Mataio 16 - A Buk 1896 (Bible Portions)

10. PAKANA MA 6.

¹ Ma diat a kum te Faresaio, ma ra kum te Sadukaio diat wan korom i, ma diat walam tama i, kuma diat arig i lena, In weai ta diat a wakinalag tak u ra maua.

² Ma i piri ta diat, Ba malurap ma muat piri lena, In makeawa u na buru; kuma a lagit i tara.

³ Ba in malana pat muat piri lena, Akaina bug kumi: kuma a bakut i tara, ma i tapurā ma kai. Muat nunurai larapai a mata ra lagit: ma pa muat nunurai larapai a wakinilag i ra pupukai kumi.

⁴ Akaina tauntara diat pet akakai, diat auarekup ta wakinilag; ma pa din tari ta wakinilag korom diat, a wakinilag ku in Iona. Ma i wan talura diat ma i wan igen.

⁵ A tara na‐wawera diat pukai u rā papara, ma diat dumanarua a mandrai, pa diat kipi.

⁶ Ma Iesu i piri ta diat, muat katom, muat lamono a leven a nu ra kum te Faresaio, ma ra kum te Sadukaio:

⁷ Ma diat pirapira ugai lena, Pa dat kip ta mandrai.

⁸ Ba Iesu i nunurai, i piri ta diat, A kum tenanuru kinalik muat, lelawai muat pirapira ugai kuma pa muat paki ta mandrai?

⁹ Pa muat nunurai utbai, pa muat kodopoi duk a lima na kem na mandrai ma lima na nomara na tara, ma ra kum ka muat waganategpai?

¹⁰ A limadi ma ruadi a kem na mandrai kai korom diat a wat na nomara, ma ra kum ka muat waganategpai?

¹¹ Lelawai pa muat nunurai lena pa iau piri ta muat u ra mandrai? Lenkumi kag, muat a lamono a leven a nu ra kum te Faresaio ma ra kum te Sadukaio.

¹² Ma diat nunurai marakam lena, pa i piri ta diat lena diat lamono a leven na mandrai, a wawera ia a nudiat a kum te Faresaio ma ra kum te Sadukaio.

¹³ Ba Iesu i wan pat u ra bual Kaisaria Filipo, i tiri diat a nuna disaipel lena, Diat a tara diat piri lelawai u na Tu‐ra‐muana, lena, O oi duk ia?

¹⁴ Ma diat wapua i uni lena, Rā tara diat piri lena, Ioane a tenabapitaiso; rā tara bulug, Ilaita; ma rā tara, Ieremaia, ba rā ko diat a parofita.

¹⁵ I piri ta diat, Muat kai muat piri lelawai un iau lena, O oi iau?

¹⁶ Ma Simon Petero i wapua i uni lena, A Karisito, na Tu‐ra‐Kalou lalaun ui.

¹⁷ Ma Iesu i piri tana, Ui dan, Simon na tun Iona: kuma a tara pa i pet a puanai korom ui, a Tamag ia i ki u ra maua.

¹⁸ Iau kai iau piri tam lena, Petero ui, ma u ra wat kumi ag pam a nug Ekelesia; ma ra kum mataiolo i ra matananion pa in uiana uni.

¹⁹ Ag tari tam a kum ki i ra matanitu ko ra maua: ma ra lig rap u doi u vuravura, kura din doi bulug u ra maua: a lig rap kai ba u palai u vuravura kura din palai bulug u ra maua.

²⁰ Ma i akanaubat diat a tara na wawera lena, koniku diat a wapua te un i lena a Karisito ia.

²¹ Tak u ra pupukai kuma, Iesu i pira weai kabin ta diat a nuna tara‐na wawera lena, in takado ku ba in wan u Ierusalem, ma in kari ana mogoro na lig ko diat a kum takana ma ra kum tadaru na pinapet, ma ra kum tenatimtimu, ma din umdoko i, ma tul a bug in lalaun balet.

²² Ma Petero i pira‐kabin batpa i lena, Tadaru, a lig kumi in tana welwelik ma kon ui; pa din peti korom ui a lig kumi.

²³ Ma i turu tapuku ma i piri tan Petero, Un wan na muru tag Satan: u toka pet a tutuka iau: kuma pa u nunuk u ra lig a nun Nara, a lig ku a nu ra tara.

²⁴ Ma Iesu i piri balet ta diat a nuna disaipel lena, Ba te i ligna patap un iau, koniku in murumuru a nuknukina, in loi ku a nuna kabai ma in patap un iau.

²⁵ Ia ba i ligna komonobatpa a nuna lalaun kura in pet rararuai: ma ia bulug ba i pet rararua a nuna lalaun un iau kura in auarepai.

²⁶ In ka lelawai korom te, ba i lata a vuravura rap, ma i pet a rararua a nuna lalaun? Awa bulug a lig a muana in kelewewaotpai uni a nuna lalaun?

²⁷ Kuma na Tu‐ra‐muana kura in wan pat u ra măramăra a nun Tamana, ma diat ugai ma i a nuna kum agelo: ma in balui marakam korom diat a tara rap a lig in welara ma ra nudiat kum pinapam.

²⁸ Iau piri ligtatuna ta muat, ta magan ko diat diat turu bin, pa diat a wirua in tuk u ra pupukai kuma diat a boboi uni na Tu‐ra‐muana ba in wan pat u ra nuna matanitu.