Ioaanes 11 - A Buk 1896 (Bible Portions)

UN LASARO. Ioane 11.

¹ Rā muana i malapag, Lasaro a te Betania, a taman Maria ma Marita dina wawina.

² A Maria kuma ia ba i kui a Tadaru ma ra dăgi, ma i upai a kakina ma ra weu na lorina, tenalik Lasaro ba i malapag.

³ Ma diara nādina wawina diara wetula korom Iesu, lena, Tadaru, ia ba u mari akit i, i malapag.

⁴ Ba Iesu i walogoroi, i piri lena, A malapag kumi pa in wirua uni, kuma ku ia din pirawalaua Nara uni, ma na Tun Nara kai din ururu uni.

⁵ Ma Iesu i mari dituina Marita, ma tenalik, ma Lasaro

⁶ Ma ba i walogoroi, lena i, malapag, i kipa ku ru bug u ra bual kuma.

⁷ Na muru i piri ta diat a kum tara na wawera, Dat a wan balet u Iudaia.

⁸ A kum tara na wawera diat piri tana, Tenawawera, kumi ma ku a kum Iudaia diat ligna biridokopa ui; ma u wan bakai balet u ra bual kuma?

⁹ Iesu i piri ta diat, Pa noina ma ruadi duk a pakana u ra bug? Ba te i wan u ra keke pa i tutuka, kuma i bobo a kapakapa i tana na tudu ra maua.

¹⁰ Ba te i wan u ra marum, i tutukā, kuma pa ta kapakapa i tana uni.

¹¹ I piratai mun a kum lig kumi: na muru i piri ta diat, A nudat palūg Lasaro i inep; iau wan lena ăg wagun i ko ra ininep.

¹² A kum tara na wawera diat piri tana, Tadaru, ba i inep ku in kadel balet.

¹³ Iesu i pirata a winiruana: ma diat kanapi lena i pirata a go u ra ininep.

¹⁴ Ma Iesu i piraweatai ta diat lena, Lasaro i ā mat.

¹⁵ Ma iau kaia na marumuat kuma pa iau ki uni, muat a nuru uni; Dat a wan korom i.

¹⁶ Tomasi, a iana bulug, Titimo, i piri ta diat a kum tara na wawera Dat a wan rap, dat a wirua ugai ma i.

¹⁷ Ba Iesu i wan pat, i nunurai lena, i inep wat na bug ma u ra ruma na minat.

¹⁸ Betania pa i welwelik kon Ierusalema, ru maile ku;

¹⁹ ma magoro na tara Iudaia diat wan korom Marita ma Maria lena diat wamarip diara u ra te diara.

²⁰ Ma Marita, ba i walogoroi lena Iesu i wan pat, i wan barata i: Ma Maria i ki ku na ruma.

²¹ Ma Marita i piri tan Iesu, Tadaru, ba u ki ut kumin, teglik pa i mat.

²² Ma iau nunurai lena, a lig rap ba un arigtai kon Nara, Nara in tari tam.

²³ Iesu i piri tana, Temlik in lalaun balet.

²⁴ Marita i piri tana, Iau nunurai kura in lalaun balet u ra tintinip na bug ba diat a turu balet uni a kum tara.

²⁵ Iesu i piri tana, Iau ku a kabi na turu balet, ma ra kabi na lalaun: ia ba i nurutau un iau, ba i mat, kura in lalaun:

²⁶ ma ia ba i lalaun, ma i nurutau un iau, pa in wirua ma. U nuru u ra lig kumi, ni?

²⁷ I urunioat tana, Iu, Tadaru: iau nuru lena, a Karisito ui, na Tun Nara, ia ba in wan pat u na tudu ra maua.

²⁸ Ba i piratai lenkumi, i wan, ma i beninopa tenalik Maria, ma i wapua i lena, A Tenawawera i wan pat, ma i wata ui.

²⁹ Ma ba i walogoroi, i turu ma ut, ma i wan korom i.

