Mataio 14 - A Buk 1896 (Bible Portions)

10. PAKANA MA 4.

¹ U ra pupukai kuma Erod a titarak i walogoropa a wawapua un Iesu;

² Ma i piri ta diat a nuna wetula lena, Ioane a tenabapitaiso kumi, i a lalaun balet ko ra mat; ia kuma i pampai uni a kum dekdek na lig kumi.

³ Kuma Erod i pam‐a‐kotopa Ioane, ma i do‐a‐kototai ma i warukta i u ra ruma na boboto, un Erodia, a tebuan a nun Filipo na tenalik.

⁴ Kuma Ioane i piri tana, pa i takado ba un taula ma i.

⁵ Ma ba i ligna umdoko i, i buruta diat a tara, kuma diat kanapi lena a parofita ia.

⁶ Ba i wewaot a bug kuma di buta Erod uni, na tun Erodia, a tebuan, i lakara na liwan ta diat, ma i pet a kaia Erod:

⁷ Ia kuma i welimăn uni, lena, in tari tana a lig rap ba in arigi kon i.

⁸ Ma ba nana i werata i mun, i piri lena, Un tari ku tag u ra kupep a in a lorin Ioane a tenabapitaiso.

⁹ Ma i tapunuk uni a bala ra tui; ma u ra nuna welimănku, ma u diat kai diat wagan ugai ma i, i nakokon uni lena din tari.

¹⁰ Ma i wetula lena din burukutu a in kabaron Ioane u ra ruma na boboto.

¹¹ Ma diat kip in a lorina u ra kupep, ma diat tari ta ra taurara: ma i kipi korom nana.

¹² Ma ra nuna tara na wawera diat wan ma diat rakanpa a tumul, ma diat punăgi; ma diat wan korom Iesu ma diat wapua i uni.

¹³ Ba Iesu i walogoropai, i ka u ra tampag, ma i wan igen taka iai u ra bil: ma ra tara na kaiya ba diat walogoroi, diat pa murumur i tak u ra kum taman.

¹⁴ Ma i wan pat ma i bobo diat a tara‐na‐kaiya pi, ma i mari akit diat, ma i wakadelpa diat a tara diat malapag.

¹⁵ Ba malurap, a nuna tara‐na‐wawera diat wan korom i, ma diat piri lena, A bil ku kumi, ma i aip a nilaina; un tulua diat a tara‐na‐kaiya, ba diat a wan u ra kum taman ma kul a diat utna.

¹⁶ Iesu i piri ta diat, Pa i ka ba diat a wan, muat tabara diat un ta utna diat an ani.

¹⁷ Diat piri tana, miat paki limadi ku a mandrai ma ru in a ien.

¹⁸ I piri ta diat, muat a kip a rapi korom iau.

¹⁹ Ma i piri ta diat a tara‐na‐kaiya lena, diat a ki tau u ra uali; ma i rakanpa a limadi a mandrai ma ra ru in a ien, ma i tatada u ra maua, ma ba i lotupa mun i bikweran‐apai, ma i tari a kum mandrai korom diat a tara na wawera, ma diat a tara na wawera diat palau diat uni a tara‐na‐kaiya.

²⁰ Ma diat wagan rap ma diat mauru: ma diat tom ugai a kum mutamuta na utna diat ankopotai, ma i teg mai a no ka ma ruadi:

²¹ ma diat ba diat wagan a lima na nomara na muana diat, ma ra kum tebuan ma ra kum nat kai.

²² Ma i wararak diat a tara na wawera lena diat a ka u ra tampag, ma diat a muka u ra papara, ma ia kai in tulua diat bulug a tara‐na‐kaiya.

²³ Ma ba i a tul a rapua diat a tara‐na‐kaiya, i wan toto u ra tagai ba in arig: ma ba malurap ma i ki kake ku iai.

²⁴ Ma ra tampag i ki u ra pugan na tai, ma i taptabeleke u ra kum top: kuma i dadaip taka na muka.

²⁵ Ma u ra wat na pakan a lauma u ra marum i wan korom diat u ra tai.

²⁶ Ma diat a kum disaipel ba diat bobo i ba i wan ku u ra tai, diat burut, ma diat lena, a kaia ku ia: ma diat kulkulai, kuma diat burut.

²⁷ Ma Iesu i pira kakai ma ut korom diat lena, Muat manatug, iau ku kumi; koniku muat burut.

²⁸ Ma Petero i piri tana, Tadaru, ba ui ku, un wata iau lena ag wan ku u ra tai korom ui.

²⁹ Ma i wata i lena, Un wan urin. Ma Petero i irok pari ko ra tampag, ma i wan ku na te u ra tai, lena in wan korom Iesu.

³⁰ Ma ba i bobo a dadaip i burutai, ma ba i murug kabin i watai lena, Tadaru un walaun iau.

³¹ Ma Iesu i kado ma ut a limana, ma i pam i, ma i piri tana, A tenanuru kinalik ui, lelawai kuma pa u nurutau un iau?

³² Ma ba diara ka u ra tampag, a dadaip i tamrit.

³³ Ma diat ba diat ki u ra tampag, diat tutudug korom i, ma diat piri lena, A ligtatuna, na Tun Nara ui.

³⁴ Ba diat karot, diat pukai u ra bual Kenessaret.

³⁵ Ma diat a tara taka iai ba diat nunura i mun, diat wetula taliut u ra kum bual, ma diat ben a rapa diat ba diat malapag korom i;

³⁶ ma diat arig i lena diat a tuktai ku a titi ra nuna in a malu: ma diat rap ba diat tuktai diat lalaun uni.