Tito 1 - Biblia en Quechua del norte de Conchucos

Apóstol Pablo saludakunqan

¹ Noqa Pablum, Dios Yayapa serviqnin y Jesucristupa apostolnin kar, Dios Yaya akranqan kaqkunata willakuyninta yachaykätsï Jesucristuman firmi creyikur pay munanqannö kawakuyänanpaq.

² Dios Yaya kay patsata manaraq kamar prometinqannöllam pay akranqan kaqkuna gloriachö imayyaqpis kawayanqa. Dios Yayaqa manam llullakuntsu, sinöqa äninqanta imaypis cumplinmi.

³ Tiempu chämuptinnam willakuyninta willakuqkunawan salvamaqnintsik Dios Yaya prometinqanta cumpliykan. Tsaynö cumplirmi noqatapis willakunäpaq churamashqa.

⁴ Tito, noqa creyikunqänö Jesucristuman creyikurmi imayka tsurïnö kanki. Taytantsik Dios Yaya y salvamaqnintsik Jesucristo llakipäshurniki alli päsakuychö kawakunaykipaq yanapaykulläshuy.

Jesucristupa willakuqninkuna imanö kawayänanpaq ninqan

⁵ Creta islachö jaqimurmi nirqaq problëmakunata arreglanaykipaq. Tsaynöllam nirqaq markan markan aywar wawqikuna y panikuna qorikäyanqanchö mayor wawqikunata churanaykipaq.

⁶ Mayor wawqi kananpaqqa pïmaypitapis alli respitashqa y juk warmiyuqllam kayanman. Dios Yayaman creyikur tsurinkunapis allillata ruraq y mamantawan taytanta cäsuqmi kayanman.

⁷ Dios Yayata serviq kaykarqa y wawqikunata panikunata cuidaq kaykarqa mayor wawqikuna kayätsun pïmaypis mana musyapashqa, mana allish tukuq, mana piñaykachaq, mana machaq, mana pelyaq y imatapis mana chaskipakuq.

⁸ Tsaypa rantinqa kayätsun patsatsikuq, allillata ruraq, alli yarpayyuq, Dios Yaya munanqannö kawaq y llutankunata mana ruraq.

⁹ Jesucristupa willakuyninta yachakunqannölla alli yachatsiq kayätsun. Tsaynöpam Dios Yaya munanqannö kawakuyänanpaq wawqikunata y panikunata animatsiyanqa y llutan yachatsikuqkunatapis llutanta mana yachatsiyänanpaq shumaq tantiyatsiyanqa.

Llutan yachatsikuqkunata mana chaskiyänanpaq ninqan

¹⁰ Atskaqmi llutan yachatsikuqkuna wawqikunata y panikunata engañar puriyan. Paykunam mana musyar Israel runakunanö señalakuyänanpaq yachaykätsiyan.

¹¹ Wakin kaq wawqikunata y panikunatam llapan ayllunkunatawan engañayashqa. Paykunaqa imatapis engañanakuyänan raykullam llutankunata yachaykätsiyan. Tsaynö llutanta yachatsiyänanta ama permïtiytsu.

¹² Juk Creta runam marka majinkunapaq qellqarqan: <<Creta runakunaqa llullam, chucaru wätanömi, alläpa mikuqmi y qelam kayan>>.

¹³ Rasun kaqtam tsay runa qellqarqan. Tsaymi llutan yachatsikuqkunata shumaq plëtuyanki Dios Yaya munanqannöna kawakuyänanpaq.

¹⁴ Tsaynölla tantiyatsinki Israel runakuna llutan yachatsikuyanqanta mana cäsuyänanpaq. Llutanta yachatsikuqkunaqa Dios Yayapa palabranta mana cäsukurmi kikinkunapa yarpayllankunapita yachatsikuyan.

¹⁵ Llutanta yarpar mana cäsukuq karmi imapis mana alli kanqanta yarpäyan. Peru Jesucristupa willakuyninman creyikuqkunam sïqa Dios Yaya kamanqankuna llapanpis alli kanqanta musyayan.

¹⁶ Tsay llutan yachatsikuqkunam niyan: <<Noqakunaqa Dios Yaya munanqannömi kawakuyä>>. Peru mana alli rurayninkunata rikarmi runakuna tantiyayan Dios Yayata mana cäsuyanqanta. Tsaymi paykunaqa Dios Yayata mana cäsur runa majinkunata chikirnin ni imatapis allita rurayantsu.