Mateo 1 - Biblia en Quechua del norte de Conchucos

Jesúspa unay ayllunkuna pï kayanqan

¹ Abrahampita y rey Davidpita miraq Jesucristupa unay ayllunkunam kayarqan:

² Abrahampa tsurinmi karqan Isaac. Isaacpa tsurinmi karqan Jacob. Jacobpa tsurinkunam kayarqan Judáwan wawqinkuna.

³ Judápa tsurinkunam kayarqan Fareswan Zara. Paykunapa mamanmi karqan Tamar. Farespa tsurinmi karqan Esrom. Esrompa tsurinmi karqan Aram.

⁴ Arampa tsurinmi karqan Aminadab. Aminadabpa tsurinmi karqan Naasón. Naasónpa tsurinmi karqan Salmón.

⁵ Salmónpa tsurinmi karqan Booz. Boozpa mamanmi karqan Rahab. Boozpa tsurinmi karqan Obed. Obedpa mamanmi karqan Rut. Obedpa tsurinmi karqan Isaí.

⁶ Isaípa tsurinmi karqan rey David. Rey Davidpa tsurinmi karqan Salomón. Salomónpa mamanmi karqan Uríaspa viüdan.

⁷ Salomónpa tsurinmi karqan Roboam. Roboampa tsurinmi karqan Abías. Abíaspa tsurinmi karqan Asa.

⁸ Asapa tsurinmi karqan Josafat. Josafatpa tsurinmi karqan Joram. Jorampa tsurinmi karqan Uzías.

⁹ Uzíaspa tsurinmi karqan Jotam. Jotampa tsurinmi karqan Acaz. Acazpa tsurinmi karqan Ezequías.

¹⁰ Ezequíaspa tsurinmi karqan Manasés. Manaséspa tsurinmi karqan Amón. Amónpa tsurinmi karqan Josías.

¹¹ Josíaspa tsurinkunam kayarqan Jeconíaswan wawqinkuna. Jeconías kawanqan witsaymi Israel runakunata achkuskir Babilonia soldädukuna nacionninkunaman prësu apayarqan.

¹² Babiloniachömi Jeconíaspa tsurin Salatiel yurirqan. Salatielpa tsurinmi karqan Zorobabel.

¹³ Zorobabelpa tsurinmi karqan Abiud. Abiudpa tsurinmi karqan Eliaquim. Eliaquimpa tsurinmi karqan Azor.

¹⁴ Azorpa tsurinmi karqan Sadoc. Sadocpa tsurinmi karqan Aquim. Aquimpa tsurinmi karqan Eliud.

¹⁵ Eliudpa tsurinmi karqan Eleazar. Eleazarpa tsurinmi karqan Matán. Matánpa tsurinmi karqan Jacob.

¹⁶ Jacobpa tsurinmi karqan Maríapa ollqun José. Maríapa wawanmi karqan Jesús. Paymi Dios Yaya kachamunqan Cristo.

¹⁷ Abraham kawanqanpita hasta David yurinqanyaqmi chunka chusku generación karqan. Tsaynöllam David kawanqan witsaypita Israel runakunata Babiloniaman apayanqan witsayyaq chunka chusku generación karqan. Tsaynöllam Babiloniaman apayanqan witsaypita hasta Jesucristo yurinqanyaqpis chunka chusku generación karqan.

Jesús yurinqan

¹⁸ Kaychömi qellqashqa kaykan Jesucristo manaraq yuriptin ima päsanqan. Joséwan churakänanpaqmi María parlashqana karqan. Peru Joséwan manaraq täkurmi Espíritu Santupa poderninwan qeshyaq tikrarqan.

¹⁹ Joséqa alli runa karmi Maríata penqakuyman mana churanan rayku pakayllapa dëjayta yarparqan.

²⁰ Tsaynö yarpachakuykaptinmi Dios Yayapa angelnin Joséta sueñuyninchö nirqan: <<Rey Davidpa ayllun José, Maríawan churakayta ama penqakuytsu. Payqa Espíritu Santupa poderninwanmi qeshyaq kaykan.

²¹ Ollqu wamratam qeshyakunqa. Payman creyikuqkunata jutsankunapita salvananpaq kaptinmi tsay wamrapa shutin churanki Jesústa>>.

²² Llapanpis tsaynö päsarqan profëtanwan Dios Yaya ninqan cumplinanpaqmi. Tsay profëtam nirqan:

²³ <<Juk doncëlla jipashmi ollqu wamrata qeshyakunqa. Tsay wamrapa shutinmi churanqa Emanuelta>>. (Emanuel ninanqa Dios Yayam noqantsikwan kaykan ninanmi.)

²⁴ Tsaynö niptinmi José puñuykanqanpita rikcharkamur Dios Yayapa angelnin ninqannölla Maríata warminpaq chaskirqan.

²⁵ Peru Maríawan täkurpis wamran yurinqanyaq manam paywan puñuyarqanraqtsu. Wamra yuriskiptinmi shutin churarqan Jesústa.