Maarko 12 - A Buk 1896 (Bible Portions)

12 A PAKANA.

¹ Ma i pira‐kabin ta diat u ra pirapira welwelara, lenkumi, Ra muana i maruti a nuna pinapam na vaine, ma i liblib bati, ma kilpai uni a tug na waine, ma i pamtai a ruma na pakpakila, ma ba i tuturata diat uni a kum tena pinapam, i wan igen u ra ugana bual.

² Ma ba ta un vaine i mauru i tulai a nuna wetula korom diat a kum tenapinapam, in rakanpai kon diat a kum tenapinapam a tiniba na utna ko ra pinapam na vaine.

³ Ma diat pam‐koto i, ma diat ulat i ma tula‐ua i ma pa diat tari ta lig tana.

⁴ Ma i tulai balet ta diat te bulug a nuna wetula; ma diat ak‐a‐koptai a lorina, ma diat pet akakai korom i.

⁵ Ma i tulai te bulug korom diat; ma ia kuma diat um dokoi: ma magoro a tara bulug diat patap: ta magan diat rapui, ta magan diat um dokoi.

⁶ Ra bulug i tana ut, na tunalik walwaliana: ma ia kuma i tulai na muru korom diat, ma i piri, lena, diat a ururuni na tuglik.

⁷ Ma diat a kum tenapinapam diat pirapiri ugai, lenkumi, a kale na tamana kumi; in, dat a um dokoi, ma ra nu dat ku a pinapam kumi.

⁸ Ma diat rakanpa i ma um doko i, ma diat og‐ua i na maru na pinapam na vaine.

⁹ Awa duk ta lig a Tadaru a nuna na pinapam na vaine in peti korom diat? In wan pat ma umdoko‐ruai a kum tenapinapam kuma ma in tari a pinapam‐na‐vaine korom ra igen a kum tenapinapam.

¹⁰ Pa muat luki utbai duk a pakana pirapira kumi u ra Buk‐Tabu; “A wat kuma diat a kum tena ugwedaun‐wat diat og uai, ia kuma di pakitai ma ra wat na inuk u na te:

¹¹ A lig kumi kon Ieova, ma ra lig na kakaian ia na ra matadat.”?

¹² Ma diat ligna rakan i; ma diat buruta diat a kum tara‐na‐kaia; kuma diat nunurai i pira‐na‐du u diat u ra pirapira welwelara: ma diat turu kon i, ma wan igen.

¹³ Ma diat tulai korom i ta magan ko diat a kum te Faresaio ma ra kum te Erodiana, diat a pam na pinalai kupi u ra nuna pirapira.

¹⁴ Ma ba diat wan korom i, diat piri tana, lenkumi, Tenawawera miat nunura ui a muana ligtatuna ui, ma pa u burut un te: kuma pa u ururu biaku diat a kum tara, ma u wawera a ligtatuna ku u ra kum kokoina lig na ra matan Nara: I wakak duk ba dat tari a drawe korom Kaisara, ba pate duk? Miat a tara duk, ba konima miat tari?

¹⁵ Ma Iesu i nunurai a nudiat waruwaruka, ma i piri ta diat, Lelawai kuma muat ligna walam iau? kipi korom iau ta denarion, iau boboi.

¹⁶ Ma diat kipi. Ma i piri ta diat, A nun oi a nion kumi ma ra timtimu kai? Ma diat piri tana, a nun Kaisara.

¹⁷ Ma Iesu i piri ta diat, Muat tari tan Kaisara a kum lig a nun Kaisara, ma tari bulug tan Nara a kum lig a nun Nara. Ma diat kakaian akit uni.

¹⁸ Ma ra kum te Sadukaio kai diat ba diat piri, lena, Pa ta lalaun balet na muru, diat wan korom i; ma diat tiri tana, lenkumi.

¹⁹ Tenawawera, Mosese i timui len bi ta miat, Ba te a tenalik ia mat, ma nuna tebuan i lalaun kubai, ma pa ta na tunalik, i ka ba tenalik in taula ma ra tebuan a nuna tenalik, ma in wakuburi ta bulumuru un tenalik ia mat.

²⁰ Narap diat ki na miat a limadi ma ruadi na diwaina in muana: ma ra mukana i taula ma ra tebuan, ma i wirua pa nuna ta tunalik;

²¹ Ma tenalik ba i patap uni i taula ma i, ma i wirua kai, pa nuna bulug ta tunalik; ma tenalik i patap u diara i pet lenkuma kai:

²² Ma diat rap bulug a limadi ma ruadi, pa ta bulumuridiat. A tebuan kuma i mat na murumuru diat rap.

