Maarko 1 - A Buk 1896 (Bible Portions)

A PAKANA I.

¹ A kabina u ra wewapua auakak un Iesu Karisito, na tun Nara.

² Lenkuma Isaia a parofita i ā timutai. Boboi, iau tulai a nug wetula na muka tam, ba in pam takono a num akapi;

³ A igana te i wewatai u ra bil, lena, Muat pam takono a akapi nu ra Tadaru, pam kadoi a nuna kum akapi.

⁴ Ioane i ā wanurin, ma papitaiso ta diat u ra bil, ma wapuai u ra papitaiso na nukpuku kup a unuai a petakakai.

⁵ Ma diat a kum tara rap tak’ura bual rap Iudaia, ma diat kai taka Ierusalema diat wan korom i; ma i papitaiso diat u ra danim Ioridana ma diat pirapuanai a nudiat pet akakai.

⁶ Ioane i kop ma ra weuna kamela, ma ra kopkop panina pika u ra nuna gaianakop, ma i ani a kum ko ma ra meli na bil.

⁷ Ma I wawera ma piri, lenkumi, Ra i murumuru iau i gala akit un iau, pa iau ka iau tutudug ma palauai a kuara i ra nuna robo.

⁸ Iau kumi iau papitaiso ta muat ma ra pala: ma ia kuma, in papitaiso muat ma ra Niono Tabu.

⁹ U ra pupukai kuma Iesu i wan taka Nasareta u Kalilaia, ma Ioane i papitaisota ia u ra danim Ioridana.

¹⁰ Ma ba i wan toto tak’ura danim i boboi a maua i tarara, ma ra Niono Tabu i wan pari korom i, le ra in a tabun:

¹¹ Ra igana kai i pari tak’ u ra lagit, lenkumi, Na tuglik walwaliana ui, ma iau kaia akit un ui.

¹² Ma ra Niono i tulai ma ut ia u ra bil.

¹³ Ma i tana u ra bil a wat na no bug, ma Satani i walwalami; ma i ki ugai ma ra kum pika lomlom ma ra kum agelo diat taramlu korom i.

¹⁴ Ba di warukta Ioane u ra ruma na balbalat bati, Iesu i wan u Kalilaia, ma i wawera u ra Wewapua Auakak a nun Nara, ma i piri, lenkumi,

¹⁵ I wewoat a pupukai ma i marawai a matanitu a nun Nara, muat a nukpuku, ma nukatatunai a wewapua auakak.

¹⁶ Ma ba I wawal nakono u ra danim Kalilaia, i boboi Simona ma Anderea dina, diara wara ma ra bene u ra danim; kuma a ru tenatai diara.

¹⁷ Ma Iesu i ben‐a kilapa diara, lena, Muru patap un iau, ag puta muru a ru tenatai u ra tara.

¹⁸ Ma diara păki‐a kaka‐uai, a nudiara bene, ma diara murumuri.

¹⁹ Ma i wawal karai kinalik ma i boboi Iakobo na tun Sebedaio ma Ioane dina, diara ki bulug u ra aka, ma baban a kum bene.

²⁰ I wata pa ma ut diara; ma diara madekuai a tamadiara Sebedaio u ra aka ma diat a kum wetula, ma diara murumuri.

²¹ Ma diat wan u Kapanaumi; ma i ruk kaka u ra ruma na lotu u ra Sabate ma wawera i ai.

²² Ma diat kakaian u ra nuna wawera; kuma i wera diat len ba te i nakakon ma pa i len ba diat a tena‐timtimu.

²³ Ma ra muana a tebaran pikoina i waogi; i tana u ra nundiat ruma na lotu.

²⁴ Ma i ke una te ma i piri lenkumi, Oi, daralawai ma ui Iesu a te Nasareta? U wan pat duk un umuai miat ni? iau nunura ui a Niono Maramarek ui a nun Nara.

²⁵ Ma Iesu i wadu bat i ma piri tana, un ki mut ma wan igen koni.

²⁶ Ma ra tebaran pikoina i kunai ma kulkulai mat ma wan igen kon i.

²⁷ Ma diat rap diāt kakaian uni, ma diat wetiri karakarai, lenkumi, awa duk kumi? a wawera matakina kumi! kuma i tula wadekdek‐ua diat a kum tebaran pikoina, ma diat taram korom i.

²⁸ Ma ra wewapua uni i winarag kaka u ra rakrakan bual rap Kalilaia.

²⁹ Ma ba diat pari tak’u ra ruma na lotu, diat wan ma diat ruk u ra nudiara ruma Simona ma Aniderea, diat wan ugai ma Iakobo ma Ioane.

³⁰ Ma ra nimuna Simona i inep ma ra malapag na awawian; ma diat wapua Iesu uni.

³¹ Ma Iesu i wan tutugai, ma i pam a limana, ma waturi u na te; ma ra nuna malapag na awawaian i tamarara ma ut kon i, ma i taramlu korom diat.

³² Ba malurap ma make i lop, diat kipi korom i a kum tara rap diat malapag, ma diat bulug a kum tebaran pikoina di waog diat.

³³ Ma ra kum tara rap tak’ u ra taman kuma diat tolug ugai na ra bonanaka.

³⁴ Ma I wakadelpa diat a magoro kum tara diat malapag u ra malapag tiba na ugana, ma i lu‐ruai bulug magoro na tebaran ko diat, ma i pirabat diat a kum tebaran, lena, koniku diat a pirapiri, kuma diat nunura la.

³⁵ I tawagun u ra malana kabot ba i marum kubai, i pari u na taman ma wan u ra bil, ma i arig i ai.

³⁶ Ma Simona ma diat diat ki ugai mai, diat murumurī.

³⁷ Ma ba diat auarepai, diat piri tana lenkumi, A kum tara rap diat auare kup ui.

³⁸ Ma i piri ta diat. Dat a wan karai u ra kum taman i matiti urin, iau wawera diat kai u ra wewapua auakak, a lig kuma iau ā wan pat uni.

³⁹ Ma i ruk u ra nudiat kum ruma na lotu u ra bual rap u Kalilaia, ma i wawera ma i lu‐ruai diat a kum tebaran.

⁴⁰ Ma ra muana lepera i wan korom i ma arig i, ma tutudug na ra matana, ma piri tana, ba U nemi, ui pam larapai u wamaramarek iau.

⁴¹ Ma Iesu i makil a balana korom i, i kadoi a limana, ma tuktai, ma piri tana lena, Iau nemi, un maramarek ku ui.

⁴² Ma ra malapag lepera i tamarara kaka kon i, ma i maramarek akit.

⁴³ Ma i wadu bati ma i tuluai ma ut koni.

⁴⁴ Ma i piri tana lena koniku u wapua te uni; un wan ma wea ui korom a tenapinapet; ma tari tana a wekul kup a num pet maramarek lenkuma Mosese i weputai, di pet a wakinilag uni korom diat.

⁴⁵ Ma ia, i wan pari ma pira puanai ma wapuai lala ma ku a wewapua, ia kuma Iesu i kana ruk balet uni u ra taman, i tana ku u ra bil, ma ra kum tara diat tolug ugai korom i ko ra papapara bual rap.