Ioaanes 1 - A Buk 1896 (Bible Portions)

Ioane 1.

¹ A Pirapira i lalaun u ra kabina, a Pirapira diara ki ugai ma Nara, ma Nara ku a Pirapira.

² U ra kabina diara ki ugai ma Nara.

³ Ia ku di a pamtai uni a kum lig rap; ba pate ia pa ta lig di pamtai u ra kum lig rap di a pamtai narap.

⁴ A lalaun i tana un i; a lalaun kuma a kapakapa ia korom diat a tara.

⁵ A kapakapa i pua u ra boboto; ma ra boboto pa i pam lurāpai.

⁶ Rā muana i wan pat, Nara I tula i, a iana Ioane.

⁷ I wan pat a tenawewapua ia, in wapuatau u ra kapakapa, ba a kum tara rap diat a nuru un i.

⁸ Pa ta kapakapa ia, i wan pat in wapua tau ku u ra kapakapa.

⁹ A kapakapa ligtatuna, ia ba i wakapakapa diat a kum tara rap, ba i wan kubai na tudu na maua.

¹⁰ I ki na tudu na maua, ma ia ku di a pamtai un i na tudu na maua, ma diat a tara na tudu na maua pa diat nunura i.

¹¹ I wan pat urin korom diat a nuna ut, ma diat a nuna tara pa diat nurutau un i.

¹² Ma diat rap ba diat nurutau un i, i tara ta diat lena a kum na tun Nara diat, korom diat ku kuma diat nurutau u ra iana:

¹³ diat kuma pa di butapa diat ko diat a tara mukamuka, pate kai ko ra panidi, ba u ra nakakon a nu ra tara, kon Nara ku.

¹⁴ Ma ra Pirapira i kip panidat ku, ma i ki ugai ma dat (ma dat a bobotai ut a marina, a măramăra lenkuma a nu ra kăpuana nat kon tamana), i teg ma ra maramari ma ra ligtatuna.

¹⁵ Ioane i wapuatau un i, ma i piri lenkumi, Ia ku kumi iau a piri un i lena, Ia ba i murumuru iau i mukata iau balet; kuma i mukata iau ku.

¹⁶ Di a tabara warapta dat ma ra lig i teg mai, ma ra maramari buraburei kai.

¹⁷ Kuma Mosese i tari a Wawera; ma Iesu Karisito i tari a maramari ma ra ligtatuna.

¹⁸ Pa ta muana i bobota Nara; a kăpuana na Tunalik, ia ba i ki u ra rabrabon Tamana, ia ku i wapua un i.

¹⁹ Kumi a wewapua a nun Ioane, ba diat a Iudaia diat tula diat a kum tenapinapet ma ra kum na tun Livai taka Ierusalema korom i, lena diat a tiri, O oi ui?

²⁰ Ma i wewero ku lenkumi, Pa ta Karisito iau.

²¹ Ma diat tiri, Lelawai, Ilaita duk ui? I weworo ku, Pate. A parofita kuma duk ui? I weworo ku ta diat, Pate.

²² Diat tiri balet, O oi duk ui? miat a wapuata diat uni diat tula miat. Awa u piri un ui?

²³ I wapuata diat uni lena, Iau a win igan te i wewatai u ra bil, lena, Muat a pam kado a akapi a nun Ieova, lenkuma Isaia a parofita i a piratai.

²⁴ A kum te Faresaio diat tula diat.

²⁵ Ma diat tiri lena, Lelawai kuma u pam a bapitaiso ba pa ta Karisito ui, ba Ilaita, ba a parofita kuma?

²⁶ Ioane i wapua diat uni lena, Iau pam a bapitaiso ma ra pala: ma rā i turu na liwan ta muat, pa muat nunura i utbai,

²⁷ ia ba i murumuru iau, a kuara i ra nuna robo iau pa iau ka uni ba ăg palauai.

²⁸ A kum lig kumi di a petai Betania, u ra papara Ioradana urog iai, kuma Ioane i pam a bapitaiso iai.

