Génesis 1 - Biblia en Quechua del norte de Conchucos

Dios Yaya llapanta kamanqan

¹ Imapis manaraq kaptinmi ciëluta kay patsatapis Dios Yaya kamarqan.

² Kay patsaqa manam kanan kanqannötsu karqan, sinöqa tutapay yakullaraqmi karqan. Tsay yaku jananchömi Dios Yayapa Espïritun tumaykarqan.

³ Tsaynam Dios Yaya nirqan: <<¡Atsikyay katsun!>> Niptinmi atsikyarqan.

⁴ Atsikyayta kamaskirnam alli kanqanta rikar tutapaypita atsikyayta rakirqan.

⁵ Atsikyaypa shutinmi churarqan junaqta y tutapaytanam paqasta. Punta kaq junaqchömi tsaykunata kamarqan.

⁶ Tsaypitam Dios Yaya nirqan: <<Yaku ishkayman rakikarnin yaku chawpinchö azulyaraykaq katsun>>.

⁷ Ninqannöllam azulyaraykaqta kamarqan. Tsaynöpam wakin kaq yaku kay patsachö quëdarqan y wakin kaqnam azulyaraykaqpa jananchö. Ninqannöllam llapanpis allilla karqan.

⁸ Azulyaraykaqpa shutinmi Dios Yaya churarqan ciëluta. Ishkay kaq junaqchömi tsaykunata kamarqan.

⁹ Tsaypitam Dios Yaya nirqan: <<Tsaki patsa rikakänanpaq urachö kaq yaku juk patsallaman qorikätsun>>. Tsaymi pay ninqannölla karqan.

¹⁰ Tsaki kaqpa shutinmi Dios Yaya churarqan patsata. Y qorikashqa yakupa shutinmi churarqan lamarta. Tsaykunata kamaskirnam alli kanqanta Dios Yaya rikarqan.

¹¹ Tsaypitanam Dios Yaya nirqan: <<Allpapita jeqamur wiñäyämutsun tukuyläya plantakuna: muruyuq qewakuna y wayuq jachakuna karpis>>. Ninqannöllam llapanpis allilla karqan.

¹² Tsaymi jeqamur wiñäyarqan tukuyläya muruyuq qewakunawan tukuyläya wayuq jachakunapis. Tsaykunata kamaskirmi alli kanqanta Dios Yaya rikarqan.

¹³ Tsaykunatam kimsa kaq junaqchö kamarqan.

¹⁴ Tsaypitanam Dios Yaya nirqan: <<Ciëluchö atsikyaqkuna kayätsun junaqwan paqaspis kaman kayänanpaq, junaqkunatawan watakunata yupayänanpaq y muruyänanpaq cosechayänanpaq imay kanqantapis musyayänanpaq.

¹⁵ Tsaynölla atsikyaykuna ciëluchö kayätsun patsaman atsikyäyämunanpaq>>. Ninqannöllam llapanpis allilla karqan.

¹⁶ Tsaynöllam rupayta, killata y qoyllurkunata kamarqan. Rupaytam kamarqan junaqpa atsikyänanpaq y killatanam paqaspa atsikyänanpaq.

¹⁷ Tsaykunatam Dios Yaya ciëluman churarqan kay patsaman atsikyämuptin

¹⁸ paqaswan junaqpis kananpaq. Tsaykunata kamaskirmi alli kanqanta Dios Yaya rikarqan.

¹⁹ Tsaykunatam chusku kaq junaqchö kamarqan.

²⁰ Tsaypitam Dios Yaya nirqan: <<Yakuchö tukuyläya kawaqkunawan patsa jananpa päriqkunapis atska kayätsun>>.

²¹ Tsaynö nirmi Dios Yaya lamarchö jatusaq mantsaypaq wätakunatawan qochakunachö y mayukunachö pescädukunatapis kamarqan. Tsaynöllam tukuyläya päriqkunatapis kamarqan. Tsaykunata kamaskirmi alli kanqanta Dios Yaya rikarqan.

²² Tsaypitam bendicionninta churar nirqan: <<Lamarchö kawaqkunawan patsa jananpa päriqkunapis, maytsikaman mirayay>>.

²³ Tsaykunatam pitsqa kaq junaqchö kamarqan.

²⁴ Tsaypitanam Dios Yaya nirqan: <<Tukuyläya wätakuna kayätsun: manshu kaq, chucaru kaq y lätaypa puriqkunapis>>. Ninqannöllam llapanpis karqan.

²⁵ Tsaynöpam Dios Yaya kamarqan tukuyläya manshu y chucaru wätakunatawan lätaypa puriqkunatapis. Tsaykunata kamaskirnam alli kanqanta Dios Yaya rikarqan.

²⁶ Tsaypitanam Dios Yaya nirqan: <<Kananqa runata kamashun kikintsik rikuqta. Noqantsiknö kananpaqmi payta kamashun. Paypa mandädunchömi kayanqa pescädukuna, päriqkuna, manshu kaq wätakuna, chucaru kaq wätakuna y lätaypa puriqkunapis>>.

²⁷ Kikin rikuqtam Dios Yaya runata kamarqan. Paynö kananpaqmi kamarqan. Ollqutapis warmitapis paymi kamarqan.

²⁸ Tsaypitam bendicionninta churar nirqan: <<Kay patsaman juntanqanyaq wamraykikuna atska kayätsun. Qamkunapa mandäduykikunachö kayätsun pescädukuna, päriqkuna y llapanpis kay patsachö kawaqkuna>>.

²⁹ Tsaypitanam nirqan: <<Mikuyänaykipaqmi kamashkä kay patsachö tukuyläya mikuna plantakunata y wayuq jachakunatapis.

³⁰ Wätakuna, päriqkuna y lätaypa puriqkuna mikuyänanpaqmi jachakunatawan qewakunata kamashkä>>. Ninqannöllam llapanpis karqan.

³¹ Llapan kamanqankuna alläpa alli kanqantam Dios Yaya rikarqan. Soqta kaq junaqchömi tsaykunata kamarqan.