Jonás 1 - Biblia en Quechua del norte de Conchucos

Jonás qeshpir aywakunqan

¹ Amitaipa tsurin Jonástam Dios Yaya nirqan:

² <<Nínive markachö täkuq runakunapa jutsankuna alläpanam kaykan. Tsay jatun markaman aywar paykunata ushakätsinäpaq kanqanta willakuy>>.

³ Tsaynö niptinmi Jonásqa qeshpir Jope markaman aywarqan. Tsaychömi Tarsis markaman büqui yarquykaqtana tarirqan. Tsaymi Dios Yayapita qeshpiyta yarpar pasäjita sas rantiskir tsay büquiwan Tarsisman aywarqan.

⁴ Peru tsay büquiwan aywaykaptinmi Dios Yaya alläpa wayrätsimurqan. Tsaymi yaku altupa laqchikaptin büquipis pakinaykarqanna.

⁵ Tsaymi büqui manijaqkuna alläpa mantsakar cada ünu diosninkunata mañakuyarqan. Tsaypitam büqui mana jundikänanpaq apayanqan cargakunata lamarman jitariyarqan. Tsayyaqnam büquipa qopi kaq cuartunchö Jonás alläpa puñukashqa kaykarqan.

⁶ Tsaymi büqui manijaqkunapa mandaqnin rikchatsir nirqan: <<¡Puñuy siki! ¡Imanirtan kushishqa puñuykanki! Sas shärir diosnikita mañakuy. Talvezqach salvamäshun kaychö mana ushakänapaq>>.

⁷ Tsaypitanam büqui manijaqkuna ninakuyarqan: <<Kaynö ñakanqantsikta musyanapaq pï jutsayuq kanqantapis sortiyashun>>. Tsaynö sortiyayaptinmi Jonáspaq suerti shikwarqan.

⁸ Tsaymi Jonásta tapuyarqan: <<Willayämay. ¿Imatatan rurakashkanki kayläya ñakanapaq? ¿Imachötan arunki? ¿Maypitatan shamushkanki? ¿May runatan kanki? ¿Mayqan castatan kanki?>>

⁹ Jonásnam nirqan: <<Hebreo castam kä. Ciëluchö kaykaq Dios Yayapita mantsakurmi payta servï. Paymi lamartawan kay patsatapis kamashqa>>.

¹⁰ Tsaynam büquichö aruqkuna alläpa mantsakar niyarqan: <<¡Imanirtan Dios Yayata cäsushkankitsu!>> Tsaynö niyarqan Dios Yayapita qeshpir aywaykanqanta willashqana kaptinmi.

¹¹ Cada vez mas yaku laqchikaptinmi niyarqan: <<Kanan ¿imatatan rurashun yaku pärananpaq?>>

¹² Jonásnam nirqan: <<Yaku laqchikaq pärananpaq lamarman jitarpayämay. Kaynö lamar laqchikänanpaq noqam jutsayuq kä>>.

¹³ Tsaynö niptinmi büqui manijaqkuna lamar kuchunman büquita imaykanöpa wititsiyta munayarqan. Peru alläpa wayraptinmi wititsiyta munarpis puëdiyarqantsu.

¹⁴ Tsaymi Dios Yayata mañakur niyarqan: <<Taytay, qam munaptikim llapan kaykuna päsaykan. Ama ushakaykatsiyällämaytsu kay runapa jutsanpita. Lamarman jitarpuyaptïpis jutsannaq kaptinqa ama culpatsaykayämaytsu>>.

¹⁵ Tsaynö mañakuskir Jonásta lamarman jitarpuyaptinmi yaku laqchikaykar päraskirqan.

¹⁶ Tsaynö päraskiptinmi Dios Yaya poderösu kanqanta tantiyaskir büqui manijaqkuna alläpa mantsakäyarqan. Tsaymi sacrificiuta waykar payta serviyänanpaq prometiyarqan.

¹⁷ 17 (2.1) Jonásta millpunanpaqmi jatunkaray pescäduta Dios Yaya shuyaykätsinaq. Millpuskiptinmi pescädupa pachanchö kimsa paqas kimsa junaq karqan.