Maarko 10 - A Buk 1896 (Bible Portions)

10. A PAKANA.

¹ I wan igen ko ra bual kuma, ma wan u ra pitpitin Iudaia u ra papara Ioridana: ma magoro diat a kum tara diat tolug ugai balet korom i; ma i wawera diat balet, lenkuma i petpeti ut.

² Ma ra kum te Faresaio diat wan korom i, ma diat tiri tana, I takado duk ba ta muana i pet pukuai a nuna tebuan? Diat lena diat walami ku.

³ Ma i tiri ta diat lenkumi, Awa a pirapira na wawera Mosese i tula muat muat a peti?

⁴ Ma diat piri tana, Mosese i nakakon lena, meat a timutai a buk na pet pukuai, ma din pet pukuai.

⁵ Ma Iesu i piri ta diat, lenkuma, Mosese i timutai a wetula kuma un muat, kuma i maliu ku a balamuat.

⁶ Ma tak’ u ra pam kabinpai a lig rap, Nara i ā tara diara a muana ma ra tebuan.

⁷ Ia kuma, a muana in talurai diara a tamana ma nana, ma in tana takum ma nuna tebuan;

⁸ Ma diara wana ra ma ku a mulin‐a‐diara: pa ta ruadi balet diara, ra ma ku a mulin‐a‐diara.

⁹ Kumi, a lig ba Nara i kubu ugai, koniku ta muana in palai balet.

¹⁰ Ma ba diat ki u ra ruma a nuna kum tara wawera diat tiri tana balet u ra lig kuma.

¹¹ Ma i piri ta diat Te i pet pukuai a nuna tebuan, ma diara taula balet ma te bulug a tebuan, i pet na tinouru uni.

¹² Ma ba a tebuan bulug i pet pukuai a nuna muana, ma diara taula balet ma te bulug a muana, ia kai pet na tinouru.

¹³ Ma diat kipi korom i a kum nat kinalik, ba in pam diat: ma ra kum tara wawera diat wadu bat diat a tara.

¹⁴ Ma ba Iesu i boboi, i kămkămiak uni, ma i piri ta diat, Muat madekua diat a kum nat liklik diat a wan korom iau; koniku muat pira bat diat: kuma diat u ra matanitu a nun Nara diat len diat bi.

¹⁵ A ligtatuna, iau pira ta muat, Ba te pa i nuru tau a matanitu a nun Nara len ba a nat kinalik, pa in ruk uni a muana kuma.

¹⁶ Ma i romo diat u ra limana, ma pakitai a limana u diat, ma pira wadan diat.

¹⁷ Ma ba diat weuru u ra akapi, ta muana i kala koromi, ma tutudug nana, ma tiri tana, lena, Tena‐wawera kokoina, awa ta lig ag peti ag rakan pai uni a lalaun pa in rap?

¹⁸ Ma Iesu i piri tana, Ulawai kuma u watug iau lena iau koina? Pa ta tara i koina, Nara ku i koina, ia takai ku.

¹⁹ U nunurai a kum pirawebat, Koniku um doko te, Koniku pet na tinouru, Koniku ualog, Koniku loklok te, Koniku wabibioi, Un ururu diara tamam ma nam.

²⁰ Ma i urunioat tana, lenkumi, Tenawawera, a kum lig rap kuma iau taram ut uni ba iau nat lik kubai.

²¹ Ma ba Iesu i bobo ia i maramari, ma i piri tana, Ra ma ku a lig u iba uni; un wan, un wiura a num kum utna rap, ma palau diat a kum tara kanau uni, ma i gala a num utna din tari tam u ra maua: ma un wan urin, ma patap un iau.

²² Ma ba i walogoroi a pirapira kuma a matana i mamutag, ma i wan igen ma balana i tapunuk: kuma i gala akit a nuna utna.

²³ Ma Iesu i bobo karakarai u diat, ma piri ta diat a nuna kum tara wawera, lenkumi, I bilbilig akit korom diat a kum petpalig ba diat ligna ruk ura matanitu a nun Nara!

²⁴ Ma diat a kum tara wawera diat kakaian u ra nuna piripira. Ma Iesu i piri balet, ma lena un diat, A kum na tuglik, i bilbilig akit korom diat diat nurutau u ra nudiat utna ba diat ligna ruk u ra matanitu a nun Nara!

²⁵ I pet kaka u ra kamela in ruk aluru u ra mata‐ra‐nidel, ma i pet bilbilig akit u ra petpalig ba i ligna ruk u ra matanitu a nun Nara.

²⁶ Ma diat kakaian akit uni, ma diat piri tana, Ba lenkuma o oi te in lalaun?

²⁷ Ma Iesu i bobo diat ma i lena, Ba tara ku diat kana pam larapai, Nara ku i pam larapai: kuma Nara i pam larapai a lig rap i ligna peti.

