Ester 1 - Biblia en Quechua del norte de Conchucos

Fiestapaq mikuyta rey Asuero ruratsinqan

¹ Juk reymi Asuero shutiyuq karqan. Paymi India nacionpita qallaykur Etiopía nacionyaq pachak ishkay chunka qanchis (127) provinciakunapa mandakuqnin karqan.

² Rey Asuerum Susa markapita tsay llapan provinciakunata mandarqan.

³ Kimsa watana mandakuq kaykarmi llapan mandäsiqninkunapaq, Persiachö y Mediachö soldädukunapa capitanninkunapaq y provinciakunapa autoridäninkunapaq fiestata ruratsirqan.

⁴ Tsay fiestatam alläpa rïcu y poderyuq kanqanta musyayänanpaq soqta killantin ruratsirqan.

⁵ Fiesta rurayta ushaskirnam Susa markachö täkuq runakunata rey Asuero qayatsirqan palaciunpa patiunchö qanchis junaq fiestata rurar mikupakuyänanpaq. Tsaymanmi rïcupis waktsapis aywayarqan.

⁶ Palaciupa patiunchömi yuraq y azul fïnu cortïnakunawan juk ramädata rurayarqan. Lïnupita rurashqa granäti cordonkunawanmi tsay carpakuna wataräyarqan qellaypita rurashqa arguyllakunaman. Tsay arguyllakunam marmolpita rurashqa paradorkunachö laqararqan. Tsaynöllam qoripita y qellaypita rurashqa kuyakuypaq bancakunapis tsaychö karqan. Tsay patiupa pïsunmi kuyakuypaq parara rumikunawan, pórfido rumikunawan y yuraq y yana marmolkunawan adornashqa karqan.

⁷ Rey Asueruqa vïnutapis junta juntam jichanqanyaq qoripita rurashqa cöpakunawan servikurqan. Tsay cöpakunam tukuyläya rurashqa karqan.

⁸ Vïnuta servikuqkunatam rey Asuero nirqan upyayta mana munaq kaqtaqa pitapis mana obligayänanpaq, sinöqa upyayta munaq kaqlla munayanqanyaq upyayänanpaq.

⁹ Tsaynöllam rey qayatsinqan runakunapa warminkunapaqpis reina Vasti mikuykunata ruratsirqan. Paykunam rey Asuerupa palaciun rurinchö mikupakuyarqan.

Reina kanqanpita Vastita qarqunqan

¹⁰ Fiesta qallanqanpita qanchis junaqtanam rey Asuero machatashqa kar confiakunqan qanchis eunucu runakunata qayatsirqan. Paykunam kayarqan Mehumán, Bizta, Harbona, Bigtán, Abagta, Zetar y Carcas.

¹¹ Tsay runakuna chaykuyaptinnam warmin Vastita corönan shukushqata pushayämunanpaq mandarqan. Vasti alläpa kuyakuypaq kanqanta tsaychö runakuna y autoridäkuna rikäyänanpaqmi tsayman pushayänanpaq mandarqan.

¹² Peru pushayänanpaq qanchis eunucu runakunata rey mandaykaptinpis Vastiqa manam aywayta munarqantsu. Aywayta mana munanqanta willayaptinmi rey Asuero alläpa rabyarqan.

¹³ Tsay witsaymi imapis kaptin ley yachaqkuna reyta imatapis yätsiyaq. Tsaymi paykunata rey qayatsirqan imata rurananpaqpis yätsiyänanpaq.

¹⁴ Ley yachaqkunachö rey Asuerupa mas amïgunkunam kayarqan Carsena, Setar, Admata, Tarsis, Meres, Marsena y Memucán. Paykunam Persiachö y Mediachö mas respitashqa kayarqan. Tsaynöllam reypa yätsiqnin y mandäsiqnin autoridäkuna kayarqan.

¹⁵ Tsaymi rey Asuero paykunata tapurqan: <<Mandanqä eunucu runakunawan qayatsiptïmi Vasti cäsumashqatsu. ¿Imata ruranäpaqtan ley nin?>>

¹⁶ Tsaymi mandäsiqnin autoridäkunapa puntanchö rey Asueruta Memucán nirqan: <<Taytay rey, warmiki Vasti mana cäsushurniki manam qamllatatsu manakaqman churashushkanki, sinöqa maytsaychö mandäsiqnikikunata y mandakunqayki provinciakunachö täkuq runakunatapis manakaqmanmi churashqa.

¹⁷ Reina Vasti mana cäsunqanta musyaykurqa wakin warmikunapis tsaynöllam ollqunkunata cäsuyanqatsu. Mana cäsurmi niyanqa: <Rey Asuero qayatsiptin reina Vastipis manash aywashqatsu>.

¹⁸ Entëru Persiachö y Mediachö mandäsishuqniki autoridäkunapa warminkunapis reina Vasti mana cäsushunqaykita wiyaykurqa ollqunkunata manam cäsuyanqatsu. Tsaymi imaypis piñanakurlla kawayanqa.

¹⁹ <<Taytay rey, tsaynö mana kananpaq juk leyta rurashun mandakunqayki kaqchöqa llapan cumpliyänanpaq. Tsay leyta imaypis cumpliyänanpaq entëru Persiachö y Mediachö kaq wakin leykuna qellqayanqan libruchö qellqashqa katsun. Tsay leyqa katsun warmiki Vasti imaypis puntaykiman manana kutimunanpaq y rasunpa cäsukuq alli warmina paypa rantin reina kananpaq.

²⁰ Tsay leyta maytsay mandakunqaykichöpis musyatsikushun. Tsayta musyarmi warmikuna mantsakur ollqunkunata rïcu o waktsa kaptinpis respitayanqa>>.

²¹ Tsaynö Memucán niptinmi rey Asuero y yanapaqninkunapis niyarqan: <<Tsay ninqaykiqa allim>>. Tsaymi tsay yätsinqannölla llapanta qellqarkur

²² maytsay mandakunqan provinciakunaman ordinta apatsirqan. Tsay ordinmi qellqashqa karqan kikinkunapa idiömankunachö y kikinkuna qellqayanqannölla. Tsay ordinmi nirqan llapan runakuna warminkunata mandädunkunachö katsiyänanpaq.