Filemón 1 - Biblia en Quechua del norte de Conchucos

Apóstol Pablo saludakunqan

¹ Willakuq majï kuyay Filemón: Noqa Pablum, Jesucristupa willakuyninta willakunqäpita carcelchö qaykuraykar wawqintsik Timoteuwan kay cartata cartakayämü.

² Panintsik Apiata, willakuq majintsik Arquiputa y wajikichö qorikaykur Dios Yayata alabaq wawqintsikkunata y panintsikkunata saludaykullay.

³ Taytantsik Dios Yaya y Señor Jesucristo llakipäyäshurniki alli päsakuychö kawakuyänaykipaq yanapaykuyälläshuy.

Creyikuq majinkunawan Filemón alli kawakunqan

⁴ Wawqi Filemón, imaypis mañakunqä höram qampaq Dios Yayata agradëcikü.

⁵ Señor Jesucristuman creyikunqaykita y creyikuq majintsikkunawan kuyanakur kawanqaykitam willayämashqa.

⁶ Tsaymi mañakü Jesucristuman creyikunaykipaq y noqantsik rayku wañunqanpita alli kaqkunata ruranaykipaq.

⁷ Wawqi Filemón, kuyakuq kar creyikuq majintsikkunata shumaq animatsinqaykita musyarmi alläpa kushikü.

Onésimuta Filemón chaskinanpaq Pablo rugakunqan

^8-10 Wawqi Filemón, Señor Jesucristupa willakuyninta willakunqäpitam carcelchö qaykuraykä. Noqaqa awkinnam kä. Prësu kaykanqäman serviqniki Onésimo chämuptinmi alli willakuyta willaptï Jesucristuta chaskikur imayka tsurïnö kaykan. Tsaymi rugakamuq Onésimuta kachamuptï chaskiykunaykipaq. Jesucristupa apostolnin karmi obliganaqpaq podernï kan. Peru manam obligaynikita munätsu, sinöqa kuyakuq kaptikim Onésimuta shumaq chaskiykunaykipaq rugakamuq.

¹¹ Unayqa serviqniki karpis manam shumaqtsu yanapashurqayki. Peru kananmi sïqa Jesucristuta chaskishqana kar ishkantsiktapis yanapamäshun.

¹² Tsaymi alläpa llakirpis Onésimuta yapay kutiykätsimü. [Payta noqatanö chaskiykullay.]

¹³ Alli willakuyta willakunqäpita prësu qaykuraptï rantiki yanapamänanpaq quëdatsiptïpis allim kanman karqan.

¹⁴ Peru serviqnikita manam katsikümantsu. Masbien kikikim yanapamänanpaq o mana yanapamänanpaqpis ninayki.

¹⁵ Talvezchi Dios Yaya permïtishqa Onésimo juk tiempulla qampita yarqamunanpaq. Tsaynöpam Jesucristuman creyikur kananqa imayyaqpis wawqikina kaykan.

¹⁶ Kananpitaqa mananam serviqllaykinatsu kanqa, sinöqa kuyay wawqintsikmi. Tsaynö kaykaptinqa noqa kuyanqaqnölla podernikiman kutimuptin llakipaykullay.

¹⁷ Creyikuq majï kaptikim rugakamuq noqata chaskimanqaykinölla paytapis chaskiykunaykipaq.

¹⁸ Serviqniki Onésimo imaykitapis suwashqa kaptin o dëbishuptikiqa päganaqpaq willamay.

¹⁹ Llapan dëbishunqaykita päganaqpaqmi kikï qellqamü. Peru ama qonqaytsu Jesucristupa alli willakuyninta willanqaqpita qampis dëbimanqaykita.

²⁰ Wawqi Filemón, creyikuq majï kaptikim ninqaqta ruranaykipaq rugakamuq. Rugakamunqaqta ruraptikiqa alläpam kushikushaq.

²¹ Imatapis ninqänö ruranaykipaq kaqta musyarmi kay cartata cartakayämü. Ninqaqpita masta ruranaykipaq kaqtapis musyämi.

²² Shamuptï patsatsimänaykipaq alistakuykällay. Dios Yayata mañakunqaykinömi carcelpita yarqaskamur watukaqniki shamushaq.

Cartapa ushanan

²³ Epafrasmi saludamushunki. Paypis Jesucristupa alli willakuyninta willakunqanpitam paqtä qaykuraykan.

²⁴ Tsaynöllam wawqintsik Marcos, Aristarco, Demas y Lucaspis saludayämushunki. Paykunam llapan imaykachö yanapayäman.

²⁵ Señornintsik Jesucristo llakipäyäshurniki imaypis yanapaykuyälläshuy. [Amén.]