²⁸ Ma Petero i piri tana, lenkumi, Le! miat talbegua a kum lig rap, ma miat murumuru ui.

²⁹ Iesu i piri, A ligta tuna, iau pira ta muat, Ba te i wan talurai a nuna ruma, ba a kum tetenalik muana, ba a kum tetenalik tebuan, ba nana, ba tamana, ba a kum natunalik, ba kum taman kup iau ma kup a wewapua auakak,

³⁰ Kura in rakanpai ta marina balet u ra pupukai kumin, a kum ruma, ma kum tetenalik muana, ma kum tetenalik tebuan, ma kum nana, ma kum natunaliklik, ma kum taman, ma ra kum wemag kai: ma u ra pupukai na muru din rakanpai a lalaun pa i rap.

³¹ Ma magoro a tara diat muka diat a murumuru; ma ra tara diat murumuru diat a muka.

³² Ma diat weuru u ra akapi, diat a wan u Ierusalema; ma Iesu i muka diat: ma diat kakaian; ma diat bulug diat murumuru diat burut ma. Ma i ben‐igenpa diat a Winunu‐ma‐ruadi, ma i piri kabin ta diat u ra lig din peti korom i, lenkumi,

³³ Boboi, dat wan u ra Ierusalema; ma din taramaruai na Tu‐ra‐Muana korom diat a kum tenapinapet gala ma ra kum tenatimtimu bulug; ma diat a nakakon in mat, ma diat a taramaruai korom diat a kum Taraigen;

³⁴ Ma diat a tatauru un i, ma kara un i, ma diat a rapu i, ma um doko i; ma ba tul a bug i rap in turu balet.

³⁵ Ma Iakopo ma Ioane a ru na tun Sebedaio diara wan korom i, ma piri tana, lenkumi, Tenawawera, mira nemi un peti kup mira a lig mira arig ui uni.

³⁶ Ma i tiri diara, lena, Awa a lig muru nemi ag peti kup muru?

³⁷ Ma diara piri tana, Un tari ta mira ba mira ki, ra u ra woat na limam ma ra u ra maira na limam u ra num matanitu.

³⁸ Ma Iesu i piri ta diara, Pa muru nunurai a lig kuma muru arig kupi. Muru inimi larapai duk a la ba ag inimi? Ma din papitaiso muru ma ra papitaiso ba ag papitaiso mai.

³⁹ Ma diara piri tana, Mira pet larapai. Ma Iesu i piri ta diara, a la ba ag inimi muru kai muru inimi kalikmaku; ma ra papitaiso di papitaiso iau mai din papitaiso muru bulug mai.

⁴⁰ Ma ba muru ki u ra woat na limag ma u ra maira na limag iau pa iau nakakon uni: a lig kuma din tari ta diat ku di pam takonotai kup diat.

⁴¹ Ma ba diat a Winunu diat walogoroi diat ligna kămkămiak korom diara Iakobo ma Ioane.

⁴² Ma Iesu i wata diat korom i, ma piri ta diat. Muat nunurai, lena, diat ba diat nakakon a kum tara igen diat pet dokodokopa u diat; ma ra nudiat kum uiana diat nakakon u diat.

⁴³ Ma pa muat a pet lenkuma un muat: ba te i aman Tadaru un muat ia kuma a numuat wetula.

⁴⁴ Ma ia ba i ligna muka un muat, ia kuma in taramlu un muat rap.

⁴⁵ Kuma, a ligtatuna, na Tu‐ra‐Muana pa i wanurin din taram korom i a kum tara: i wanurin in taramlu korom diat, ma din tari a nuna lalaun in wekulbat diat a magoro.

⁴⁶ Ma diat wan u Ieriko; ma ba I wan taka Ieriko, ma diat a nuna kum tara wawera ma diat a magoro kum tara, Boboi, na tun Timaio, a iana Batimaio, a tena arigrek, i pula ma i ki u ra papara akapi.

⁴⁷ Ma ba i walogoroi, lena, Iesu a te Nasaret kuma, i watai ma piri, Iesu, na tun Davida un maramari iau.

⁴⁸ Ma magoro a tara diat pira‐bati, in papaki ku: ma i pet a gati nuna wewatai, Ui ma na Tun Davida, un mari iau.

⁴⁹ Ma Iesu i turu, ma piri, Muat wata ia. Ma diat watai a pula, ma piri tana, Un manatug: un turu, i wata ui.

⁵⁰ Ma ia, i og‐uai a nuna malu, ma turu na te, ma wan korom Iesu.

⁵¹ Ma Iesu i piri tana, ma tiri lenkumi, Awa ta lig u nemi ba ag peti un ui? Ma ra pula i piri tana, Raboni, iau ligna bobo.

⁵² Ma Iesu i piri tana, Un wan, a nunuruim i walaun ui. Ma matana i bobo na kuru ma ut ma i murumuru ia u ra akapi.