Maarko 3 - A Buk 1896 (Bible Portions)

3 A PAKANA.

¹ Ma i ruk balet u ra ruma na lotu, ma ra muana i kiā mat a limana i ki i ai.

² Ma diat boboi ba in wakadelpa ia u ra Bug Tabu ba din takuna i uni.

³ I piri ta ra muana i kia mat a limana, lenkumi, un turu na liwan.

⁴ Ma i piri ta diat lena, I ka ba dat pet auakak u ra Bug Tabu ba dat pet akakai? i ka ba dat walaun te ba dat umdokoi? Ma diat ki mut ku.

⁵ Ma ba I bobo liutai un diat i tebua diat, kuma i tapunuk a balana u ra baladiat i wātwāt, ma i piri ta ra muana, Un kado a limam. I kadoi, ma limana i lalaun balet.

⁶ Ma diat a kum te Faresaio ma diat a kum te Erodiano diat wan igen kaka koni, ma diat pigit ana maden, Awa diat a peti diat a umdoko i uni.

⁷ Ma Iesu ma diat bulug a nuna kum tara wawera diat weuru na ra tai, ma magoro a kum tara taka Kalilaia diat murumuri;

⁸ Ma ra kum tara bulug taka Iudaia, ma taka Ierusalema, ma taka Idumaia, ma taka u ra papara Ioridana urog iai, ma diat bulug taka guna wanua Turo ma Saidona, a gala na tara na kaiya, diat wan korom i, kuma diat logoroi u ra lig na kakaian i ā petai.

⁹ Ma i piri ta diat a nuna kum tara wawera kup ta aka kinalik in tana walagai, kuma magoro diat a kum tara, kaduk diat a webukul mai:

¹⁰ Kuma i wakadelpa diat a magoro kum tara, ma diat a kum tara malapag diat webukulai uni, kuma diat nemi diat a pampami.

¹¹ Ma ra kum tebaran pikoina bulug, ba diat boboi, diat puka tau na ra matana, ma diat wewatai, lenkumi, Ui ma na Tu Nara ui.

¹² Ma i akanau bat diat, koniku diat pira‐puanai.

¹³ Ma I wan toto u ra tagai ma i ben walipa diat a tara i nem diat, ma diat wan korom i.

¹⁴ Ma I waputa diat a Winunu‐ma‐ruadi diat a weuru mai, ma i tula diat diat a wawera:

¹⁵ I tari ta diat bulug a nakakon, diat a luruai a kum tebaran.

¹⁶ Simona i patap un i a iana Petero,

¹⁷ Ma Iakobo ua tun Sebedaio, ma Ioane dina, ma i patap a iadiara Boanaki, a pipilaina a ru nat ra pakpakuru:

¹⁸ Ma Anderea, ma Filipo, Batolomaio, ma Mataio, ma Tomasi, ma Iakobo na tun Alefaio, ma Tataio, ma Simona a te Kanana,

¹⁹ Ma Iuda Isakariota, ia ba i ogopai.

²⁰ Ma I ruk u ra ruma; ma diat a magoro a kum tara diat tolug ugai tauni balet, ia kuma diat kana wagan‐larapai a diat utna.

²¹ Ma ba diat a kum tepana diat walogoroi diat wan pari, diat a pam‐a‐kotoi; kuma diat piri, lena, i loglog ma ku.

²² Ma diat a kum tena‐timtimu diat ba diat wan pari taka Ierusalema, diat piri lenkumi, Belesepulu i waogi; i lu‐ruai bulug a kun tebaran u ra nakakon a nu ra nudiat Tadaru a kum tebaran.

²³ Ma i wata diat korom i, ma piri ta diat a pirapira welwelara, lenkumi, Satani i lu a pariuai Satani lelawai?

²⁴ Ba tiba na ugan a nakakon u ra matanitu, a matanitu kuma pa i tana takum.

²⁵ Ba ra taman bulug diat ki weran tau, a taman kuma pa i tana takum.

²⁶ Ba Satani bulug, i kamkamiak korom ia ut, ma ki weran tau, pa in tana takum ia, i pot na rap ma.

²⁷ Pa ta muana in ruk larapai u ra ruma a nu ra muana uiana ma rakani a nuna utna, ba pa i do‐akototai mun a muana uiana, ma na muru in rakanpai marakam a nuna utna.

²⁸ Ligtatuna, iau piri ta muat, din unuai a kum pet akakai rap a nu ra tara ma ra nudiat kum pira‐ululi kai diat pirapiri uni;

²⁹ Ma ia ba in pira‐ululi u ra Niono Tabu, pa din unuai a nuna petakakai, a nuna pet akakai kuma in turu pa in rap.

³⁰ I piri lenkumi, kuma diat piri lena, A tebaran pikoina i waogi.

³¹ Ma nana ma diat a nuna kum ta tenaliklik diat wan korom i, ma diat turu na taman, ma wetula kupi ma di watai.

³² Ma ra tara na kaiya diat ki liutai; ma diat piri tana, Le! nam ma ra kum temlik diat turu na taman, ma diat ruru kup ui.

³³ Ma i tiri diat, lenkumi, O oi nakug? O oi diat bulug a kum ta tegliklik?

³⁴ I bobo taliut un diat rap diat ki liutai ma piri, Boboi a nag kumi ma diat a kum ta tegliklik.

³⁵ Kuma ba te in taram u ra wetula a nun Nara, a teglik kuma, ma teglik tebuan ma nag.