³⁰ (Iesu pa i wan pat utbai u ra taman, i ki kubai u ra bual kuma diara wetarom uni ma Marita.)

³¹ Ma diat a Iudaia diat ki ugai ma Maria u ra ruma, ma diat wamārip i, ba diat bobo i ba i turu kaka ma i pari u na taman, diat murumuri, kuma diat kanapi lena, i wan u ra ruma na minat, ba in luan iai.

³² Ma Maria ba i wan pat u ra bual Iesu i ki uni, ma i bobo ia i tutudug na ra kakina, ma i piri tana, Tadaru, ba u ki ut kumin, teglik pa i mat.

³³ Ba Iesu i boboi ba i luan, ma diat luan bulug a kum Iudaia diat weuru ma i, i tapunuk akit uni a balana,

³⁴ ma i tiri diat uni lena, Kura muat wainepta ia a wai? Diat piri tana, Tadaru, un wan urin, un boboi.

³⁵ Iesu i tagi.

³⁶ A kum Iudaia diat piri lena, Boboi, a gala ma a nuna maramari korom i!

³⁷ Ma ta magan ko diat diat piri lena, A muana bi i pet a bobopa a pula, pa i pam larapai duk lena, koniku in mat a muana kumi?

³⁸ Ba Iesu i tapunuk balet u ra balana, i wan pat korom a ruma na minat. A mata ku ia, ma di bogbati ma ra wat.

³⁹ Iesu i piri ta diat, Muat rakanua a wat. Marita, a ten ia ba i mat, i piri tana, Tadaru, i agina ku, kuma wat na bugina kubai.

⁴⁰ Iesu i tiri un i lena, Pa iau piri tam duk lena, ba u nuru un bobo a dekdekin Nara?

⁴¹ Ma diat rakanua a wat. Ma Iesu i tatada, ma i piri lena, Tamag, iau karikpa ui, kuma u walogoro iau.

⁴² Ma iau nunurai lena, u walogoro liklik iau: ma iau piri u diat ku a tara na kaia diat turu taluit, ba diat a nuru uni lena u a tulata iau urin.

⁴³ Ma ba i piratai lenkumi, i watai u na te, lena, Lasaro, un pari.

⁴⁴ Ma ia ba i matpa ut mun i pari, a limana ma ra kakina di dotai ma ra malu na minat; rā malu bulug di dota a matana mai. Iesu i piri ta diat, Muat a palaua i ma, ba in wan.

⁴⁵ Magoro na papa diat a Iudaia diat weuru ma Maria, ba diat bobo a lig i peti, diat nurutau un i.

⁴⁶ Ma rā magan ko diat diat wan korom a kum te Faresaio, ma diat wapua diat u ra kum lig Iesu i petai.

⁴⁷ A kum tadaru na pinapet ma ra kum te Faresaio diat tolug ugai, ma diat pirapiri ugai lena, Awa dat peti? magoro na lig na wakinilag a muana kumi i peti.

⁴⁸ Ba dat madekta i lenkumi, a kum tara rap diat a nurutau un i: ma diat a Roma diat a wan pat, ma diat a rakanarapua a gaiadat ma ra nudat matanitu.

⁴⁹ Ma rā pa diat, Kaiafa, a tadaru na pinapet u ra tinoan kuma, i piri ta diat,

⁵⁰ Pa muat nunura ta lig, ma pa muat nuki lena, i ka korom muat ba te in wiruana diat a tara, ma koniku diat irua rap a un‐a‐tara.

⁵¹ A lig kumi pa i piri ba ia ku: ma ba a tadaru na pinapet ia u ra tinoan kuma, i wapua muka‐tau un Iesu, lena in wiruana diat a tara Iudaia;

⁵² ma pa diat ku a un a tara kuma, in ben ugai bulug diat a kum na tun Nara diat ki werantau, ba ta takai ma ku diat.

⁵³ Taka u ra bug kuma diat pigit a na maden.