Hechos 1 - Biblia en Quechua del norte de Conchucos

Espíritu Santuta chaskiyänanpaq willanqan

¹ Tayta Teófilo, punta kaq libruchömi Jesús llapan ruranqankunata y yachatsinqankunata qellqamurqä. Tsaykunatam rurarqan y yachatsikurqan willakur qallanqanpita

² hasta ciëluman aywakunqan junaqyaq. Ciëluman manaraq aywakurmi akranqan apostolninkunata Espíritu Santupa poderninwan imata rurayänanpaqpis tantiyatsirqan.

³ Wañunqanpita kawaskamurmi chusku chunka (40) junaqyaq paykunata yuripurqan. Rasunpa kawamunqanta creyiyänanpaqmi tukuynöpa tantiyatsirqan. Tsaynöllam Dios Yayapa mandakuyninpaqpis shumaq tantiyatsirqan.

⁴ Apostolninkunawan kaykarmi Jesús nirqan: <<Willayanqaqnöllam prometiyäshunqaykita Taytä kachamunqa. Tsayta manaraq chaskirqa Jerusalénpita ama aywakuyankiraqtsu.

⁵ Juanqa yakullawanmi bautizarqan. Peru qamkunam sïqa Espíritu Santuwan bautizashqa kayanki. Bautizashqa kayänaykipaq wallka junaqllanam faltan>>.

Ciëluman Jesús kutinqan

⁶ Jesúswan qorikashqa kaykaqkunam tapuyarqan: <<Taytay, ¿kananpitaqa Israel nacionpa mandakuqninku kanki?>>

⁷ Jesúsnam nirqan: <<Tsaykunataqa manam musyayänaykitsu. Imay junaq imay höra tsaykuna päsananpaq kanqantaqa Dios Yayallam musyan. Payllam poderyuq kaykan munanqan höra tsaykunata rurananpaq.

⁸ Peru tsaynö kaptinpis Espíritu Santu qamkunaman shamuptinmi poderninta chaskiyanki. Chaskiskirnam willakuynïta willakuyanki Jerusalénchö, entëru Judeachö, Samariachö y maytsay markakunachöpis>>.

⁹ Tsaynö parlayta ushaskirmi pallarikar qallaykurqan. Rikaraykäyaptinmi pukutay tsapaskiptin illakaskirqan.

¹⁰ Tsaynö kaykäyaptinmi yuraq llatapashqa ishkay runakuna illaqpita yuriskir

¹¹ niyarqan: <<Galilea runakuna, ¿imanirtan ciëlupa rikaraykäyanki? Puntaykikunapita ciëluman aywanqannöllam Jesús yapay kutimunqa>>.

Judaspa rantin apóstol kananpaq Matíasta akrayanqan

¹² Tsaypitam Olivos lömachö kaykäyanqanpita apostolkuna Jerusalénman kutiyarqan. Tsay lömapita Jerusalénmanqa manam alläpa karutsu karqan, sinöqa jamay junaqchö puriyanqannöllam.

¹³ Chaykurnam patsakuyanqan altusman lätayarqan. Paykunam kayarqan Pedro, Juan, Santiago, Andrés, Felipe, Tomás, Bartolomé, Mateo, Alfeupa tsurin Santiago, Zelote niyanqan Simón y Santiagupa tsurin Judas.

¹⁴ Paykunam Jesúspa maman Maríawan, Jesúspa wawqinkunawan y wakin warmikunawanpis Dios Yayata mañakuyänanpaq imaypis qorikäyaq.

¹⁵ Tsay junaqkunam Jesúsman creyikuqkuna pachak ishkay chunkanö (120) qorikäyaptin Pedro ichirkur nirqan:

¹⁶ <<Wawqikuna y panikuna, musyanqantsiknömi runakunata Judas pusharqan Jesústa prësu achkuyänanpaq. Tsaynö kananpaq kanqanta qellqananpaqmi Espíritu Santu rey Davidta tantiyatsirqan. Tsaymi Judasta päsananpaq Dios Yayapa palabran ninqannölla kanan cumplishqa.

¹⁷ Judasqa noqakunawanmi purirqan. Paytapis apóstol kananpaqmi Jesús akrarqan>>.

¹⁸ (Jesústa rantikunqan qellayta Judas kutitsinqanwanmi chakrata rantiyarqan. Judasqa pachanpis pashtat uray senqapa shikwaskiptinmi aqashninpis witsikaskirqan.

¹⁹ Tsayta musyaskirmi Jerusalénchö täkuq runakuna tsay chakrapa shutin churayarqan Acéldamata. Paykunapa idiömanchömi Acéldama ninanqa Yawar Pampa ninan.)

²⁰ <<Judasta päsananpaqmi Salmo libruchö nin: << <Wajinpis tsunya katsun. Tsaychö pipis ama täkutsunnatsu>. Tsaynöllam mastapis nin: <Pay rurananpaq kaqta jukna ruratsun>.

²¹ <<Tsaymi juktana churashun Judaspa rantin apóstol kananpaq. Tsay runa katsun Jesús willakur qallanqanpita noqakunawan puriq.

²² Tsaynölla Jesústa Juan bautizanqanpita ciëluman kutinqanyaq qatiraq katsun. Tsay runata churashun noqakunanö apóstol kar Jesús kawamunqanta willakur purinanpaq>>.

²³ Tsaynö niptinmi ishkaq runakunata akrayarqan. Jukmi Matías karqan. Jukaqnam José karqan. Wakin runakunam Joséta Barsabás niyaq y wakinnam Justo niyaq.

²⁴ Tsaypitam Dios Yayata mañakur niyarqan: <<Dios Yaya, qammi musyanki runakunapa shonqun imata yarpanqantapis. Kanan mayqantapis akranqaykita musyaykatsiyämay.

²⁵ Akranqayki runam apostolniki kanqa Judas Iscariotipa rantin. Apóstol kayninta mana cumpliptinmi Judaspa supaynin apashqa>>.

²⁶ Tsaynö mañakuskir sortiyayaptinmi Matíaspaq suerti shikwarqan. Matíaswanmi apostolkuna yapay chunka ishkayna kayarqan.