanua diat kon ugai kon oi a telo, ba a drawe? ko ra kum na tudiat, ba ko ra kum wawaira duk?

²⁶ I piri lena, Ko diat ku a kum wawaira. Iesu i piri tana, Ia kuma di madek diat uni a kum na tudiat.

²⁷ Kaduk dat pet a rara diat, un wan u na tai un walop a in a ail, ma un pam ta win a ien kuma un al‐a‐mukapai: ma ba un pam pakal a wana un auarepai uni ra măni; un rakani ma un tari ta diat kup dara.