Joel 1 - Biblia en Quechua del norte de Conchucos

Murushqa mikuykunata chukllushkuna chipyat ushayanqan

¹ Dios Yaya revelanqantam Petuelpa tsurin Joel willakur nirqan:

² Mayor runakuna, kanan niyanqaqta shumaq wiyayämay. Judá nacionchö täkuq runakunapis, kanan willayanqaqta wiyayämay. Kay castïgutanöqa ¿imayllapis rikäyashkankitsuraq? Taytaykikuna kawayanqan witsay kaynö mantsaypaq castïgu ¿kashqatsuraq?

³ Kay castïgu imanö kanqanta tsurikikunata willayanki. Tsurikikunapis tsurinkunata willayanqa. Willkaykikunapis tsurinkunata willayanqa.

⁴ Jatusaq chukllushkuna katuyanqantapis taksha kaq chukllushkunam ushayashqa. Taksha chukllushkunapita quëdaqtapis shiwrikunam mikuyashqa. Tsaynömi llapan mikuyta mana dëjar ushayashqa.

⁵ Machashqalla kakuq runakuna, tantiyakuyay. Machashqa kayanqaykipita kutikarkur waqayay. Chukllushkuna üvata ushayaptinmi upyayänaykipaq vïnupis kannatsu.

⁶ Yupaytapis mana puëdiypaq soldädukunanömi tsay chukllushkuna markantsikman juntäyämushqa. Kirunkunapis imayka leonpa curmïllunnömi fïlu.

⁷ Llapan üvakunatam chakranpa ushayashqa. Hïgustapis jankatmi ushayashqa. Yurankunatawan rämankunatapis mana imannaq qerullantam dëjayashqa.

⁸ Casarananpaqna kaykaq jöven wañuskiptin doncëlla jipash lütu llatapata shukukurkur waqanqannö ikyaypa ikyar waqayay.

⁹ Sacerdötikunapis waqaykäyan tsaki mikuy ofrendata ni vïnutapis Dios Yayapa templunman pipis manana apaptinmi.

¹⁰ Trïgupis manam kannatsu. Üvakunapis jankatmi tsakishqa. Olïvu jachakunapis chipyatmi ushakashqa. Llapan chakrakunapis mana imannaqmi quëdashqa.

¹¹ Chakrachö aruqkuna, üvata cosechaqkuna, makillaykikunata tsoqparkur waqayay. Trïguta y cebädatapis manakaqllapaqmi muruyashkanki.

¹² Üvakunapis jankatmi tsakishqa. Hïguskunapis chipyatmi ushakäyashqa. Granadïllakuna, palmërakuna, manzänakunawan llapan plantakunam jankat tsakiyashqa. Runakunapis alläpa mantsakashqam kaykäyan.

¹³ Dios Yayata altarchö serviq sacerdötikuna, lütu llatapata shukukurkur waqayay. Tsaki mikuypis ni vïnupis Diosnintsikpa wajinman apayämunanpaq mananam kannatsu.

¹⁴ Mayor runakunatawan llapan runakunata Diosnintsikpa wajinman qorikäyänanpaq qayatsiyay. Dios Yayata mañakur llapayki ayunayay.

¹⁵ ¡Allaw noqantsik, Dios Yaya juzganan junaq chaykämunnam! Tsay junaq chämuptin ¡allaw imanöraq runakuna ñakayanqa! Tsay junaqmi llapanpaq poderyuq Dios Yaya maytsikaq runakunata ushakätsinqa.

¹⁶ Mikuynintsik jankat ushakaptinmi alläpa muchuychö kaykantsik. Tsaymi Diosnintsikpa templunman aywarpis kushikuntsiknatsu.

¹⁷ Murunqantsik trïgupis manam jeqamushqanatsu. Mikuy churakuna wajikunachöpis wayrallanam tumaykan.

¹⁸ Qewata maychöpis mana tarirmi wäkakunapis alläpa llakipaypaq waqayan. Üshakunawan cabrakunapis wañurmi ushakaykäyan.

¹⁹ ¡Dios Yaya, yanapaykayällämay! Jallqachö qewakunatawan jachakunatapis ninam rupar ushashqa.

²⁰ Raqrakunachö yakukunapis jankatmi tsakishqa. Desiertuchö qewakunatapis ninam rupashqa. Tsaymi chucaru wätakunapis qamman mañakamur waqapaykäyäshunki.