Maarko 4 - A Buk 1896 (Bible Portions)

4 A PAKANA.

¹ I wawera balet u ra papara walian, ma diat a magoro akit a kum tara na kaiya diat tolug ugai korom i; ma i ka u ra aka, ma ki uni u ra tai; ma diat rap a magoro a kum tara diat ki u nakono.

² Ma i wawera diat magoro a lig u ra pirapira welwelara, ma i piri lenkumi u ra nuna wawera,

³ Muat walogoroi; Boboi, ra muana lamira saito, i wan ma i lamirai

⁴ Ma ba i lamira wanwan, ra kum uaina i pukā u ra papara akapi, ma ra kum pika rowo diat rowo uni, ma diat ani.

⁵ Ma ta magan uaina i puka tau u ra bual na wātwāt, ba kinalik a pia i tana i ai; ma i kuburu kaka, kuma pa i but a pia i tana uni.

⁶ Ma ba a make i irok pat i marag rap; kuma pa ta akarina.

⁷ Ma ta magan uaina bulug i puka na liwan ta ra kum diwai tăloklokono, ma ra diwai tăloklokono diat tauabatpai ma pa i ua.

⁸ Ma ta magan bulug i puka bala ra bual i piana, ma i kuburu, ma taua, ma ua burabure, ra magan i ua ta tul a noina, ra magan ta nom na noina, ma ra magan a marina.

⁹ Ma i piri ta diat bulug, Ia ba i tara teligana, i ka i walogoro uni.

¹⁰ Ma ba i ki takai ku, diat a kum tara diat tana ugai mai, ma diat a Winunu‐ma‐ruadi diat wetiri uni kup a pirapira welwelara.

¹¹ I piri ta diat, di tari korom muat ku muat nunurai a lig ino i ra matanitu a nun Nara; ma di piri ta diat a kum tara igen a lig rap u ra pirapira welwelara ku;

¹² Kuma pa diat a bobopai u ra nundiat bobo kupi ma pa diat walogoro‐pai u ra nundiat walogoro kupi; kaduk diat nukpuku diat, ma din unuai a nudiat pet akakai.

¹³ Ma i piri ta diat lenkumi, Pa muat nunurai a pirapira welwelara kumi? Muat nunurai lelawai duk a kum pirapira welwelara rap?

¹⁴ A tena lamira, i lamirai a pirapira.

¹⁵ Diat kumi a tara u ra papara akapi di lamirai i ai a pirapira; ba diat walogoropai, Satani i wan kaka ma rakan‐uai a pirapira di lamirai u ra baladiat.

¹⁶ Lenkumi bulug diat di lamirai u ra bual na watwat, ba diat walogoroi a pirapira diat rakan‐a kakapai ma diat kaia uni.

¹⁷ Ma pa i tara akaridiat u ra baladiat, ia kuma pa diat tana iwan uni; ma ba tapunuk duk i wan pat, ba pet na bilbil duk u ra pirapira diat tutukā ma ut.

¹⁸ Ta magan bulug di lamirai u ra bual na diwai taloklokono, diat kuma a tara diat walogoropai a pirapira.

¹⁹ Ma ra baladiat i tenten kup a lig rap u ra lalaun kumin, ma u ra utna i waruwarukapai, ma ra kokog kup a lig tiba na ugana, i ruk u ra baladiat ma tauabatpai a pirapira, ma pa i ua uni.

²⁰ Ma diat kumi di lamirai u ra bual i piana, diat a tara diat walogoroi a pirapira, ma diat kanomi u ra baladiat, ma diat ua burabure, ra magan tul a noina, ra magan nom na noina, ma ra magan a marina.

²¹ Ma i piri ta diat bulug, Ka oi te in kipi a lamp ma păkitai e na tudu ra pupua na padi, ba na tudu ra ininep duk, ma pa i păkitai u na te u ra turuturu na lamp ni?

²² Kuma pa ta lig di burug bati ma pa din rakanarai; pa ta lig di păkinoi ku, ma pa din paki a barai u ra kapakapa.

²³ Ba te i tara teligana, i ka ba in walogoroi.

²⁴ I piri ta diat bulug, muat kătom u ra lig muat walogoroi; a pūpua muat puai uni, din puai balet un muat, ma din lulu bulug ta muat.

²⁵ Kuma ba te i paki ta utna, din tari balet tana; ma ba te pa nuna ta utna, din rakan‐uai kon i a lig i tana uni.

²⁶ I piripiri bulug, Lenkumi a Matanitu a nun Nara; diara welara ma ra muana i lamirai a kum uaina u ra pia.

²⁷ Ma i inep u ra marum ma wagala u ra keke; ma ra uaina i kuburu pat ma taua, ma ra muana i pa i nunurai i taua lelawai.

²⁸ Kuma a pia i wakaburu a uaina, ia ku; a kubulina i puā muka, a tibarina i patap uni, ma ra uaina i mo i murumuru mărakam uni.

²⁹ Ma ba i mukana a kum uaina, a muana i rot kutui ma ut, kuma i wan u ra nuna pupukai din rot kutui uni.

³⁰ Ma i pirapiri bulug, Awa duk dat piri i welwelara ma ra matanitu a nun Nara? aua bulug a pirapira welwelara dat piraweai uni.

³¹ Diara welara ma ra patik na musita; ba di lamirai u ra pia, i kinalik akit u ra kum uaina rap di lamirai u ra pia.

³² Ba di lamirai, i taua, ma i tara diwai gala, i galapi u ra kum diwai liklik, ma i warakakaua a kum gala na kakakana ma ra kum pika diat rowo pat ma diat inep ororo tauni.

³³ Ma i wawera diat ma magoro bulug a pirapira welwelara lenkuma, i welara ma ra nundiat logoro mananapai;

³⁴ Ma ba pa ta pirapira welwelara pa i piri korom diat, ma i pira‐weai a lig rap korom diat a nuna kum tara wawera ba diat ki ugai diat ku ma ia.

³⁵ Ma ba malurap, u ra bug kuma, i piri ta diat, Dat karot u ra papara danim barog.

³⁶ Ma diat wan talurai ko diat a kum tara, ma diat weiroki Iesu pa i kiniwa u ra aka i ki uni; ma ra kum aka kinalik bulug diat karot ugai mai.

³⁷ Ma galapi a dădăip i wan tau u diat, ma ra kum babol i ka u ra aka, ma ra aka i pot na murug uni.

³⁸ Ma ia, i tana na muru u ra aka, i inep u ra ululag; ma diat wagun i, ma piri tana; Tenawawera, a lig biaku duk korom ui ba dat pot na wirua?

³⁹ Ma i tawagun ma i akanau bati a dădăip ma piri ta ra tai lenkumi, Konima, un manatug. Ma dădăip i tămarit ma ut, ma ra tai i malila mat.

⁴⁰ Ma i piri ta diat lenkumi, Lelawai muat burut lenkuma? Lelawai bakai pa muat nuru taun iau ni?

⁴¹ Ma diat burut galapi, ma diat tiri karakarai lenkumi. O oi duk bi, kuma a dădăip ma ra tai diat taram korom i?