Maarko 5 - A Buk 1896 (Bible Portions)

5 A PAKANA.

¹ Ma diat pukai u ra papara tai barog, u ra nundiat bual a kum te Kadara.

² Ma ba i rok pari tak’ u ra aka, diara wetarom ma ut ma ra muana i wan tak’ u ra bual na minat, a tebaran pikoina i ogi.

³ I tana ku u ra bual na minat; ma pa te ra i kerai larapai pa te kai ba doi ma ra aru‐na‐aion.

⁴ Kuma diat do‐ataltalili ma ra tobo‐na‐aion, ma ra kum aru‐na‐aion kai; ma i pet kutuai a kum aru, ma i pet kutuai a kum tobo kai; ma pa ta muana bulug i pet walapai.

⁵ I tana ku u ra bual na minat ma u ra kum tagai, u ra marum ma u ra keke bulug; ma i kulkulai una te, ma i toki liklik a panina ma ra kum wat.

⁶ Ma ba i boboi Iesu taka na welwelik ut, i kala ma tutudug nana,

⁷ Ma i wewatai mat, lenkumi, Dara lawai ma ui, Iesu, na tun Nara na te akit? Iau arig a mat ui u ra iana Nara, koniku u watapunuk iau.

⁸ Kuma i ā piri tana, Ui ma a tebaran pikoina, un pari kaka ko ra muana.

⁹ Ma i tiri koromi, Oi na iam? Ma i piri tana, lenkumi, a iag Lekeono kuma magoro miat.

¹⁰ Ma i arig mat korom i, koniku i tul‐a‐ruai diat ko ra wanua kuma.

¹¹ Ma galapi a kaba‐boro, diat werauraui u ra papara tagai kuma ma wagan i ai.

¹² Ma ra kum tebaran rap diat arig tana, lenkumi, Un tula miat u ra kaba‐boro, miat a ruk u diat.

¹³ Ma Iesu pa i pirabat diat. Ma ra kum tebaran pikoina diat pari, ma diat ruk u ra kaba‐boro; ma ra kum boro diat kala pari u ra taratariba u na tai, a ru no mara duk diat; ma diat wirua rap u na tai.

¹⁴ Ma diat a kum tara diat tabara boro diat kala kaka ma piraweai ta diat a tara u ra taman ma u ra kum bual kai; ma diat wan ba diat a bobo u ra lig rap di petai.

¹⁵ Ma diat wan korom Iesu, ma diat boboi a muana i ki na pia kuma a kum tebaran diat pari koni, i kopi a nuna malu ma i manana balet; ma diat burut akit uni.

¹⁶ Ma diat ba diat ā bobotai, diat pirapuanai korom diat a tara u ra lig di petai u ra muana a tebaran diat ogi, ma u ra kaba‐boro kai.

¹⁷ Ma diat arig a mat i, lena, in wan igen ko ra nudiat bual.

¹⁸ Ma ba i ka kubai u ra aka, a muana kuma ba a kum tebaran diat pari koni i arig tana diara weuru mai.

¹⁹ Ma Iesu i patut, ma i piri tana, Un wan u ra num taman, ma u ra kum takunui, ma un piraweai ta diat u ra lig rap a Tadaru i a peti korom ui, ma u ra nuna maramari korom ui kai.

²⁰ Ma i wan igen ma wapua lala u ra bual Tekapoli u ra gala a lig Iesu i a petai un i; ma diat a kum tara diat kakaian uni.

²¹ Ma ba Iesu i karot balet u ra papara tai u ra aka, magoro a kum tara na kaiya diat tolug ugai korom i; ma i tana nakono.

²² Ma te ko diat a tara diat nakakon u ra ruma na lotu i wan korom i, a iana Iairo; ma ba i boboi Iesu, i tutudug korom i,

²³ Ma i arig a mat korom i, lenkumi, Na tuglik tebuan i pot na mat ma; iau arig ui, un wan ma paki a limam uni, ma in kadel ma lalaun balet uni.

²⁴ Ma diara weuru ma i; ma ra kum tara magoro diat patap uni, ma diat bukulai.

²⁵ Ma ra tebuan kai i malapag u ra kap i nonoro kon i a noina ma ruadi a tinoan.

²⁶ Ma i gugut galapi u ra lig a kum tena‐wakadel diat a petai un i, ma i rap a nuna utna u ra nuna dok diat, ma pa i ka bakai uni, di pet a gati ku a nuna malapag.

²⁷ Ba i walogoroi a kum wewapua un Iesu, i wan na liwan ta diat a kum tara diat murumuri, ma i tuktuki a nuna malu.

²⁸ Kuma i lena, Ba’g tuktuki ku u ra nuna malu, ag lalaun uni.

²⁹ Ma nuna malapag nonoro kap i takunu kaka; ma i karianai u ra panina i lalaun na kuru ko ra nuna malapag gugut.

³⁰ Ma Iesu i nunura wakaka u ra balana a dekdekina i pari kon i, ma i tapuku korom diat a kum tara, ma piri, O oi i tuktuki a nug malu?

³¹ Ma diat a kum tara wawera diat piri tana, lenkumi, U bobo diat a magoro kum tara diat webukula ui, ma ulawai kuma u tiri. O oi i tukta iau?

³² Ma ia, i bobo taliut ku ba in bobo ia i peti a lig kuma.

³³ Ma ra tebuan i burut ma dedera ku, kuma i karianai a lig di peti uni, ma i kakarai korom i ma puka pari na ra matana, ma pira‐puanai a kum lig rap tana.

³⁴ Ma Iesu i piri tana, lena, Na Tuglik, a num nuru un iau ui lalaun uni, Un wan ma un manatug, ma un lalaun ko ra num malapag gugut.

³⁵ Ma ba i piri kubai, ta kum tara diat wan tak’ u ra ruma a nu ra muana i nakakon u ra ruma na lotu, ma diat piri tana, lena, Na tumlik wawina i a mat; ulawai kuma u bilarai a Tenawawera?

³⁶ Ma Iesu pa i ururu u ra pirapira kuma; ma i piri ta ra muana i nakakon u ra numa na lotu, Koniku u burut, un nuru taun iau ku.

³⁷ Ma pa i nemi ba te i weuru ma i, ditul ku Petero, ma Iakobo ma Ioane dina.

³⁸ Ma diat wan u ra ruma a nu ra muana i nakakon u ra ruma na lotu; ma i bobo diat diat lakuturu, ma diat diat luan ma diat kulkulai akit.

³⁹ Ma ba i ruk u ra ruma i piri ta diat, lenkumi, Lelawai kuma muat warawareu, ma muat luan? pa i mat a nat wawina, i inep ku.

⁴⁰ Ma diat nagonoi ku, ma ia, ba i lu‐a‐pariua diat u ra taman, i benpa a tamana taurara ma nana kai ma ra tara diat weuru ma i, ma diat ruk u ra paparina a nat wawina i inep i ai.

⁴¹ Ma I rakani a limana nat wawina, ma piri tana, Talita koumi; a pipilaina pirapira kuma, Taurara, iau piri tam, Un turu.

⁴² Ma ra taurara i turu kaka, ma wan lala; kuma noina ma ruadi a tinoanina. Ma i leklakon tau a baladiat ma diat kakaian mat uni.

⁴³ Ma i akanau bat diat, lena, koniku ta tara i nunurai a lig kuma; ma i tula diat diat tabara a taurara ma ra utna in wagani.