²⁹ U na buru i bobopa Iesu ba i wan kubai korom i, ma i piri lena, Muat a bobo a Lam a nu ra Kalou, ia ba i lo igenua a petakakai a nu ra na Tudu‐ra‐maua!

³⁰ Ia ku kumi iau a piratai ta muat uni lena, Te in murumuru iau i gala un mira, kuma i mukata iau.

³¹ Ma pa iau nunurapa i utbai; ma ba din weata i ta diat a Israelu, a lig ku kumi iau wan pat uni, ba ăg pam a bapitaiso ma ra pala.

³² Ma Ioane i wapua un i lena, Iau a bobota a Nion Nara i wan pari tak u ra maua le ra in a tabun, ma i ki tau un i.

³³ Ma iau, pa iau nunurapa i utbai: ma ia ba i tula iau lena ăg pam a bapitaiso ma ra pala, i wapua iau uni lena, Ia ba un bobo a Niono i wan pari ma i ki tau un i, ia ku kuma in pam a bapitaiso ma ra Niono Tabu.

³⁴ Ma iau a bobotai, iau wapua bulug un i lena, na Tun Nara ut kumi.

³⁵ U na buru bulug Ioane i turu tau, ma ruadi kai ko diat a nuna tara na wawera;

³⁶ ma i bobo Iesu ba i wan, ma i piri lena, Boboi, a Lam a nu ra Kalou!

³⁷ Diara ru tara na wawera diara walogorota i ba i piri, ma diara murumuru Iesu.

³⁸ Ma Iesu i tapuku, ma i bobo diara ba diara murumuri, ma i piri ta diara, Awa kuma muru auarekupi? Diara piri tana, Rabai (a pipilaina, Tenawawera), U maren u wai?

³⁹ I piri ta diara, muru in, muru boboi? Ditul weuru ma i, ma diara bobo a bual ba i ki uni; ma diara ki nana u ra bug kuma: a wat na pakan a bug u ra malurap.

⁴⁰ Rā pa diara ba i walogoro Ioane, ma i murumuri, Andrea, ten Simona Petero.

⁴¹ I auaremukapai mun tenalik Simona, ma i piri tana, Miat auarepai a Mesaia (a pipilaina, a Karisito).

⁴² I benpa i korom Iesu. Iesu i bobopa i, ma i piri tana, Simona na tun Iona ui: din patap a iam bulug Kifa (a pipilaina, Petero‐a wat.)

⁴³ U na buru i ligna winawan u Kalilaia, ma i bobo Filipo: Iesu i piri tana, Un patap un iau.

⁴⁴ Filipo a te Beteseida, a taman i diara Andrea ma Petero.

⁴⁵ Filipo i bobopa Natanielu, ma i piri tana, Miat auarepa ia ba Mosese i timu buk un i u ra Wawera, ma diat a kum parofita kai, Iesu a te Nasareta, na tun Iosefa.

⁴⁶ Natanielu i piri tana, Ta koina lig in wan taka Nasareta? Filipo i piri tana, In, un boboi.

⁴⁷ Iesu i bobo Natanielu, ba i wan kubai korom i, ma i piri un i, Boboi, te na tun Israelu a mulina, pa ta waruwaruka kon i.

⁴⁸ Natanielu i tiri uni, U nunura iau takawai? Iesu i wapua i uni lena, Ba Filipo pa i wata ui utbai, ba u ki kubai na tudagi ra fik, iau a bobota ui.

⁴⁹ Natanielu i piri tana, Rabai, na Tun Nara ui; a Kig a nu ra Israelu ui.

⁵⁰ Iesu i piri tana, Ba iau piri tam lena, Iau a bobota ui na tudagi ra fik, u nuru uni, ni? Kura un bobo a kum galagala na lig, a kinalik ku kumi.

⁵¹ I piri balet tana, A ligtatuna, a ligtatuna, iau pira tam, Kura muat a bobo a maua ba di papai, ma ra kum agelo a nun Nara diat wan toto, ma diat wan pari, ba diat taramlu korom na Tu ra muana.