Oseas 1 - Biblia en Quechua del norte de Conchucos

¹ Kaychömi Dios Yayapa willakuyninta Beeripa tsurin Oseas willakunqan qellqashqa kaykan. Judá nacionchö Uzías rey kanqan witsaymi Oseas willakurqan. Tsaynöllam willakurqan Jotam rey kanqan witsay, Acaz rey kanqan witsay y Ezequías rey kanqan witsaypis. Israel nacionchönam Joáspa tsurin Jeroboam rey kaykarqan.

Prostitütawan churakänanpaq Oseasta Dios Yaya mandanqan

² Puntata parlaparmi Oseasta Dios Yaya nirqan: <<Prostitüta warmiwan churakaptiki tsurikikuna yuriyätsun. Israel runakuna dëjaskayämar juk dioskunata adorarmi prostitüta warminö kaykäyan>>.

Oseaspa tsurinkuna yuriyanqan

³ Tsaypitam Diblaimpa tsurin Gomerta warminpaq Oseas ashirqan. Tsay warmichömi Oseaspa mayor tsurin ollqu yurirqan.

⁴ Tsaymi Oseasta Dios Yaya nirqan: <<Jezreel markachö maytsikaq runakunata Jehú wañutsinqannömi noqapis castigar Jehúpita miraqkunata wañutsishaq. Tsaynö castigaptïmi Israel nacionpa mandakuqnin reykuna kanqanatsu. Tsaynö ruranäpaq kanqanta musyayänanpaq tsurikipa shutin churanki Jezreelta.

⁵ Tsaynöllam Israel nacionpa soldädunkunata Jezreel pampachö chipyat ushakätsishaq>>.

⁶ Tsaypitanam Oseaspa warmin Gomer warmi wamrata qeshyakurqan. Tsaymi Oseasta Dios Yaya nirqan: <<Tsay tsurikipa shutin churanki Lo-ruhamata. Tsaynö shutin kanqa Israel runakunata manana llakipänäpaq kaptinmi. Paykunataqa mananam perdonashaqnatsu.

⁷ <<Peru Judá nación runakunatam sïqa llakipar kikï salvashaq. Manam guërrawantsu, flëchawantsu, espädawantsu, bestiawantsu ni bestiankunata montashqa soldädukunawantsu salvashaq, sinöqa poderösu kaynïwanmi>>.

⁸ Lo-ruhamata waqtsaskirnam Gomerqa yapay ollqu wamrata qeshyakurqan.

⁹ Tsaymi Oseasta Dios Yaya nirqan: <<Tsurikipa shutin churanki Lo-ammita. Tsay shutinmi kanqa Israel runakuna noqapa manana kayanqanta musyayänanpaq. Tsaymi noqapis paykunapa Diosninkunanatsu kashaq>>.

Israel runakuna allina kawakuyänanpaq ninqan

¹⁰ 10 (2.1) <<Tsaypitam Israel runakuna maytsikaman mirayänanpaq bendicionnïta churashaq. Lamar kuchunchö arenïllanöraqmi yupaytapis mana puëdiypaq maytsikaq kayanqa. <Paykunaqa manam noqapanatsu> ninqächöpis runakunam niyanqa: <Paykunaqa imayyaqpis kawaq Dios Yayapa wamrankunam kaykäyan>.

¹¹ 11 (2.2) Tsaymi Judá nación runakunawan Israel nación runakuna juk nacionllana kayanqa. Mandaqnin reytapis jukllayllatanam churayanqa. Maytsay nacionkunachö täkuyanqanpita kutiyämuptinmi kushikuypaq kanqa. Tsay junaqtam shutitsiyanqa Jezreel kananpaq.