Ioaanes 10 - A Buk 1896 (Bible Portions)

U RA KOINA TENAWARUA. Ioane 10.

¹ Iau pira ligtatuna ta muat, Ia ba pa i ruk u ra bonanaka u ra log na sipi, i ka bolo ku u ra papara igen, a tenaualog, ma ra tenawerarā ia.

² Ia ba i ruk u ra bonanaka, a tenawaruabat sipi ia.

³ A tenawaruabat a bonanaka i papāra i; ma ra kum sipi diat walogoro a igana: i wata diat a nuna kum sipi ma ra iadiat, ma i ben a paripa diat.

⁴ Ba i ben a pariua rap diat a nuna kum sipi u na taman, i muka diat, ma ra sipi diat murumuri: kuma diat nunura a igana.

⁵ Ma pa diat murumuru a waira, diat kala ku koni i: kuma pa diat nunura a igadiat a kum wawaira.

⁶ Iesu i wapuata diat u ra pirapira welwelara kumi: ma pa diat manana u ra kum lig i wapuata diat uni.

⁷ Ma Iesu i wapuata diat balet lena, Iau pira ligtatuna ta muat, Iau ku, a bonanaka iau a nu ra kum sipi.

⁸ Diat rap ba diat muka korom iau, a kum tenaualog, ma ra kum tenawerarā ku diat, ma ra kum sipi pa diat walogoro a igadiat.

⁹ A bonanaka iau: ba te i ruk un iau, din walaunpa i, in ruk, in pari taltalili, ma in auarepa utna.

¹⁰ A tenawerarā i wan pat lena in werarā, in weum, in wabap; iau kai, iau wan pat, ba diat a rakanpai uni a lalaun, ma diat rakan a galapi.

¹¹ A koina tenawarua iau: a koina tenawarua i wiruana diat a kum sipi.

¹² Ma ia ba di takom i u ra nuna pinapam, ma pa ta tenawarua, kuma a kum sipi pa nuna, i bobo a wolifa ba i wan pat, ma i kala ko diat a kum sipi, ma ra wolifa i rapa diat, ma i pet a weranua diat:

¹³ i kala, kuma di taktakom i ku, ma pa i mari diat a kum sipi.

¹⁴ A koina tenawarua iau; ma iau nunura diat a nug sipi, ma diat a nug sipi diat nunura iau.

¹⁵ lenkuma Tamag i nunura iau, ma iau nunura Tamag; ma iau wiruana diat a kum sipi.

¹⁶ Rā nug kum sipi kai pa diat ki u ra log kumi: i ka ba ăg benpa diat kai, ma diat a walogoro a igag; kun rā ma ku a kaba sipi, ma rā ma ku a tenawarua.

¹⁷ A Tamag i mari iau u ra lig kumi, kuma iau pakiuai a nug lalaun, ba ag rakanpai balet.

¹⁸ Pa te i rai kon iau, iau ku iau pakiuai. Iau pam larapai ba ăg pakiuai, ma iau pam larapai ba ăg rakanpai balet. A wetula kumi a Tamag i tara tag.

¹⁹ Ma diat wepul balet a Iudaia u ra pirapira kumi.

²⁰ Magoro na papa diat diat piri lena, A tebaran i og i, i loglog; lelawai kuma muat walogoro i?

²¹ Ma ra tara bulug diat piri lena, Te ba a tebaran i og i pa in pirapira lenkumi. A tebaran duk i pet a bobopa a pula? len ku pate.