Ioaanes 4 - A Buk 1896 (Bible Portions)

U RA TEBUAN SAMARIA. Ioane 4.

¹ Ba a Tadaru i nunurai lena a kum te Faresaio diat a walogoropai ba Iesu i werapa diat a magoro, ma i bapitaisota diat ma Ioane a marawaina ku

² (ma Iesu pa i pam a bapitaiso, a nuna kum tara na wawera ku).

³ I wan taka Iudaia, ma i wan balet u Kalilaia.

⁴ Ma ra akapi i wan iai i wan bolo u ra bual Samaria.

⁵ I wan pat u ra taman a nu ra Samaria, a iana Sikari, i matiti a pakan a wanua kuma ba Iakobo i a tara‐tai tan tunalik Iosefa.

⁶ A danim‐ki a nun Iakobo i tana uni. Ma Iesu ba i malowo u ra winawan, i ki na ra danim‐ki. I ki kutkut a make.

⁷ Rā tebuan Samaria i wan pat in witup a danim; Iesu i piri tana, Un wainimta iau.

⁸ A kum tara‐na‐wawera diat wan u ra taman diat a kul utna na anian.

⁹ A tebuan Samaria i piri tana, Lelawai kuma u arig a pala kon iau? kuma a te Iudaia ui, ma ra tebuan Samaria iau. (Kuma diat a Iudaia pa diat kukulweliā ma diat a Samaria.)

¹⁰ Iesu i piri tana, Ba u nunura a wetabara a nun Nara, ma ia ba i piri tam, Un wainimta iau; un arig tana, ma in tari tam a pala na lalaun.

¹¹ A tebuan i piri tana, Tadaru, pa ta la un witup mai, ma ra danim‐ki i dogdog: kun takawai a num pala na lalaun kuma?

¹² U gala duk u ra tamamiat Iakobo, ia ba i tari a danim‐ki ta miat, ma i ininim uni, ma diat kai a kum na tunaliklik, ma ra nuna kum pika kai?

¹³ Iesu i piri tana, Ia ba i inim a pala kumi in maruk balet;

¹⁴ ma ia ba in inim a pala ba ăg tari tana, in tana u ra balana, a matanadanim i bulbulagit u ra lalaun pa in rap.

¹⁵ A tebuan i piri tana, Tadaru, un tari tag a pala kuma, pa ăg maruk balet uni, ma pa ăg wan taltalili balet urin ba ăg witup.

¹⁶ Iesu i piri tana, Un benpa a num taula, muru wan urin.

¹⁷ A tebuan i piri tana, Pa nug ta taula. Iesu i piri tana, U pira nakurai lena, Pa nug ta taula:

¹⁸ kuma limadi pipi ut a num taula; ma ia ba muru ki ugai kumari pa num taula: u piri ligtatuna u ra lig kuma.

¹⁹ A tebuan i piri tana, Tadaru, iau nunurai marakam a parofita ui.

²⁰ Diat a numiat tara mukamuka diat lotu u ra tagai kumi; muat kai, muat piri lena, Ierusalema ku a bual i ka ba diat lotu uni a kum tara.

²¹ Iesu i piri tana, Nelig, un nurutau u ra nug pirapira, kura in wan pat a pupukai ba pa muat a lotu uni korom Tamadat u ra tagai kumi, ba Ierusalema.

²² Muat lotu korom ia ba pa muat nunura i: miat kai, miat lotu korom ia ba miat nunura i; kuma taka u diat a Iudaia ku a Tenawalaun.

²³ In wan pat a pakan a bug, ma i wan pat kubai, ba diat a kum tenalotu ligtatuna diat a lotu u ra niodi ma ra ligtatuna korom a Tamadat: kuma Tamadat i auare kup diat lenkuma ba diat lotu korom i.

²⁴ A Niono ku Nara: ma diat rap diat lotu korom i, i ka ba diat lotu u ra niodi ma ra ligtatuna.

²⁵ A tebuan i piri tana, Iau nunurai in wan pat Mesaia (ia ba di patapa i bulug, Karisito) ba in wan pat ut in piraweata a kum lig rap ta dat.

²⁶ Iesu i piri tana, Iau ku ia, iau pirapiri tam.

²⁷ A nuna tara na wawera diat wan pat: ma diat kakaian, kuma diara pirapiri ugai ma ra tebuan; ma pa te i tiri un i, Awa u auarekupi? ba, Lelawai kuma muru pirapira ugai ma i?

