Maarko 9 - A Buk 1896 (Bible Portions)

9 A PAKANA.

¹ Ma i piri ta diat, Ligtatuna iau piri ta muat, Ta magan ko diat diat turu kumin, pa diat irua ba pa diat boboi a mukatai a matanitu a nun Nara ba i wan pat ma ra dekdekina.

² Ba nom na bug i rap Iesu i ben ditul Petero, ma Iakobo, ma Ioane, ma i ben‐a‐toto‐pa ditul u ra tagai i naunau, diat ku ma ia: ma panina i waruaria na ra mataditul.

³ Ma nuna kum malu i liralira ma kabag akit; pa ta tenakimalu na tudu ra maua in pam liranpai.

⁴ Ma Ilaita ma Mosese kai, diara puā korom ditul ma ditul pirapiri ugai ma Iesu.

⁵ Ma Petero i piri tan Iesu lenkumi, Rabai, i auakak a nu dat tana kumin: miat a pam ta tul a palpalip; ra a num, ma ra a nun Mosese, ma ra a nun Ilaita.

⁶ Kuma pa i nunurai na kuru ta lig i ka ba in piri; kuma diat burut akit.

⁷ Ma ra bakut i pulubat diat; ma ra igana a nun te i uga pari ko ra bakut, ma i piri lenkumi, Ia bi Na Tuglik iau mari akit i: muat walogoro un i.

⁸ Ma ba ditul bobo taliut kaka, pa ditul boboi balet te, diat ku ma Iesu diat tana.

⁹ Ma ba diat wan tatadalua kubai tak’ u ra tagai, i pirabat ditul koniku ditul wapua ta tara u ra lig diat a bobotai, ditul a pira puanai ku ba na Turu‐ra‐Muana i turu balet ko ra mat.

¹⁰ Ma ditul kadopi a pirapira kuma u ra baladitul ma ditul wetiritiri ugai diat ma ku, Awa a pipilaina pirapira kumi, “In turu balet ko ra mat,”

¹¹ Ma ditul tiri tana, lenkumi, Lelawai diat a kum tenatimtimu dat piri, lena, Ilaita in wan muka pat.

¹² Ma i piri ta ditul a ligtatuna Ilaita in wan muka pat, ma in pam na kuru balet a lig rap: ma di timui lelawai bulug u na Tu‐ra‐Muana, in tapunuk u ra magoro a lig ma din wabulbuli?

¹³ Ma iau, iau pira ta mutul, Ilaita i a wan pa ut mun, ma diat a peti korom i a lig rap diat nemi, lenkuma di timui uni.

¹⁴ Ma ba diat wan korom diat a kum tara wawera, diat boboi a magoro kum tara diat turu liutai un diat, ma ra kum tenatimtimu diat wetiritiri ma diat.

¹⁵ Ma ba diat a kum tara diat boboi Iesu, diat kakaian akit ma diat kala korom i ma diat wewatai.

¹⁶ Ma i tiri ta diat, Awa kuma muat wetiritiri uni ma diat?

¹⁷ Ma te ko diat a kum tara i piri tana, lenkumi, Tenawawera, Iau kiptai na tuglik muana korom ui, a tebaran mutmut i ogi;

¹⁸ Ma ra bual na wanua rap i rakanpai, i og‐kurāi na pia: ma i korian a wana, ma i kirit lakono, ma panina i mariri: ma iau piri ta diat a num kum tara wawera diat a lu‐ruai; ma diat kana pam larapai.

¹⁹ Ma i piri ta diat, lena, A taun tara kumi pa diat nunuru, te a bug na wanua dat a tana ku ma muat? te a bug na wanua ag wamalut pa muat? kipi a muana korom iau.

²⁰ Ma diat kiptai korom i: ma ba i bobo ia, a tebaran i pet a padwari na muana; ma i puka pari, ma kulakula u na pia, ma i korian a wana.

²¹ Ma i tiri ta ra tamana, Nagaian i wan kabin un i a lig kumi?

²² Ma i piri, Ba i nat kubai. Ma magoro na pakan i ogta i u ra ugan ma u ra danim, din pam doko ia uni: ma ba u pet larapai ta lig, un maramari miat, ma waraut miat.

²³ Ma Iesu i piri tana, lenkumi, ba un nuru larapai, din pam kakai a lig rap korom te i nuru.

