Rut 1 - Biblia en Quechua del norte de Conchucos

Moab nacionman Elimelec aywanqan

¹ Israel nacionchö juezkuna mandakuyanqan witsaymi alläpa muchuy karqan. Tsaymi Judá trïbukuna täkuyanqan Belén markapita juk runa warmintawan tsurinkunata pusharkur Moab nacionman aywakurqan.

² Tsay runapam shutin karqan Elimelec. Warminpa shutinmi karqan Noemí. Tsurinkunanam Mahlónwan Quelión kayarqan. Paykunam Judáchö Belén markapita Efrata casta runakuna kayarqan. Moabman chaykurmi tsaychö täkuyarqan.

³ Moab nacionchö Elimelec wañukuskiptinmi Noemí viüdayaskir ishkay wawankunallawanna quëdarqan.

⁴ Tsay wawankuna jövinyaskirmi Moab nacionchö jipashkunawan churakäyarqan. Queliónpa warminmi karqan Orfa. Mahlónpa warminnam karqan Rut. Moab nacionchö chunka watana täkuykarmi

⁵ Mahlónwan Quelión wañukuyarqan. Tsaymi ollqunwan wawankunapis wañukuskiyaptin japallanna Noemí kakurqan.

Rutwan Noemí Belénman kutiyanqan

⁶ Moab nacionchö kaykarmi Noemí musyarqan Israel runakunaman Dios Yaya bendicionninta churaptin mikuyninkuna alli wayunqanta.

⁷ Tsaymi ishkan llumtsuyninkunata pusharkur Moab nacionpita Judáman kutikurqan.

⁸ Peru nänita aywaykarnam llumtsuyninkunata nirqan: <<Mamaykikunapa wajinman kutikuyay. Noqatawan wawäkunata cuidayämanqaykipita Dios Yaya imaykachöpis yanapaykuyälläshuy.

⁹ Tsaynölla Dios Yaya yanapaykuyäshuy juk ollquwan churakar alli kawakuyänaykipaq>>. Tsaypitam llumtsuyninkunata despidir mutsaykurqan. Llumtsuyninkunanam alläpa llakirnin waqar

¹⁰ niyarqan: <<Manam kutiyätsu. Paqtaykim markaykiman aywayäshaq>>.

¹¹ Peru Noemínam nirqan: <<Kuyashqa wawalläkuna, kutikuyay. ¿Imapaqnatan paqtäpis kayanki? Noqapaqa mananam wawäpis kanqanatsu wiñaptin churakäyänaykipaqpis.

¹² Wajikikunaman kutikuyay. Noqaqa chakwannam kä. Mananam yapay ollquwan churakäshaqnatsu. Kanan paqas ollquwan puñur qeshyaq kaptïpis

¹³ shuyaräyankimanraqku wawä yuriskir jövinyanqanyaq. Manam ollqunnaqllaqa quëdayankimantsu. Wawäkunatawan qojäta Dios Yaya qechumanqanpitam alläpa llakikü. Qamkuna paqtä aywar sufriyaptiki masraqmi llakikushaq>>.

¹⁴ Tsaymi llumtsuyninkuna alläpa waqayarqan. Waqaykäyanqanpitam llumtsuynin Orfa suegranta mutsaykur wajinpa kutikurqan. Peru Rutmi sïqa suegranwan quëdarqan.

¹⁵ Ruttam Noemí nirqan: <<Llumtsuy majikim markaykikunaman kutikuykan. Markaykikunachöqa diosnikikunapis kanmi. Paywan yanaqänakur kutikuyay>>.

¹⁶ Rutnam nirqan: <<Mamïta, ima nimaptikipis manam dëjashaykitsu. Qam aywanqaykipam aywashaq. Täkunqaykichömi täkushaq. Markaykim markä kanqa. Diosnikim Diosnï kanqa.

¹⁷ Maychöpis qam wañunqaykichömi noqapis wañushaq. ¡Kawaykarraq dëjaskirniki aywakuptïqa mana llakipaypa Dios Yaya castigamätsun!>>

¹⁸ Tsaynö niptinmi Noemí ni ima nirqantsu.

¹⁹ Tsaymi ishkan aywakur Belénman chaykuyaptin llapan kushikuyarqan. Juknin jukninmi warmikunapis niyarqan: <<¡Noemí kutikamushqa!>>

²⁰ Tsaynam Noemí nirqan: <<Kananqa amana Noemí niyämaynatsu. Tsaypa rantin Mara niyämay, llapanpaq poderyuq Dios Yaya alläpa castigamanqanpita.

²¹ Kaypita qojäwan y wawäkunawan aywakuptïmi imaykäpis karqan. Peru kananqa jankat waktsayashqam kutimushkä. Llapanpaq poderyuq Dios Yaya tsayläya castigaykämaptinqa amana Noemí niyämaynatsu>>.

²² Tsaynömi Moab nacionpita llumtsuynin Rutwan Noemí kutikuyarqan. Paykunam cebäda cosëcha qallaykaptin Belénman chäyarqan.