Números 1 - Biblia en Quechua del norte de Conchucos

Israel runakunata Sinaí jirkachö censayanqan

¹ Israel runakuna Egiptupita yarqayämunqan juk wata juk killa päsaskiptinmi Sinaí desiertuchö kaykäyarqan. Tsay junaqmi Tinkuna Carpachö Moisésta Dios Yaya parlapar nirqan:

² <<Israel runakunapa ima shutinkuna y aykaq kayanqanta musyanaykipaq ayllunpa ayllunpa castanpa castanpa censayay.

³ Censarnin ishkay chunka (20) watayuqpita janaqman shutinkunata apuntayay. Tsay runakunam guërraman aywayänanpaq kallpankunachöna kayan. Aarónmi censar yanapashunki.

⁴ Tsaynölla cada trïbupita juk mandakuqta churanki censar yanapashunaykipaq.

⁵ Paykunam kayanqa: Rubén trïbupita Sedeurpa tsurin Elisur,

⁶ Simeón trïbupita Zurisadaipa tsurin Selumiel,

⁷ Judá trïbupita Aminadabpa tsurin Naasón,

⁸ Isacar trïbupita Zuarpa tsurin Natanael,

⁹ Zabulón trïbupita Helónpa tsurin Eliab,

¹⁰ Efraín trïbupita Amiudpa tsurin Elisama, Manasés trïbupita Pedasurpa tsurin Gamaliel (Efraínwan Manasésqa Josépa tsurinkunam kayarqan),

¹¹ Benjamín trïbupita Gedeonipa tsurin Abidán,

¹² Dan trïbupita Amisadaipa tsurin Ahiezer,

¹³ Aser trïbupita Ocránpa tsurin Pagiel,

¹⁴ Gad trïbupita Reuelpa tsurin Eliasaf

¹⁵ y Neftalí trïbupita Enánpa tsurin Ahira>>.

¹⁶ Dios Yaya ninqannöllam cada trïbupita tsay mandakuq runakunata Moisés akrarqan censar yanapayänanpaq.

¹⁷ Tsay akranqan runakunawan Moisés y Aarón qorikaskirmi

¹⁸ llapan Israel runakunata qayatsiyarqan. Tsay junaqmi ishkay kaq killa qallaykunan junaq karqan. Tsaychömi Israel runakunata ayllunpa ayllunpa castanpa castanpa censayarqan. Tsaynö censarmi ishkay chunka (20) watayuqpita janaqman ollqu kaqkunapa shutinkunata apuntayarqan.

¹⁹ Dios Yaya ninqannöllam Sinaí desiertuchö llapan ollqu kaqkunata Moisés censatsirqan.

^20-21 Cada ünunpa shutinkunata apuntarmi ayllunpa ayllunpa castanpa castanpa censayarqan. Tsaynöpam musyayarqan ishkay chunka (20) watayuqpita janaqman aykaq ollqukuna guërraman aywayänanpaq kallpankunachöna kayanqanta. Israelpa mayor tsurin Rubén trïbupitam chusku chunka soqta waranqa pitsqa pachak (46,500) ollqukuna kayarqan.

^22-23 Simeón trïbupitam pitsqa chunka isqun waranqa kimsa pachak (59,300) kayarqan.

^24-25 Gad trïbupitam chusku chunka pitsqa waranqa soqta pachak pitsqa chunka (45,650) kayarqan.

^26-27 Judá trïbupitam qanchis chunka chusku waranqa soqta pachak (74,600) kayarqan.

^28-29 Isacar trïbupitam pitsqa chunka chusku waranqa chusku pachak (54,400) kayarqan.

^30-31 Zabulón trïbupitam pitsqa chunka qanchis waranqa chusku pachak (57,400) kayarqan.

^32-33 Josépa tsurin Efraín trïbupitam chusku chunka waranqa pitsqa pachak (40,500) kayarqan.

^34-35 Josépa tsurin Manasés trïbupitam kimsa chunka ishkay waranqa ishkay pachak (32,200) kayarqan.

^36-37 Benjamín trïbupitam kimsa chunka pitsqa waranqa chusku pachak (35,400) kayarqan.

^38-39 Dan trïbupitam soqta chunka ishkay waranqa qanchis pachak (62,700) kayarqan.

^40-41 Aser trïbupitam chusku chunka waranqa pitsqa pachak (41,500) kayarqan.

^42-43 Neftalí trïbupitam pitsqa chunka kimsa waranqa chusku pachak (53,400) kayarqan.

⁴⁴ Tsay llapantam Moisés, Aarón y chunka ishkay mandakuq Israel runakuna censayarqan. Tsay mandakuq runakunam cada trïbupita akrayanqan kayarqan.

⁴⁵ Paykunam censayarqan ishkay chunka (20) watayuqpita janaqman. Censayanqan ollqukunaqa guërraman aywayänanpaq kallpankunachönam kayarqan.

⁴⁶ Castanpa castanpa censayanqan ollqukunam soqta pachak kimsa waranqa pitsqa pachak pitsqa chunka (603,550) kayarqan.

Levitakunata mana censayanqan

⁴⁷ Israel runakunata censarmi levitakunata censayarqantsu.

⁴⁸ Tsaynö mana censayänanpaqmi Moisésta Dios Yaya nirqan:

⁴⁹ <<Israel runakunata censar levitakunataqa ama censankitsu.

⁵⁰ Paykunataqa churanki Pactu Carpata y tsaychö manëjukunata shumaq cuidayänanpaq. Maypa aywayaptikipis Sagrädu Carpatawan llapan manëjunkunata paykunalla apayanqa. Tsaynölla Sagrädu Carpa waqtankunapa tumat carpankuna shäritsiyanqa.

⁵¹ Maypa aywayaptikipis paykunallam Sagrädu Carpata paskaskir aparnin maychöpis shäritsiyanqa. Mayqanpis mana levita kaykar Sagrädu Carpaman witirqa wañunqam.

⁵² Wakin kaq trïbu Israel runakunam bandërankuna kanqanchö carpankuna shäritsiyanqa.

⁵³ Peru levitakunaqa Pactu Carpa waqtankunapam tumat carpankuna shäritsiyanqa. Tsaynöpam täpayanqa pipis llutalla mana yaykunanpaq. Pipis llutalla yaykuptinqa rabyarmi Israel runakunata castigashaq>>.

⁵⁴ Moisésta Dios Yaya ninqannöllam Israel runakuna llapanta rurayarqan.