²⁸ Ma ra tebuan i wan talurai ma ku a nuna in pala, ma i wan u ra taman, ma i piri ta diat a kum tara, lena,

²⁹ Muat in, muat a bobo a muana i wapuata iau u ra lig rap iau a pamtai: a Karisito duk kumi, ba pate?

³⁰ Diat wan taka u ra taman ma ba diat wan kubai korom i,

³¹ A kum tara‐na‐wawera diat arig i lena, Rabai, un wagan.

³² I piri ta diat, Ră gag utna pa muat nunurai.

³³ A tara na wawera diat pirapiri ugai, lena, Te i kip‐tabarata i duk ma ta utna na anian?

³⁴ Iesu i piri ta diat, A gag utna ba ăg pet a wetula a nun ia ba i tula iau urin, ba ăg banoto a nuna pinapam.

³⁵ Pa muat piri duk lena, Wat na kalag ma ku in wan pat a kalag na rotkutu? Iau pira ta muat, Muat tatada, muat bobokokono a kum pinapam, i mukan ma.

³⁶ Ia ba i rotkutu di takom i, ma i kon a uaina u ra lalaun pa in rap; ma ia ba i oglamiratai, ia bulug ba i rotkutui, diara kaia ugai.

³⁷ A pirapira ligtatuna kumi, Rā i ogoglamira, ma rā bulug i rotkutui.

³⁸ Iau a tula muat lena muat a rotkutu a lig kuma pa muat papam uni: rā kum tara diat papam, ma muat, muat kon a uaina.

³⁹ Magoro na Samaria tak u ra taman kuma diat nurutau un i u ra pirapira a nu ra tebuan, kuma i piri, lena, I wapuata iau u ra lig rap ba iau a pamtai.

⁴⁰ Ba a kum te Samaria diat wan korom i, diat arig i lena in ki ugai ma diat: ma i ki iai ru bug.

⁴¹ Ma magoro bulug diat nurutau un i u ra nuna pirapira:

⁴² ma diat piri ta ra tebuan lena, Miat nuru marakam, ma pate u ra num pirapira: miat ut, miat walogoropa i, ma miat nunurai lena, a Tenawalaun ligtatuna kumi a nudiat a kum tara na tudu ra maua.

⁴³ Ba i rap ru bug i wan taka iai, ma i wan u Kalilaia.

⁴⁴ Kuma Iesu i wapua, lena, Pa di ururu u ra parofita u ra nuna bual.

⁴⁵ Ba i wan pat u Kalilaia, diat a Kalilaia diat pinaria ma i, kuma diat a bobota a kum lig rap i a petai u ra witamai Ierusalema: kuma diat kai diat witamai pa.

⁴⁶ I wan pat balet u Kana i Kalilaia, a taman kuma i a pamtai uni a pala in waine. Ma rā tadaru, na tunalik i malapag Kapanaumi:

⁴⁷ ba i walogoropai lena, Iesu i wan taka Iudaia, ma i wan pat u Kalilaia, i wan korom i, ma i arig i lena in wan pari, in wakadelpa na tunalik; kuma i pot na minat.

⁴⁸ Ma Iesu i piri tana, Ba pa muat bobo a kum wakilag, ma ra kum lig na kakaian, pa muat a nuru.

⁴⁹ A tadaru i arig i, lena, Tadaru, un wan pari ba pa i mat utbai na tuglik.

⁵⁰ Iesu i piri tana, Un wan ma; na tumlik i lalaun. A muana kuma i nuru u ra pirapira ba Iesu i wapua i uni, ma i wan talili balet.

⁵¹ Ma ba i wan kubai, a nuna kum wetula diat wetarom ma i, ma diat wapua i, lena, Na tumlik i lalaun.

⁵² Ma i tiri diat u ra pakan a bug i kadel kabin uni. Diat piri tana, Na bug, u ra limadi ma ruadi a pakana, a awawian i wan kon i.

⁵³ Ma tamana i nunurai lena, u ra pakan a bug ku kuma Iesu i piri tana, Na tumlik i lalaun: ma i nurutau un i, ia, ma diat rap ma i u ra matākina.

⁵⁴ A ru pakan a wakinilag kumi Iesu i petai, ba i wan taka Iudaia ma i wan pat u Kalilaia.