²⁴ Ma ra tama‐ra nat i watai u na te, ma piri, Iau nuru; un warauti a nug pai nuru,

²⁵ Ma ba Iesu i boboi ta magoro a kum tara diat kala ugai korom i, i akanau bati a tebaran pikoina, ma piri tana, Ui ma a tebaran mutmut ma bauret, Iau tula ui, un wan igen koni, ma koniku un ruk balet uni.

²⁶ Ma ba i kulkulai, ma pet gala a padwari uni, i ā wan igen kon i: ma ra nat i len ba te i mat; ma ta magoro ko diat diat lena, Wenam! Ia mat!

²⁷ Ma Iesu, i pam a limana, ma waturi u na te; ma ra nat i turu.

²⁸ Ma ba i ruk u ra ruma, a nuna kum tara wawera diat tiri ino, lenkumi, Lelawai kuma miat kana lu‐ruai larapai?

²⁹ Ma I piri ta diat, a ararig ku in ka din og‐uai uni a tebaran lenkumi.

³⁰ Ma diat wan igen ko ra bual kuma ma diat wan u Kalilaia; ma pa i nemi ba ta muana in nunurai.

³¹ Kuma i weri diat a nuna kum tara wawera, ma piri ta diat lenkumi, kura ut dim taramaruai na Tu‐ra‐Muana u ra limadiat a kum tara, ma diat a um dokoi, ma ba di um dokoi, in turu balet ba tul a bug i rap.

³² Ma pa diat nunurai na kuru a pirapira kuma ma diat burut ba diat tiri uni kup a pipilaina.

³³ Ma diat wan u Kapanaumi: ma ba i ruk u ra ruma i tiri ta diat, lenkumi, Awa kuma muat wetiritiri uni u ra akapi?

³⁴ Ma diat, diat ki mut ku: kuma diat weruarua u ra akapi, O oi ta diat i gala u diat.

³⁵ Ma i ki na pia, ma watai korom i diat a Winunu‐ma‐ruadi; ma i piri ta diat, lenkumi, Ba te i lig na muka, ia ba i in murumuru ma in taramlu bulug korom diat rap.

³⁶ Ma i rakanpai a nat kinalik, ma waturi na ra matadiat rap: ma ba i romoi a nat u ra limana i piri ta diat, lenkumi.

³⁷ Ia ba in tara tepana ta ra nat kinalik len bi u ra iag i tara tepana iau: ma te i tara tepana iau, pa i tara tepana iau ku, i tara tepana bulug ia ba i tulai iau.

³⁸ Ma Ioane i piri tana, Tenawawera, miat bobopa te i lu‐ruai a kum tebaran u ra iam: ma miat pira bati, kuma pa i tarugai ma dat.

³⁹ Ma Iesu i pira ta diat, Koniku muat pirabati kuma pa ta muana in pam ta dekdek a pinapam u ra iag, ma na muru in pira ululi kaka un iau.

⁴⁰ Kuma ia ba pa i turubat dat i tarugai ma dat.

⁴¹ Kuma ba te in tari ta muat a la na pala muat inimi, kuma muat a kum tara a nun Karisito muat, A ligtatuna, iau pira ta muat, a nuna wedok pa i panai ai koni.

⁴² Ma ia ba in pet a puka taptapna ra pa diat a kum kinkina lik bi diat nuru taun iau, i ka korom i ba di do a‐kotoi a gala na wat di ububa padi mai u ra kabarono ma di walop a muruguai u ra tai.

⁴³ Ma ba a limam i pet a rara ui un poko‐kutuai;

⁴⁴ I ka un ui ba u ruk u ra lalaun ma ra limam i tum, ma pikoina ba u wan ma ruadi a limam u ra Kena, u ra ugan pai mat.

⁴⁵ Ma ba kakim i pet a rara ui, un poko‐kutuai:

⁴⁶ I ka akit un ui ba u ruk u ra lalaun pai rap ma ra kakim i kum, ma i pikoina ba ruadi a kakim ma din og‐uai u ra Kena.

⁴⁷ Ma ba matam i pet a rara ui, un wili: i ka akit ba u ruk u ra mata nitu a nun Nara ma ra ku a matam, ma pa i ka ba ruadi a matam ma din og‐uai u ra Kena.

⁴⁸ Kuma u ra bual ba a nudiat kalolo pa i mat, ma ra ugan pa in pukdokoi.

⁴⁹ Kuma din wamasima diat a kum tara rap ma ra ugan.

⁵⁰ A masima i wakak; ma ba panaiai koni a mapakina, awa ta lig muat pami i mapak balet uni? I wakak ba masima in tana u ra balamuat, ma muat ki na malmal.