²³ Ka ba diat lalaun balet na muru a tebuan a nun oi ia? kuma diat a limadi ma ruadi diat taula pa ma i.

²⁴ Iesu i piri ta diat, Pate duk a kabina kumi a numuat nuk‐a‐rarauai, kuma pa muat manana u ra Buk Tabu, ma ra dekdekin Nara?

²⁵ Kuma ba diat turu balet ko ra mat, pa diat taula, ma pa diat petwebat u ra tinaula diat len diat ba a kum agelo u ra maua.

²⁶ Ma kumi, u ra nudiat lalaun balet ko ra mat a kum tara irua; pa muat luki utbai u ra buk Mosese i ā timui, u ra pakana kuma i wapuai u ra Diwai, ba Nara i piri korom i lenkumi, Iau ku, a Kalou a nun Abaramo, ma ra Kalou a nun Isako, ma ra Kalou a nun Iakobo?

²⁷ Nara, pa ta Kalou a nudiat a kum minat, a nudiat ku diat lalaun; Muat rara akit.

²⁸ Ma ra pa diat a kum tenatimtimu i wan pat, ma i walagoro diat ba diat wetiritiri ugai, ma ba i nunurai Iesu i balu na kurai a nudiat pirapira, i tiri tana, lenkumi, Awa a wewadu i muka u ra kum wewadu rap?

²⁹ Iesu i piri tana, A wewadu i muka kumi, Muat a tara Isaraelu, Muat ora walogoroi; Ieova a nudat Kalou, Ieova takai ku ia;

³⁰ Ma kumi, Un mari Ieova a num Kalou ma ra balam rap, ma ra niom rap, ma ra nuknukim rap, ma ra num dekdek rap.

³¹ Ma kumi i patap uni, Un mari a tara muru ki ebeben lenkuma u mari ui. Pa ta wewadu i gala u ra ru wewadu kumi.

³² Ma ra tenatimtimu i piri tana, A ligtatuna ui, Tenawawera, i auakak akit a num pirapira, lena, I takai ku; ma pa te ra bulug, Ia ma ku.

³³ Ma ba te i mari ma ra balana rap, ma ra nuknukin rap, ma nuna dekdek rap, ma ba i mari a tara diara ki ebeben welara i mari ia, i ka akit kuma, ma i ka kinalik ma ku a kum wekul‐natutun, ma ra kum wekul rap.

³⁴ Ma ba Iesu i nunurai i pira mananai, i piri tana, Pa u welwelik ko ra matanitu a nun Nara. Ma diat rap diat burut din tiri tana balet un ta lig.

³⁵ Ma ba Iesu i wawera diat u ra ruma na lotu, i piri lenkumi, Lelawai kuma diat a kum tenatimtimu diat piri, lena, A Karisito na tun Davida ia?

³⁶ Kuma Davida i piri ba Niono Tabu i wawera koromi, Ieova i piri ta ra nug Tadaru, Un ki ui u ra woat na limag, ma kaliktau ma ku ag pam diat a num kum iabara welara lig ui papinamai uni.

³⁷ Boboi, Davida i tara Tadaru korom i; ba lenkumi, na tunalik lelawai ia? Ma diat a tara‐na‐kaia diat kaia akit ba diat walogoroi a nuna pirapira.

³⁸ Ma ba i wera diat i lena, Muat katom u diat a kum tenatimtimu, kuma diat nemi diat a wan wetulut ma ra nudiat malu iokana, ma din wewatai u diat a kum tara u ra kum matana bug,

³⁹ Diat nemi kai a kum kinkini na tadaru u ra kum ruma‐na‐lotu ma ra kum kinkini na tadaru u ra kum witamai.

⁴⁰ Diat rapai a utna rap ko diat a kum uala na tebuan, ma diat waruwaruka u ra nudiat pinapet iokana; din balui korom diat bi ma ra dekdek na nakokon.

⁴¹ I ki na ra matana bok di pakitai uni a măni, ma i bobo diat a kum tara ba diat paki a nudiat mani bala ra bok na mani: ma magoro diat a kum tena magoro diat paki uni ta magoro a măni.

⁴² Ma ra tebuan i uala ma kanau kai, i wan pat, ma paki uni ta ruwin a mani kinalik akit, i welara ma ra kodane ku.

⁴³ Ma Iesu i watai korom i diat a nuna kum tara wawera, ma piri ta diat, A ligtatuna iau pira ta muat, A tebuan a uala ma kanau kumi i paki gala akit un diat rap diat pakitai a măni u ra bok na mani:

⁴⁴ kuma diat rap diat paki a pakana ku ko ra nudiat utna galapi; ma ra tebuan kuma i taratai a lig rap i tana koromi, a lig rap i lalaun uni.