Sofonías 1 - Biblia en Quechua del norte de Conchucos

Dios Yaya castiganan junaq imanö kananpaq kanqan

¹ Kaychömi Dios Yayapa willakuyninta Sofonías willakunqan qellqashqa kaykan. Amónpa tsurin Josías Judá nacionpa mandakuqnin rey kanqan witsaymi Sofonías willakurqan. Sofoníasmi Cusipa tsurin karqan. Cusim Gedalíaspa tsurin karqan. Gedalíasmi Amaríaspa tsurin karqan. Amaríasnam Ezequíaspa tsurin karqan.

² Dios Yayam nin: <<Kay patsachö kaqkunatam imaykatapis llapanta ushakätsishaq.

³ Runakunata y wätakunatam jankat ushakätsishaq. Pishqukunata y lamarchö pescädukunatam llapanta ushakätsishaq. Mana cäsumaq runakunatam ushakätsishaq. Kay patsachö llapan runakunatam ushakätsishaq>>. Dios Yayam tsaynö nin.

⁴ <<Judá runakunata y Jerusalénchö täkuqkunatam castigashaq. Baalta adoraqkunata y ruratsiyanqan ïdulukunatam ushakätsishaq. Baalta serviq sacerdötikunatam ushakätsishaq.

⁵ Wajinkuna jananman lätarkurnin ciëluchö qoyllurkunata qonqurikuykur adoraqkunatam ushakätsishaq. Qonqurikuykur adoraykäyämar dios Molocta adoraqkunatam ushakätsishaq.

⁶ Tsaynöllam ushakätsishaq mana cäsumaqkunata, mana ashimaqkunata y mana rugakamaqkunata>>.

⁷ Dios Yayapa puntanchö llapayki upälla kayay. Llapanta juzganan junaq chaykämunnam. Tsay junaqpaqmi Dios Yaya sacrificiuta previnishqa. Sacrificiuman qayatsinqan runakunapis listunam kaykäyan.

⁸ Dios Yayam nin: <<Tsay juzganqä junaqmi castigashaq nacionchö mandaqkunata, reypa tsurinkunata y juklä runakunapa costumbrinkunata qatir mana adoramaqkunata.

⁹ Tsay junaqmi ïdulu adoraqkunata llapanta castigashaq. Tsay runakunaqa adorayanqan ïdulukunapa templunman churayänanpaqmi suwakuypa y asaltaypa imaykatapis qoriyan>>.

¹⁰ Dios Yayam nin: <<Tsay junaq chikiqninkuna atacayaptinmi Pescädu shutiyuq punkupita alläpa qayaraykachäyanqan wiyakämunqa. Tsaynöllam markapa lädun barriuchö qayaraykachäyanqanpis wiyakämunqa. Lädun lömakunachö qayaykachäyanqanpis alläpa mantsakaypaqmi wiyakämunqa.

¹¹ <<Mactes barriuchö täkuqkuna, llapayki waqayay. Tsay junaqmi llapan negociantikuna wañuyanqa. Rantikuqkunaqa llapanmi ushakäyanqa.

¹² Tsaypunmi linternawan aktsikurkur Jerusalénchö täkuqkunata imanö kawayanqantapis rikäshaq. Tsaychömi jutsata rurar tranquïlu kaykaq runakunata castigashaq. Tsay runakunam shonqullankunachö niyan: <Dios Yayaqa manam castigantsu. Payqa manam allita ni mana allitapis rurantsu>.

¹³ Tsaynö nikäyaptinmi chikiqninkuna llapan imaykankunatapis apayanqa. Wajinkunatapis juchutsirmi ushayanqa. Täkuyänanpaq shäritsiyanqan wajikunachöpis manam täkuyanqatsu. Üvakunata plantarpis vïnunta manam upyayanqatsu>>.

¹⁴ Dios Yaya juzganan junaq chämunanpaq ichikllanam faltan. ¡Tsay junaqqa chaykämunnam! Tsay junaq alläpa mantsakaypaq kaptinmi allish chölu runakunapis qayaraykachäyanqa.

¹⁵ Tsay junaqmi Dios Yaya alläpa rabyanqa. Tsaymi runakuna alläpa llakikur ni imanakaytapis puëdiyanqatsu. Qayaraykachaykarmi ushakäyanqa. Alläpa tutapaymi kanqa. Yanarraq pukutaywanmi mantsakaypaq tutapaskinqa.

¹⁶ Tsay junaqmi alli murallashqa markakunaman y jatusaq törrikunaman tsinkakuyaptinpis contrankuna atacayanqa. Atacayaptin mantsakarmi cornëtata töcar qayaraykachäyanqa.

¹⁷ Dios Yayam nin: <<Runakunata castigaptïmi llakikurnin tutapäpukushqanö puriyanqa. Mana cäsuyämar jutsata rurayanqanpitam tsaynö kayanqa. Yawarninkunapis patsachömi tsaqtsuranqa. Ayakunapis imayka wätapa wanunnöraqmi mashtaräyanqa>>.

¹⁸ Dios Yaya juzganan junaqqa manam qellayninkuna ni qorinkunapis runakunata salvanqatsu. Payqa alläpa rabyarmi kay nacionta jankat ushakätsinqa. Illaqpitam kay nacionchö llapan täkuqkunata ushakätsinqa.