Éxodo 1 - Biblia en Quechua del norte de Conchucos

Egiptuchö Israel runakuna mirayanqan

¹ Egiptuman Jacob aywakuptinmi llapan tsurinkunapis warmintin tsurintin aywayarqan. Jacobpa tsurinkunapa shutinkunam kayarqan

² Rubén, Simeón, Leví, Judá,

³ Isacar, Zabulón, Benjamín,

⁴ Dan, Neftalí, Gad y Aser.

⁵ Jacobqa tsurinkunawan y willkankunawanmi Egiptuman qanchis chunka (70) chäyarqan. Tsurin Joséqa Egiptuchönam kaykarqan.

⁶ Egiptuchömi Joséwan wawqinkuna y paykunawan aywaqkunapis wañukuyarqan.

⁷ Peru Israel runakunanam alläpa mirar maytsikaq kayarqan.

Egiptuchö Israel runakuna ñakayanqan

⁸ Tsaypitanam Egiptuchö rey kananpaq jukna yaykurqan. Tsay mandakuqmi José pï kanqantapis musyarqantsu. Tsaymi Egipto runakunata nirqan:

⁹ <<Marka majikuna, tantiyakushun. Israel runakunam alläpa mantsaypaq mirar noqantsikpitapis mas puëdiqna kaykäyan.

¹⁰ Tsaynö manana mirayänanpaq imallatapis rurashun. Tsaynölla mirarqa contrantsikmi tikrayanqa. Chikiqnintsikkunaman tallukaskirnin guërrachö venciskamarnintsikmi kay nacionpita qeshpir aywakuyanqa>>.

¹¹ Tsaynö willanakuskirmi capatazkunata churayarqan Israel runakunata alli maqar arutsiyänanpaq. Tsaynö arutsirmi Pitón y Ramesés markakunata shäritsiyarqan. Tsay markakunachömi Faraónpa churakunan tröja wajinkuna karqan.

¹² Peru tsaynö maqar alläpa ñakatsiyaptinpis Israel runakunaqa masmi mirayarqan. Tsaynö mirayaptinmi Egipto runakuna alläpa mantsayarqan.

¹³ Tsaymi mas aja aruykunachöna arutsiyarqan.

¹⁴ Qetäta y tikata ruratsirmi chakrankunachöpis alläpa arutsir sufritsiyarqan. Llapan imayka aruykunachömi Israel runakunata alläpa sufritsiyarqan.

¹⁵ Tsaynöllam Egipto nacionpa mandakuqnin rey qayatsirqan Sifratawan Fúata. Paykunam hebrea warmikunapa partërankuna kayarqan. Qayaskatsirmi nirqan:

¹⁶ <<Hebrea warmikunaman qeshpikatsiq aywar llullunkuna ollqu o warmi kanqanta rikäyanki. Ollqu kaptinqa wañuskatsir warmi kaqllata dëjayanki>>.

¹⁷ Peru tsaynö nikaptinpis tsay partërakunam Dios Yayapita mantsakur Egipto nacionpa mandakuqnin rey mandanqanta cäsuyarqantsu. Tsaymi ollqu wamra yuriptinpis wañutsiyarqantsu.

¹⁸ Tsayta musyaykurmi Egipto nacionpa mandakuqnin rey yapay qayaskatsir partërakunata nirqan: <<¿Imanirtan ollqu wamra yuriqkunata wañutsiyankitsu?>>

¹⁹ Tsaynam niyarqan: <<Taytay, hebrea warmikunaqa manam Egipto warmikunanötsu kayan. Tsay warmikunaqa mas fuerti karmi manaraq chäyaptï qeshpikuyan>>.

²⁰ Dios Yaya partërakunata yanapaptinmi Israel runakuna mas atskaman mirar mantsaypaq kayarqan.

²¹ Dios Yayapita mantsakur ollqu wamra yuriqkunata mana wañutsiyanqanpitam partërakunapa ayllunkunapis atskaman mirayänanpaq Dios Yaya bendicionninta churarqan.

²² Tsaymi llapan Egipto runakunata Faraón nirqan: <<Hebreo runakunapa ollqu tsurinkuna yuriptinqa mayuman llapanta jitariyanki. Peru warmi yuriptinqa kawaykaqllata dëjayanki>>.