Esdras 1 - Biblia en Quechua del norte de Conchucos

Israel runakuna nacionninkunaman kutikuyänanpaq rey Ciro mandanqan

¹ Persia nacionchö rey kananpaq Ciro yaykunqan watam Ciruta Dios Yaya yarpätsirqan Israel runakunata nacionninkunaman kutitsinanpaq. Tsaynö kutitsirmi profëta Jeremías willakunqanta cumplirqan. Rey Cirum entëru mandanqan nacionman cartawanpis willakuqwanpis nirqan:

² <<Noqa Cirum, Persia nacionchö mandakuq rey kar niyaq: Ciëluchö Dios Yayam llapan nacionkunata podernïman churamushqa. Paymi nimashqa Judáchö kaykaq Jerusalénchö templunta shäritsinäpaq.

³ Tsaymi Dios Yayaman creyikuq runakuna mayqanpis aywakuyta munaptin ordenä Jerusalénman chaykur Dios Yayapa templunta shäritsiyänanpaq. Paymi Israel runakunata kuyaq Dios kar Jerusalénchö täkun. Aywakuyaptin mana dëjaypa yanapaykutsun.

⁴ Täkuyanqanpita Jerusalénman aywaqkunatam quëdaq kaq Israel majinkuna yanapayanqa qellaywan, qoriwan, wätakunawan y ofrendakunawanpis. Tsaynöllam yanapayanqa Dios Yayapa templunta Jerusalénchö shäritsiyänanpaq>>.

⁵ Rey Ciro ninqannömi templuta shäratsiyänanpaq wakin Israel runakunata Dios Yaya animatsirqan. Tsaymi Benjamín trïbupa y Judá trïbupa mandaqninkuna, sacerdötikuna y levitakunapis Jerusalénman shayämurqan.

⁶ Aywakuyaptinmi llapan vecïnunkunapis qellaywan, qoriwan, mikuykunawan, wätakunawan, chaniyuq kuyaypaq kaqkunawan y ofrendakunawanpis yanapayarqan.

⁷ Tsaynöllam Dios Yayapa templunpita Nabucodonosor apanqan manëjukunata Jerusalénman kutitsiyänanpaq rey Ciro entregarqan. Tsay manëjukunam Nabucodonosor adoranqan diosninkunapa templunchö churararqan.

⁸ Jerusalénman kutitsiyänanpaqmi tesorëru Mitrídatesta rey Ciro entregarqan. Paymi Sesbasarta yupapurqan. Sesbasarqa Judáman aywaqkunapa mandakuqninmi karqan.

⁹ Manëjukunata yupapur entreganqanmi karqan: qoripita kimsa chunka (30) tazonkuna, qellaypita waranqa (1,000) tazonkuna, ishkay chunka isqun (29) cutsillukuna,

¹⁰ qoripita kimsa chunka (30) täzakuna, qellaypita chusku pachak chunka (410) täzakuna y waranqa (1,000) tukuyläya manëjukuna.

¹¹ Qoripita y qellaypita chaskiyanqan manëjukunam pitsqa waranqa chusku pachak (5,400) karqan. Llapan tsaykunatam Israel majinkunawan aywar Babiloniapita Jerusalénman Sesbasar kutitsirqan.